ئایا حەوتی ئەكتۆبەر هاوشێوەی كوشتنی جێنشینی نەمسا دەبێتە هەڵگیرسانی جەنگی جیهانی ؟؟؟
پاش تێپەربوونی یەك ساڵ لەدوای دەستپێكردنی جەنگی غەززە كە بە ئۆپراسیۆنێكی سەربازی بزوتنەوەی حەماس وژمارەیەك لە ڕێكخراوی چەكداری فەڵەستینی دەستیپێكرد بۆ سەر كۆمەڵگا نیشتەجیبوونی جولەكەكانی نزیك كەرتی غەززە، وكوشتن وڕفاندنی دەیان كەسی لێكەوتەوە لە هاوڵاتی وسوپا وهێزە ئەمنییەكانی ئیسرائیل لە هێرشێكی چاوەڕواننەكراودا كە لە ئاست پێشبینی كەسدا نەبوو وهەمو جیهانی تووشی شۆك كرد.
سەرەتا بزوتنەوەی حەماس وهاوپەیمانەكانی وهاوسۆزەكانی بە سەركەوتنێكی گەورە وبێ وێنە لەقەڵمیاندا وپێیان وابوو كە ئەم هێرشە دەستپێك دەبێت بۆ لەناوبردنی دەوڵەتی ئیسرائیل وسەرەتایەكە بۆ ڕزگار كردنی هەموو فەڵەستین، وبەر مەبنای ئەم هێرشە چەندین لێكۆڵەوەر وشرۆڤەكاری هاوسۆز لەگەڵ بزوتنەوەی حەماس چەندین پێشبینیان خستەڕوو سەبارەت بە قۆناغەكانی داهاتوو پاش هێرشەكان وهەموویان كۆك بوون لەسەر ئەوەی بزوتنەوەی حەماس سەركەوتنێكی گەورەی تۆمار كردووە.
بەڵام پاش چەند ڕۆژیك ئیسرائیل توانی كۆنترۆڵی سەرجەم ناوچەكان بكاتەوە كە چەكدارە فەڵەستینیەكان توانیان كۆنترۆلی بكەن لەناو خاكی ئیسرائیل لەئەنجامی هێرشەكە، وئیسرائیل توانی دووبارە خۆی ڕێكبخاتەوە وهەڵسانەوە لە شۆكی هێرشەكەی حەوتی ئەكتۆبەر كە هەمووان كۆك بوون كە شكست بووە بۆ سیستمی ئاسایش وسەربازی ئیسرائیل وتوانا سەربازییەكانی ئیسرائیل وگوزرێك بوو لە شكۆی دەوڵەتی ئیسرائیل كە هەمیشە خۆی وەكو دەوڵەتێكی بەهێز وپێشكەوتوو لە ڕۆژهەڵاتی ناوڕاست نیشان ئەدا.
بەڵام پاشان بەرپرسە ئیسرائیلیەكان پێیان وابوو كە گێڕانەوەی ئەو ناوچانەی كە كۆنترۆڵكرابوو لە لایەن چەكدارە فەڵەستینیەكان لە ئاست ئەو شۆكە نەبوو كە تووشی دەوڵەتی ئیسرائیل بوو ئەمەش زۆر بە ئاشكارا لە لێدوانەكانیان بەدی دەكرا وئاماژەیان بۆ ئەوە دەكرد كە ئیسرائیل دەبێت تۆڵەی خۆی بكاتەوە لە ئەنجامدرانی ئەو هێرشانە، بۆیە دەستی كرد بە هێرشێكی بەرفراوان بۆ سەر كەرتی غەززە كە نزیكەی یەك ساڵە بەردەوامە، وبەدرێژترین جەنگ لەقەڵەمدەدرێت لە مێژووی دەوڵەتی ئیسرائیل .
ولە ئەنجامی هیرشە ئیسرائیلیەكان بۆ سەر كەرتی غەززە سەرچاوە فەرمییەكان باس لە كوژرانی نزیكەی 42 هەزار هاوڵاتی دەكەن وبرینداربوونی 98 هەزار هاوڵاتی ووێرانبوونی 86% كەرتی غەززە وئاوارەبوونی 90% دانیشتوانی كەرتی غەززە ولە ناوبردنی زۆربەی زۆری توانا سەربازییەكانی بزوتنەوەی حەماس وهێزە چەكدارە فەلەستینییەكان كە تا ئاستیكی زۆر گەورە سنووردار بوون لەبەرامبەردا 1200 سەرباز وهاوڵاتی ئیسرائیلی كوژراون و100 هاوڵاتی دیكەش بارمەتن لای بزوتنەوەی حەماس .
بەڵام جەنگی غەززە وئەو نەهامەتیانەی كە ڕووبەروی دانیشتوانی غەززە بۆتەوە لێكەوتەكانی تەنها لە سنووری كەرتی غەززە وئیسرائیل نەبوو بەڵكو پریشكی ولێكەوتەی ئەم جەنگە گواسترایەوە بۆ لووبنانی دراوسێ ولە ئێستادا حزبووڵلای لووبنانی ڕووبەرووی هێرشێكی بەرفراوانی سوپای ئیسرائیل بۆتەوە، ولە ئەنجامدا ژمارەكی زۆری سەركردەكانی ئەو لایەنە گوژران، وپێشبینی ئەوە دەكریت كە حزبوولڵای لووبنانی وباشووری لوبنان لەڕەوتی ڕووداوەكاندا كە دووچاری هەممان چارەنووسی حەماس وكەرتی غەززە ببێتەوە.
