بەهێزکردنەوەی ڕایەڵە جیهانی و یونیڤێرسڵەکان بۆ کورد گرنگە، بەقەد بەهێزکردنەوەی متمانەو هێزو دیسکۆرسی ناوخۆیی و ڕێکخستن و کۆنترۆڵی ئەو درزو لێکترازانە ناوخۆییەی کە خەریکە پردو پەیوەندیەکان تێک دەشکێنێ و پایەکانی حوکمڕانی هەرێم لەق دەکات.
مەهاتما گاندی، ١٨٦٩-١٩٤٨ لەنێوان خۆی و هێزی ناوخۆیی گەلدا، باوەڕی بە سپەیس و بۆشایی نەبوو، هەروەک حەزی بەوە نەئەکرد شۆڕشگێڕەکانی دوێنێ ببنە خاوەن سوڵتەیەکی پڕ تیروتوانج، بۆیە دەیویست ناڕەزایی و ئۆپۆزسیۆن دروستنەبێ، کە دەیوت ئازادی یان نانتان دەوێ؟ دەیزانی هەردوکیان گرنگن، بەڵام ئازادی گرنگە بۆ سەردەمی حەماسەت و شۆڕش و قوربانیدان و نانیش گرنگە بۆسەردەمی ئاسایش و حوکمڕانی.
بەشداری کارای کورد لە ساڵۆنە گەرمە جیهانیەکانی ئاسایش و وزەو بیزنس و پیشەسازی، ئابوری و پەیوەندیە نێودەوڵەتیەکان، لوتکەی حکومەتەکان لە ئیمارات، مایەی تێڕامانەو گرنگەو کورد دەبێ هەم نانی پێ پەیدا بکات هەم درزی ناوخۆی پێ پڕبکاتەوەو لاوازی ناوخۆیی پێ بەهێزتر بکاتەوەو ئەرخەیان نەبێت دژی نەیارە سیاسیەکانی، چونکە تا ئێستاش کورد نەیاری سیاسی زۆرترە لە دۆستی سیاسی، هەڕەشەکانی بەردەمی زۆرترە لە دەرفەتەکانی، نابێت ئەو واقیعە پشتگوێ بخات بۆ کۆمەڵێک دەرفەتی کاتی و کۆڕبەندی شەنگ و شیک.
کورد ئەگەر پایەی بنەڕەتی سەقامگیری نەبێت لەناوچەکە نایکەن بەهاوشانی ئەکتەرە گەورەکان لەنێوان ٢٥ سەرۆک دەوڵەت و ١٢٠ شاندی حکومی گەورەو دەیان بیریارو خاوەن ئەقڵی گەورەو شارەزا لە کۆنگرەو لوتکەیەکی جیهانی وەک ئیمارات، #استشراف_حكومات_المستقبل. کورد پێویستە هاوسەنگی ڕابگرێت و یاریزانێکی باش بێت و دەستکەوت و پێگە بەهێزەکەی بپارێزێت لەناوچەکەو پێشبینی بۆ خۆی بکات گرنگترو کاریگەرتر لە ئێراق سیاسەت بکات و چیتر نەخرێتە پەراوێزی زۆرینەی مەزهەبی ناسیۆنالیزمی عەرەبیەوە، خۆناکرێ لەدەرەوە هاوشانی ئەکتەری گەورە بوەستێ بەو قەبارە دیبلۆماسیە ڕاقیەو لە ئێراقیش سوکایەتی بە کەرامەت و شوناسی قەومی کوردەوە بکرێ.
