داگیرکردنی هزر (الغزو الفکری): داگیرکردنی هزر خراپترین و قورسترین جۆری داگیرکاریەو ڕزگاربون لێی مەحاڵ نیە، بەڵام هەوڵی باش و کاتی زۆریشی دەوێ، ئەگەر ووڵاتێک لەلایەن ووڵاتێکی ترەوە، یان نەتەوەیەک لەلایەن نەتەوەێکی تری جیاوازەوە خاکەکەی داگیر بکرێت، ئەتوانێ دوای خەبات و ماندوبون و قوربانیدانێک بە ئاست و قەبارەی داگیرکاریەکە هەوڵی ڕزگار بوون بدات و ڕزگاری ببێت، پاشانیش دەستکاتەوە بە خۆ بونیاد نانەوەو بەخێرای هەستێتەوە.
بەڵام ئەگەر، هەمان گەل و نەتەوە لەڕووی هزریەوە داگیربکرێن و پرۆسەی داگیرکاری کاریگەری قوڵی لەسەر عەقڵو بیرکردنەوەیان دانابێت، ئیتر ئەو کات هەستانەوەو سەرپێ کەوتنیان زۆر زەحمەتەو هەوڵو ماندو بوون و قوربانیدانی زۆرترو زیاتری دەوێت و نەخشەو پلانی وردترو تۆکمەتریشی پێویستە. هەر بۆیە هەمیشە داگیرکەر لەپاش داگیرکرنی خاک پەنا بۆ داگیرکردنی هزرو بیرو هۆشی داگیرکراو دەبات. گەلی کورد وەک گەلێکی ژێردەستەو داگیرکراو، زیاتر لەسەد ساڵە کاری لەسەر دەکرێت و بەردەوام هەوڵیش دەدرێت هزر و بیر و هۆشی بە تەواوی داگیر بکرێت و ئینتیمای نیشتمانی و نەتەوەیی نەمێنێ و خاک و ئاڵاو باقی پیرۆزیەکانی تری لا بێ بەها بکرێت.
تاڕادەێکی زۆریش نەخشەو پلانەکان سەرکەوتو بوەو ڕەنگدانەوەی لەسەر تاکی کورد داناوەو توانراوە بەشێک لە کورد بێ ئیرادەو دەستەمۆ بکرێت و وای لێبکرێت خۆی بەپلە دوو لە بەرامبەر نەیارەکانیدا ببینێ و باوەڕی بەهیچ شتێکی خۆی نەمێنێت. بەڵام، دوای ئەو گۆڕانکاریە نێودەوڵەتیانەی لە ناوچەکەدا هاتە ئاراوەو بەشێک لە باشووری کوردستان ئازاد بوو، کوردانی باشوور هەلێکی باشیان بۆ هاتە پێش، بۆ هەڵکێشان و سڕینەوەی ئاسەوارە خراپەکانی ئەو سیاسەتە داگیرکاریەو ئەتوانرا لە ڕێگای دروسکردن و دامەزراندنی کۆمەڵێ ناوەند و دەزگای زانستی و ئەکادیمیەوە و بەسوود وەرگرتن لە کۆمەڵێ خەڵکی پسپۆڕو شارەزا و هۆشیار، کار لەسەر هەڵوەشاندنەوەیان بکرێت، بەڵام بەداخەوە، نەک نەکرا بەڵکو، هەر بیریشی لێ نەکرایەوە، بۆیە لە ئێستادا بەشێک لەو هەلومەرجە خراپ و نالەبارەی ڕووی لە باشوور کردوەو هەندێک داگیرکەریان لێبوەتە فریاد ڕەس و سەنگەریان لە دەسکەوت و نەتەوەکەی خۆیان گرتوە، بەشێکی زۆری پەیوەندی بە کاریگەریەکانی ئەو سیاسەتەوە هەیەو ووڵاتانی هەرێمایەتی و داگیرکەری کوردستان بەردەوام لەو گۆمە لێڵەدا یاری ئەکەن و بۆ ساتێکیش غافڵ نابن و بەردەوام لە ڕێگەی نۆکەرەکانیانەوە لە هەوڵدان بۆ قۆستنەوەی دەرفەتەکان و ئەو کەلێن و ناکۆکیانەی کە بەهۆی هەڵەکانی خۆمانەوە دروست بوە.
ڕاستە کورد لەماوەی سی و سێ ساڵی حوکمرانی خۆیدا، نەیتوانیوە وەک پێویست خزمەت بەهاووڵاتیان بکات و بەڕێوەبردنێکی باش و دروست پەیڕەو بکات، ئەمانە هەموو هەڵەی گەورەن و پێویستیان بە هەوڵ و خەباتی دڵسۆزانە هەیە بۆ ڕاستکردنەوە، بەڵام هەموو ئەمانە نابێتە پاساو بۆ خۆ بەدەستەوەدان و ملکەچکردن لە ئاست داگیرکەران، ڕاستە ئێمە ڕەخنەو گلەیی زۆرمان هەیە، بەڵام ئەمانە نابنە پاساو بۆ پشتکردنە دۆزی ڕەوای نەتەوەێکی گەورەی چل ملیۆن کەسی کەساڵەهای ساڵە ئەچەوسێنرێتەوەو غەدرێ لێ دەکرێت.
