بەر لە هەڵبژاردنی شارەوانییەكان لە توركیا، لە باكووری كوردستان و بەشێكی شارەكانی رۆژئاوای توركیا، دەنگۆی ئەوە بڵاوكرایەوە، كە سەرۆك بارزانی، داوای لە لەیلا زانا، سیاسەتمەداری بەناوبانگی كورد لە باكووری كوردستان كردووە، بێتەوە ناو كایەی سیاسەت و بۆ بەرژەوەندی ئاكەپە و رەجەب تەییب ئەردۆغان، كار بكات.
زانا، پروپاگندەیەكی باشی بۆ دەم پارتی كرد، شار بە شار دەگەڕا تا دەنگیان بۆ كۆ كاتەوە، بەڵام راستییەك هەیە و دەبێت بیزانین، نەوەی ئێستای كورد لە باكووری كوردستان، گوێ لە نەوە كۆنەكان ناگرن، بۆیە ئەوەی زانا مەبەستی بوو، لە هەڵبژاردنی شارەوانییەكانی توركیا بەدەستی نەهێنا، واتە دەنگی دەم پارتی، وەكوو ئەوە نەبوو كە زانا دەیویست.
بۆ بابەتی ئەوەی، بارزانی بە زانای گوتبێت كار بۆ ئاكەپە و ئەردۆغان بكات، پێویست ناكات ئێمە قسەی لەسەر بكەین، چونكە بڕوامان پێناكەن و دەیان تۆمەتمات بۆ هەڵدەبەستن، دەبێت قسەی ئەو كەسانە وەربگرین، كە لە توركیا ئۆپۆزسیۆنی توركن و كەمالیستن و قەڵەمەكەیان بۆ بەرژەوەندی جەهەپە و كەمالیستەكانە.
محەممەد یڵماز، نووسەری دیاری توركیا و كەمالیست، لە وتارێكدا كە هەڵسەنگاندنی بۆ ئەنجامی هەڵبژاردنی شارەوانییەكان كردووە، لە بەشێكی وتارەكەیدا دەڵێت: ”هەموو ئەو دەنگۆیانەی باسیان لەوە دەكرد، بارزانی بە زانای گوتبێت كار بۆ بەرژەوەندی ئاكەپە و ئەردۆغان بكە لە ئیستانبۆڵ، دەرچوو، ئەو دەنگۆیانە تەنیا بۆ كۆكردنەوەی دەنگ بووە و هیچی تر“
بەشێك لە پارتەكانی باكوور و باشوور، هەركە بیانەوێت دەنگ بۆ خۆیان كۆ بكەنەوە، یەكسەر تۆمەتی ئەوە دەدەنە پاڵ بارزانی، كە كار بۆ ئەردۆغان دەكات، لە راستیدا ئەو دەنگۆیانە جیا لەوەی بێمەعریفەیی و بێتوانایی سیاسیی ئەو لایەنە نیشان دەدات، لە هەمان كاتدا، تەنیا دەتوانرێت ئەو كەسانەی پێهەڵبخەڵەتێنرێت، كە بەبێ ئەوەی بیر بكەنەوە و ئەقڵ بەكاربهێنن، دەنگ دەدەن.
جا ئەگەر بارزانی بتوانێت كاریگەریی لەسەر هەڵبژاردنی توركیا هەبێت و یەكلایی بكاتەوە كێ دەبێتە سەرۆك، یان سەرۆك شارەوانیی، كاریگەریی لەسەر ئەوەش دەبوو، كاتێك ریفڕاندۆم بۆ سەربەخۆیی هەرێمی كوردستان كرا، توركیا نەرمی بنوێنێت، نەك دوژمنانە مامەڵەمان لەگەڵدا بكات.
دەمەوێت دەنگۆیەكی تر بیری خوێنەر بهێنمەوە، لە ٢٠١٣ كاتێك بارزانی لەسەر داوای ئەردۆغان چووە ئامەد و لەوێ پێشوازییەكی گەرمی لێكرا، ئەوكات رۆژنامەی (تەرەف)ی توركی، وتارێكی بە قەڵەمی موژگان خالیس، بڵاوكردەوە و نووسەر، دەنگۆی ئەوەی بڵاوكردەوە، بارزانی بە پاڵپشتی ئەردۆغان، پارتێكی تازە بەناوی پارتی دیموكراتی كوردستانی توركیا دادەمەزرێنێت، لەیلا زاناش دەبێتە سەركردەیەكی باڵای ئەو پارتە و نیزامەدین تاشیش، لەو پارتەدا رۆڵی دەبیت.
بۆیە ئەمە جاری یەكەم نییە، دەنگۆی بێبنەما لە دژی زانا و بارزانی بڵاودەكەنەوە، هۆكارەكەشی تەنیا لێدانە لێیان، چونكە دوو سەركردەی تەواو نەتەوەیی و نیشتیمان پەروەرن.
