دوای دەستپێکردنەوەی جەولەێکی تر لە شەڕی نێوان بزوتنەوەی حەماس و ئیسرائیل، ئێمەی کورد وەک پیشەی هەمیشەیی دابەشی دوو بەرە بوین، دابەشبونێک نەک لەسەر بنەمای بەرژەوەندی نەتەوەی و ئینسانی بوون، بەڵکو لەسەر بنەمای ئایدۆلۆژیا و ڕقی حیزبی، بەرەیەک دژە بە ئیسرائیل و بەرگری لە بزوتنەوەی حەماس دەکات، بەرەێکی تر دژە بە حەماس و بەرگری لە ئیسرائیل دەکات، هەریەکەش بۆ خۆی کۆمەڵێ پاساوو موبەڕیڕ ڕیز دەکات.
هەندێک پێیان وایە ئیسرائیلیەکان دۆستێکی مێژوویی کوردن و لە هیچ قۆناغێکدا دژ بەکورد و بەرژەوەندیەکانی نەوەستاونەتەوە، ئەوە عەرەبەکانن ئەنجامدەری ئەنفال و کیمیابارانو سەدان تاوانی نامرۆڤانەی ترن دژ بەگەلی کورد، لە بەرامبەردا هەندێکی تر پێیان وایە ئیسرائیل هیچ کات دۆستی ڕاستەقینەی کورد نەبوەو هەمیشە کوردی بەکارهێناوە بۆ بەرژەوەندی و مەرامی سیاسی خۆی و پاشان لە ڕۆژە سەختەکاندا دەستی لێ بەرداوەو بەتەنها بەجێی هێشتووە، وەک ئەوەی کە لەدوای هەرەسی شۆڕشی ئەیلول و ڕیفراندۆمدا بینیمان، لەگەڵ ئەوەیشدا هەر ئەو بوو دەستی باڵای هەبوو لە دەسگیرکردنی (عەبدوڵا ئۆجەلان) و تەسلیمکردنەوەی بە ڕژێمی تورکیا.
میللەتی کورد هەمیشە سۆز و عاتیفە بەسەریدا زاڵەو عاتیفیانە تەفسیر بۆ ڕوداوە سیاسیەکان دەکات، بێ ئاگایە لەوەی کە بنەماکانی سیاسەت لەسەر ئەساسی بەرژەوەندی دائەمەزرێ و ئەوە ئێمەین وەکخۆی لێی تێناگەین، ئەبێ لەوە حاڵی بین وەک ئەوترێت: لەسیاسەتدا دۆستی هەمیشەیی و دوژمنی هەمیشەیی نیە، ئەوەی کە هەیە بەرژەوەندی هەمیشەیی و پارێزگاری کردنە لە بەرژەوەندی.
ئەبێ لەوەش تێبگەین کە ئەم شەڕە ئەگەر لە قۆناغێکدا شەڕی کوفر و ئیمان بوو بێ و لەسەر خاکی مسڵمانان بوبێ ئێستا لە قۆناغێکی تر دایەو هەزاو و یەک شتی تری تێکەڵ بووە، هەر لە بازرگانی و شەڕی بەوەکالەتەوە هەتا شەڕی نەتەوەیی، ئەوەی لە ئەرزی واقیعدا ئێستا ئەبینرێت شەڕە لەنێوان دوو نەتەوەی جیاواز و دیاری کراودا کە ئەوانیش نەتەوەی عەرەب و جولەکەیە، یان ڕاستتر بڵێین ئێستا قەتیس بوە لە نێوان عەرەبی فەلەستینی و جولەکەدا، ئەوەتا زۆرێک لە عەرەب لەدورەوە سەیری مەرگی بێ ڕەحمانەی هاو زمانەکانیان ئەکەن و نقەشیان لێوە نایەت، تەنانەت زاتی ئەوەش ناکەن بە بەیاننامەیەک ئیدانەی بکەن.
ئەوەی بۆ ئێمەی کورد پێویستە لەم قۆناغەدا وەک میللەتێکی قوربانی دەستی زوڵم و ستەم کە سەدان ساڵە ووڵاتمان وێران ئەکرێ کەس وکارمان ئەکوژرێت، دڵتەنگ بین بەکوشتنی هەموو مرۆڤێکی سڤیل و بێتاوان هەر ڕەنگێکی هەبێ و لەهەر گەلو نەتەوەیەک بێت، دژبین بە هەموو شەڕو ماڵوێرانیەک کە خەڵکی مەدەنی بە ئامانج بگرێت، لەهەر شوێن و گۆشەێکی ئەم سەر زەمینە بێت.
