هێژا مەسرور بارزانى، سەرۆکى حکوومەتی هەرێمی کوردستان، بە داوەتنامەیەکى فەرمیی سەرۆكی دەوڵەتی ئیمارات، شان بە شانی دەیان سەرۆک و سەركردە و كاربەدەستی دیکەی وڵاتان، بە یاوەریى شاندێک بەشداریی لە کۆڕبەندی لوتکەى جیهانیی حکوومەتەکاندا كرد.
سەرۆكی حكوومەتی هەرێمی كوردستان لەو کۆڕبەندەدا وتارێکى گشتگیرى گرنگ و سەرنجڕاکێشى پێشکەش کرد كە لە چەندین ڕۆژنامە و پێگەى ڕۆژنامەوانى و لێدوانى زۆر لە بەشداربووەکاندا ڕەنگدانەوەی هەبوو، كە بە ریزبەندییەک، چەند خاڵێکى کاریگەری لەبارەى ئاڵنگارییەکانى بەردەم کومەڵگاى نێودەوڵەتی گرتبووە خۆ، وەک ئاڵنگاریى (سیاسی، ئاسایش، ئابوورى و کەشوهەوا.)
سەبارەت بە ئاڵنگاریى سیاسی و ئاسایش، ئاماژەى بە دوو کێشەى هەرە هەستیارى ڕۆژهەڵاتى ناوەڕاست کرد كە (کێشەى فەلەستین و کێشەى کورد)ە و ئەو ڕاستییە مێژووییەی خستە ڕوو، كە تا ئەو دوو کێشەیە لەسەر بنەمای پرنسیپى (مافى چارەى خۆنووسین) وەک یاسایەکی دانپێدانراوی نەتەوە یەکگرتووەکان چارەسەر نەکرێن، حکوومەت و گەلانى ناوچەکە لە سەقامگیریى (سیاسی، ئاسایش و ئابوورى) بەدوور دەبن و نەهامەتییەکانی سەر گەلانی ناوچەكە بەردەوام دەبن.
خستنەڕووى ئاراستەى دروست و بنەڕەتییانەى چارەسەرکردنى کێشەى کورد لە ئێراق، لە چوارچێوەى پرنسیپى (مافى چارەی خۆنووسین) گواستنەوەیەکى چۆنایەتییە لە گوتارى سیاسیی هەرێمى کوردستان، لە بوارى کوتاییهێنان بەو ستەمە مێژووییەى بەرامبەر بە گەلەکەمان دەکرێت، لە هەمان کاتدا، زەنگێکى هۆشیارکەرەوەیە بۆ دەسەڵاتدارانى ئەمڕۆى ئێراق، بۆ ئەوەى بە سیاسەتە نالەبارەکانیاندا بچنەوە و ماف و ئەرکەکانى گەلەکەمان وەک چۆن لە دەستوورى ئێراقیدا بەرجەستە کراون، دوور لە مانۆڕى قێزەوەنى پاساوهێنان و چەوساندنەوە و باڵى دەستى خۆسەپێنەر، بخرێنە وارى جێبەجێکردنەوە.
پێویستە هەموو هێزە سیاسییەکانى کوردستان، ئەوانەى لەگەڵ (كێشەی نەتەوەیی و نیشتمانیی كورد و كوردستاندا) ڕاستگۆن، پشتیوانیى بێمەرجى گوتارە رەوا و سەرکەوتوانەكەى سەرۆکى حکوومەتى هەرێمى کوردستان بکەن، بە جۆرێك كە دەروازەیەک بێت بۆ کارى پێکەوەیی و بە یەکڕیزى ڕووبەڕووى پێشیلکارى و مەترسییەکانى سەر قەوارەى هەرێمەکەمان ببنەوە.
