بەرەو شۆڕشێكی سەرتاسەری كشتوكاڵ لەهەرێمی كوردستان. ئەمەش بەو مانایەی كە كشتوكاڵ بكرێتە ئەلتەرناتیڤی نەوت. ئەگەر ئەم ستراتیژە دیراسەی ورد بكرێت و ، بەخێرایی و جدی كاری لەسەر بكرێت، بێگومان دەبێتە فریادڕەسی كورد و كۆمەڵگەی كوردی و لە مەرگی حەتمی ڕزگارمان دەبێت.
لەبەرئەوەی كورد نەیتوانیوە پێ بخاتە ناو سەردەمی پیشەسازی، هاوكات ژینگە و پێگەی هەرێمی كوردستانیش لەبارە بۆ كشتوكاڵێكی نایاب و بەرهەمێكی سروشتی، كوردستان دەتوانێت ڕكابەری گەورە لەبازاڕەكانی جیهاندا بكات.
مرۆڤی كورد، كۆمەڵگەی كوردی تاكو ئەم چركەساتەش بەگوێرەی مۆدیلەكانی سەردەمی كشتوكاڵ بیردەكاتەوەو كاردەكات و، كۆی ژێرخان و سەرخانی كۆمەڵگەكەمان تایبەتە بە سەردەمی كشتوكاڵ، لەمۆدیلە كلاسیكیی و سەرەتاییەكەیدا.
واتە ئەگەر ئێمە ئیستا بڕیاری ئەوە بدەین كە دەست بكەین بەشۆڕشێكی كشتوكاڵی، هیچ بەربەستێكی دەرونی دروست نابێت و، دابڕانی فەرهەنگیش لەنێوان مۆدیلی ژیانی نەوەكان دروست نابێت. لەلایەكی تریشەوە، پێكهاتەی جەستەیی كۆمەڵگەی كوردی خەسڵەتەكانی هێزی سەردەمی كشتوكاڵی لەدەست نەداوە. لەهەموو ڕوویەكەوە لەبارە بۆ دەستكردن بە شۆڕشێكی سەرتاسەری كشتوكاڵ.
بەرلە دەستبردن بۆ ئەو شۆڕشە، پێویستمان بە ماستەرپلانێكی، یاسایی و سیاسی وكۆمەڵایەتی هەیە، ئەو زەمینە سازییەش لێك تێگەیشتنێكی فراوانی پێویستە لەنێوان هێزە سیاسییەكان، هەروەها لەنێوان خەڵك و حكومەتدا.
پێم وایە پاكێچی ئامادەسازی بۆ ئەو شۆڕشە گەورەیە، بەم جۆرە سەركەوتوو دەبێت:
یەكەم: هەڵمەتی دیالۆگی فراوان بۆ گەڵاڵەكردنی ڕێككەوتنی نێوان هێزە سیاسییەكان و، هاوكات كردنەوەی درگای دیالۆگی فراوان لەنێوان خەڵك و حكومەت بۆ تێپەراندنی بیرۆكەكە.
دووەم: گەڵاڵەكردنی ڕێكەوتننامەیەكی هەمەلایەنە لەسەر هێلە سەرەكییەكانی ئەو پرۆژەیە، لەنێوان هەموو هێزە سیاسییەكاندا. دواتر بەگەڕخستنی ماركێتنێكی بەهێز بۆ شیكردنەوەی سودەكان پرۆژەكە بۆ خەڵكی كوردستان.
سێیەم: دەركردنی یاسایەكی تایبەت لەپەرلەمان بۆ چاكسازی كشتوكاڵ، كە تیایدا كەموكوڕییە یاساییەكانی كەرتەكە، كێشەكانی زەوی و زار لەنێوان خەڵك و خەڵك، خەڵك و حكومەت، حكومەت و حكومەت چارەسەر بكات “زۆرجار كێشەی دوولایەنی حكومی لەسەر زەوی و زار دەبینرێت، بەتایبەتی لەنێوان وەزارەتی كشتوكاڵ و شارەوانیدا”.
چوارەم: دروستكردنی داتابەیسێكی گەورە لەسەر زەوییە كشتوكاڵییەكان و دەستی كار و مەكینەكشتوكاڵییەكان و سەرچاوەكانی ئاو لەكوردستان.
