دیمەنەكانی سەردانی مەسرور بارزانی سەرۆكی حكوومەتی هەرێمی كوردستانم بۆ پارێزگای هەڵەبجە، لەڕێی میدیاكانەوە بینی، بەوردی سەرنجم لێ دان و دڵخۆشی كردم، دڵخۆش بووم چونكە هەستم كرد خەڵكی هەڵەبجە بەو سەردانە دڵخۆش بوون، هەستم كرد سەرۆكوەزیرانیش دڵخۆشە كە بە هەگبەی پڕ و پڕۆژەی گرنگ و بەڵێنی باش و خەمخۆرانەوە سەردانی ئەو شارە ئازیزەی كوردستانی كردووە. دیار بوو كە خەڵكی خۆشەویستی هەڵەبجە چەند تینووی ئاوڕلێدانەوە و بایەخدانن بە شارەكەیان و هەروەها سەرۆكی حكوومەتی هەرێمیش چەند بەدڵسۆزییەوە دەیەوێ ئەو خواستەی هەڵەبجەییەكان بێنێتە دی.
لێرەوە سڵاو بۆ خەڵكی خۆڕاگر و بریندار و چاو پڕلەهیوای پارێزگای هەڵەبجە دەنێرم، هەڵەبجەی شاری عاریفان و زانایان و منەوەران و شاعیران و رۆشنبیران و شاری شەهیدان، ئەو شارەی بەرگەی ژانی زامەكانی گرتووە و چاوی لە ئایندەیەكی گەشتر و جوانتر بڕیوە، شارێك كە هەموو كوردستانیان دەبێ وەك سۆمای چاو خۆشیان بوێت و خزمەتی بكەن و ناو و ناوبانگی بەرز راگرن.
دەزانم تا ئێستاش ههڵهبجەییەكان غەمبارن چونكە ئەو كۆستەی كە لە ساڵی ١٩٨٨دا لێیان كەوت، نە بچووك بوو نە كەم بوو، بەڵكوو گەورە و ئازاربەخش بوو، بەڵام دەشزانم خەڵكی هەڵەبجە چەند دڵیان بەوە خۆش دەبێ، خزمەتێكی شارەكەیان بكرێت، دڵنیام هەڵەبحەییەكان خەڵكێكی هێندە بەوەفان، هەر كەسێ بە دانانی خشتێكیش لەسەر دیوارێك، لە ئاوەدانكردنەوە و گەشەپێدان و پەرەپێدانی شارەكەیاندا رۆڵی هەبێت، رێزی لێ دەگرن و لەیادی ناكەن.
بە پێچەوانەیشەوە، ئەوانەی بە هەر هۆكارێك بێت زیان بە هەڵەبجە دەگەیەنن و دەیانەوێ ناوی بزڕێنن یان داهاتەكەی دەدزن و هیچ خزمەتیشی ناكەن، دەبێ بزانن هەڵەبجە و خەڵكی هەڵەبجە شایەنی ئەوە نین لەوە زیاتر ئازار بدرێن و ستەمیان لێ بكرێت. ئەوانەی (جا بە هەر هۆكارێك بێت) لە سۆشیال میدیا و لە كەناڵە كوردییەكانەوە بە شان و باڵی رژێمی سەدام و بەعسدا هەڵدەدەن، ئەوانەی بۆ بانگەشەی هەڵوەشاندنەوەی هەرێمی كوردستان و بانگەشەی درۆی كەوتنەوە ژێر دەستی رژێمی ئێستای بەغداش هەڵدەپەڕن و چەپڵە لێدەدەن، دەبێ بزانن ئەوانە بەو قسانە و بە رەفتارەكانیان، خوێ دەكەن بە برینی ساڕێژنەبووی هەڵەبجە و هەڵەبجەییەكاندا.
لە سەدەی پێشوودا، ئەوە رژێمی بەعسی بەغدا بوو دەستی لە كیمیاباران و كوشتنی بەكۆمەڵی هەڵەبجەییەكان نەپاراست، دڵنیا بن هەركات رژێمی ئێستای بەغداش دەستی بڕوات، هەموو كوردستان بە دەردی هەڵەبجە و گەرمیان و بارزان و بادینان و بالیسانی ساڵانی هەشتاكانی سەدەی رابردوو دەبات.
بینیتان رۆژێك بەرلەوەی سەرۆكی حكوومەتی هەرێم بچێتە هەڵەبجە، دادگای باڵای فیدراڵیی ئێراق، چەندە بێمەنتانە بڕیارگەلێكی لە دژی هەرێمی كوردستان دەركرد، بەدڵنیاییەوە نیەتی دادگای فیدراڵی لەو بڕیارانە، هێندەی نیەتی رژێمی بەعس لە كیمیابارانكردنی هەڵەبجە مەترسیدارە، بەڵام هێشتا بەشێك لە خەڵكی كوردستان هەستیان پێنەكردووە و مەستی هەواڵە درۆكانی لەمەڕ مووچەكەی بەغدان!
بهداخهوه ئێستا دهبێت بڵێم هاووڵاتییانی هەرێمی كوردستان له دوو بهرهدا سهنگهریان گرتووه، بهرهیهكیان سهنگهری نیشتمانپهروهری و شهڕی بههێزبوونی ههرێمی كوردستان دهكهن، بهرهیهكیش لهپێناو مانهوهی خۆیان و پاراستنی بهرژهوهندییهكانیان، نیشتمان ئهفرۆشن و هەرێمی كوردستان و داوودەزگاكانی لاواز دەكەن، كارەسات ئەوەیە هاووڵاتیانی هەرێمییش بەسەر ئهو دوو بهرهیەدا دابهش بوون.
بەڵام سهرهڕای ئهوهی فشار و پیلانی دژ به ههرێمی كوردستان لهڕادهبهدهر لە ئێران و بەغدای داردەستیەوە زۆرن، سهرباری ئهمانهش، حكوومهتی هەرێمی كوردستان و سەرۆكەكەی، بێ پلان و بێ پرۆژە و بێ هەنگاو نین و ئەو قەیرانە دروستكراو و كۆسپە گەورانە، گەرچی لێرەولەوێ كاروانی پێشخستن و ئاوەدانكردنەوەی كوردستانی كەمێك هێواش دەكەنەوە، بەڵام ئیرادەی سەرۆكوزیران و حكوومەتەكەی، زۆر بەهێزترن لەو گوشارانە و بەخۆشحاڵییەوە نەیاران نەیانتوانیوە ئەو كاروانە راگرن.
مەسرور بارزانی لە وتارەكەیدا لە هەڵەبجە گوتی: ”دەبێ فشارەكانمان لەسەر حكوومەتی بەغدا زۆر بكەین تا قەرەبووی قوربانیانی كیمیاباران و ئەنفالكردنی خەڵكی كوردستان بكەنەوە.“ ئەم قسەیە زۆر گرنگ بوو، بریا ئەوانەی بێ بنەما خەڵك لەسەر جادە هەڵدەپەڕێنن، خەمێكیان لەم كێشەیە بخواردایە، بەڕاست ئەو پەرلەمانتارە كوردە بەكرێگیراوانەی دژی هەرێمی كوردستان سكاڵا دەكەن، بۆچی رۆژێك لە رۆژان جورئەتی ئەوەیان نەكرد، لەپای قەرەبوونەكردنەوەی خەڵكی هەڵەبجە، سكاڵایەك دژی حكوومەتەكانی ئێراق و دەسەڵاتدارانی بەغدا بەرز بكەنەوە؟ ئایا ئەوە كارێكی گرنگتر نەبوو بیكەن.