ئەوەی تێبینی دەكرێت لەم جەنگە پاشەكشێ بوونی ئێران لە ناوچەكە بەكشتی وسەلەماندنی ئەوەی ئێران نەیتوانی وەكو پێویست بەهانای هاوپەیمانەكانیەوە بچێت وپاڵپشتیان بكات، و پێشكەوتنی تەكنەلۆژی ئیسرائیل توانی جەنگەكە بۆ ئیسرائیل یەكلابكاتەوە سەرەڕای توانا مرۆیی سەربازییەكانی حەماس وحزبوللا وبەهێزی باوەڕی بزوتنەوەی حەماس وحزبولڵا وباكگراوندە ئاینیەكانیان كە ئیهلهام بەخش بوو بۆیان لە دژی ئیسرائیل.
و پێدەچێت لە ڕەوتی ڕووداوەكاندا لێكەوتەی هێرشەكانی حەوتی ئەكتۆبەر بە غەززە ولوبنان ڕانەوستێت بەڵكو لێكەوتەكانی هەریەك لە ئێران وئێراق وسوریا ویەمەنیش بگرێتەوە وببنە گۆڕەپانێك بۆ ئەو جەنگێكی فراوان كە بزوتنەوەی حەماس یەكەم چەخماخی ئەو جەنگەی داگیرساند، وپیدەچیت هێرشەكەی حەماس ببێتە هەوێنێك بۆ گۆڕانكاری ڕیشەیی لە ڕۆژهەڵاتی ناوڕاست ودوور نیە ئەم هێرشانە دووبارە نەخشەی وڵاتانی ڕۆژهەلاتی ناوڕاست دابڕێژێتەوە وئەگەری ئەوە هەیە كە ئەم هێرشانە خاڵی كۆتایی بێت بۆ پرۆكسییەكانی كۆماری ئیسلامی ئێران لە ڕۆژهەڵاتی ناوڕاست وكۆتایی هێنان بە پڕۆژەی هیلالی شیعی وهەناردەكردنی شۆڕش لەناوچەكە وهەوڵەكانی كۆماری ئیسلامی ئێران لەماوەی چل وپێنج ساڵی ڕابردوو لەناوبەرێت، وئەگەری ئەوەش هەیە خوودی كۆماری ئیسلامی ئێران ببیتە قوربانی هێرشەكەی حەوتی ئەكتۆبەر ئەگەر هێرشەكانی ئیسرائیل وئێران بەرامبەر بە یەكتری سنووردار نەكرێت.
وئەگەر بەشێویەكی ژیرانە مامەڵە لەگەڵ ئەم جەنگە نەكرێت وسنووردار نەكرێت پێدەچیت جەنگی جیهانی سێهەم دروست بێت لە نێوان جەمسەری ئەمریكا وئەوروپا وئیسرائیل وهاوپەیمانەكانیان لە جیهان لەبەرامبەر ڕووسیا وچین وئێران وكۆریای باكوور وهاوپەیمانەكانیان وهێرشەكەی حەوتی ئەكتۆبەری 2023ی بزوتنەوەی حەماس هاوشیوەی ڕووداوی كوشتنی جینشنی ئیمپراتۆری ئیمپراتۆریەتی نەمساوی – مەجەری لە شاری سەرایڤۆ كە بووە هۆی سەرهەڵدانی جەنگی جیهانی یەكەم و20 ملیۆن كەس تەیایدا كوژران ئەم جەنگەش ببێتە هەوینی دروستبوونی جەنگی جیهانی سێهەم.
وەكو كورد پێویست دەكات زۆر بە وریاییەوە مامەڵە لەگەڵ ئەم رووداوانە بكەین چونكە هەرێمی كوردستان وناوچە كوردییەكان لەرۆژهەڵاتی ناوڕاست خەریكە جەنگە لێ نزیك دەبێتەوە لە ئیستادا، وبەئەگەرێكی زۆرەوە خاكی كوردستان ببێتە گۆرەپانێك بۆ ئەو جەنگە ،وئەگەر لایەنە سیاسیە كوردییەكان بە وریایەوە مامەڵە لەگەل ئەم بابەتە نەكەن ئەوا دەبەن بە بەشێك لەم جەنگە بەهۆی دابەشبوونی لایەنە سیاسیە كوردییەكان لە نێوان هەردوو جەمسەری رووسیا وئەمریكا، وبۆیە پێویست دەكات كورد بەشداری نەكات لەم ململانیە كە ڕووبەڕووی ناوچەكە بۆتەوە وپێدەچێت ببێتە ململانیەكی جیهانی كە دەیان ملیۆن قوربانی لێبكەویتەوە.