پێنجەم: دانانی پرۆژەیەك بۆ دروستكردنی ژێرخانی كشتوكاڵ، هەر لەچاككردنی زەوی و زارەوە، تاكو كڕینی مەكینەی نوێ و بەگەرخستنی دەستی كار” لەو هەزاران هەزار موچە خۆرەی بندیوار كەبوونەتە بار بەسەر كوردەوە”.
شەشەم: دابەشكردنی دەستی كار و مەكینەی نوێ، بەگوێرەی پێویستی زەوییەكان.
حەوتەم: سەرپەرشتی كردنی پرۆسەكە لە دەستپێكەوە تاكو وەبازاڕ خستن لەلایەن كەسانێكی پسپۆڕ و كۆمیتەیەكی باڵاوە كە دەستەڵاتی جێبەجێكردنی ڕاستەوخۆیان هەبێت.
هەشتەم: لەچوارچێوەی یاسای چاكسازی كشتوكاڵدا، دەوڵەمەند و سەرمایەدارەكان ناچار بكرێن، بەكردنەوەی كارگەی جۆراو جۆر بۆ لەقتونان و پاراستنی بەرهەمەكان. هاوكات سازاندنی هەلی كار بۆ هەزاران گەنج و هاوڵاتی ئەم هەرێمە.
نۆیەم: حكومەت خۆی بەرهەمەكان بكڕێتەوەو دابەشی سەربازاڕەكانی كوردستانی بكات.
دەیەم: دامەزراندنی كۆمپانیایەكی كوردی حكومی بۆ هەناردەكردنی بەرهەمەكانی كشتوكاڵی كوردستان بۆ دەرەوە، بەتایبەتی بۆ وڵاتانی كەنداو. بۆ ئەوەش پێویستە حكومەت ڕێككەوتنی پێشوەختەی بازرگانی هەبێت.
لەمێژووی گەلانی جیهاندا، ئەوانەی كەدووچاری دۆخی لەم شێوەیەی هەرێمی كوردستان بوون، دەیان نمونەی وامان هەیە كە كاتێ ڕزگاركەرێك لە ترۆپكی نائومێدیدا هاتووەو، بڕیاری یەكلاكەرەوەی داوە. بەوەش گەل ڕزگاربووە لە چارەنوسێكی ڕەش.
ڕاستە ئەم ئەركە قورس و سەختە و كات و ئیرادە و متمانە و هەماهەنگی هەمووانی پێویستە، بودجەی پێویستە تاكو شەمەندەفەرەكە دەگاتە سەر سكەی خۆی، بەڵام قەدەری كوردە لەكاتێكدا لەبەردەم داڕوخانێكی گەورە خۆی دەبینێتەوە، نابێ دەستەوەستان بوەستێت و خۆی بداتە دەست مەرگێكی نادیار.
ئێمە كەناتوانین كۆمەڵگە و بەرهەمی سەردەمی پیشەسازیی بین، پێویستە لەقاڵبەكەی خۆماندا پێشكەوین كەبریتییە لەسەردەمی كشتوكاڵ. ئەمەش ئەزمونێكی ئەوەندە گەورەیە كە بوەتە سەرچاوەی لێشاوی دراوی قورس بۆ وڵاتانی وەكو: چین، ئەمریكا، هۆڵەندا، ڕووسیا بڕێكی زەبەلاح لەبودجەی ساڵانەیان لەڕێگەی داهاتی كشتوكاڵەوە دابین دەكەن. بڕی ساڵانەی داهاتی كشتوكاڵ بۆ خەزێنەی ئەمریكا 297 ملیار دۆلارە!.
دواجار: ئەوەی باسكرا تەنها بیرۆكەیە و لەدوای گفتوگۆ ڕەنگە بتوانرێت وەك باشترین بەرنامە بۆ ئەو شۆڕشە كشتوكاڵییە گەڵاڵە بكرێت و بەگوێرەی ژینگە و كەشوهەوای كوردستان بایەخ بەچەند جۆرێكی بەروبوم بدرێت كە ببێتە ناسنامە بۆ كوردستان و، سەرچاوەی داهاتی قورس بۆ حكومەت و ڕێگرتن لەداڕوخانی ئابوری كوردستان.
هاوكات سەرچاوەی وەگەڕخستنی تواناكانی خەڵكی كوردستان كە ئێستا بەحوكمی واقیعی بەرهەمهێنان و ئابوری ڕەیعی، تواناكانی خەڵك ستۆك بوون و، دەرچەیەك نیە بۆ ئەوەی تواناكانی تێدا وەگەڕ بخرێت.
