“ڕووداوی هەكاری و قووڵكردنەوەی شەڕی ناوخۆ”
ب. بەرەو ناوچەی برادۆست
بەپێ بڕیارەكەی كۆمیتەی سەركردایەتی یەكێتی پێویست بوو ئەو هێزەی لە (900)ی پێشمەرگەو فەرماندەی پێشمەرگە پێكدەهات، لەسەرەتای وەرزی بەهاری ساڵی (١٩٧٨) دەست بە چالاكییەكەیان بكەن و بە (سێ) قۆناغ و لە (سێ) هێزی جیادا بەرەو سێ كۆچكەی (ئێران-ئێراق-توركیا) بڕۆن. دواتر هێزێكیان بەناو توركیادا بگەنە خاكی وڵاتی سووریاو چەكە وەرگیراوەكان بگوازنەوە ناوچە ئازادكراوە سەر سنوورییەكانی باشووری كوردستان. سەرەتاش وادانرا هێزی یەكەم، كە لە (٢٢٠) پێشمەرگە پێك دەهات لە ناوچەی پشدەرەوە دەست بە گەشتەكە بكەن و بگەنە ناوچەی برادۆست. بەدوایدا هێزی دووەم، كە لە (500) پێشمەرگە پێك دەهات بگەنەوە بە هێزی یەكەم. ئەوسا هێزی سێیەم، كە لە (150) پێشمەرگە پێك دهات دەست بە جولە بكەن و بگەنە دوو هێزەكەی پێشوو. ئامانج لەو دابەشكارییەش ئەوەبوو، تا هەموو هێزەكەیان بە یەكەوە نەڕۆن و لەكاتی هەر ڕووداوێكی نەخوارزراودا، بە یەكەوە تیانەچن ئەمەو دوای گەیشتنی هەر (سێ) هێزەكان بەیەك، هێزێكیان ناوچەی برادۆست بپارێزێت و هێزێكی تر بەناو خاكی توركیادا بچێتە خاكی وڵاتی سوریاو لە خۆرئاوای كوردستانەوە ئەركی وەرگرتن و گواستنەوەی ئەو چەكانە لە ئەستۆ بگرێت، كە لە دەوڵەتی سوریاوە بۆیان دابین كرابوو. هێزی سێیەمەیش پشتیوانی هێزی دووەم بێت.
خاڵێكی گرنگ لەم ڕووداوەدا ئەوەبوو، كە كەمتر باس لە وەرگرتن و هێنانی چەك لە وڵاتی سوریاوە كرابوو، بەڵام ئامانجێكی ئەو بڕیارەی كۆمیتەی سەركردایەتی پەیداكردنی چەك و تەقەمەنی بوو بۆ هێزەكانیان. یەكێك لەو رێگایانەش وەرگرتنی چەك و تەقەمەنی بوو لە وڵاتی سووریاو تەنانەت وڵاتی لیبیا و فەلەستینییەكان. ئەو كارەش بەبێ دەستگرتن بەو شوێنە ستراتیجییە سەر سنوورە بە ئەنجام نەدەگەیشت. هەربۆیە بۆ گەیشتن بەو ئامانجانە، هێزی یەكەم بە سەركردایەتی (خالید سەعید)ی ئەندانی مەكتەبی سیاسی و هەروەها مەكتەبی عەسكەری و بە یاریدەدەری (حوسێن بابەشێخ و حامیدی حاجی غالی) لە (19ی نیسانی1978)و بە (220) پێشمەرگەو لە ناوچەی پشدەرەوە، بەرەو ناوچەی دیاریكراو بەڕێكەوتن. لەو ژمارەیەش (150) پێشمەرگەیان بەچەك و (70) پێشمەرگەیان بێ چەك بوون. هێزەكەش بە رێگای (كوڕە شیر-سەردشت-خانە-حاجی ئۆمەران) بەبێ كێشە گەیشتنە ناوچەی برادۆست.
هێزی دووەمیش لە (21ی نیسان) لەهەمان ناوچەو بەسەركردایەتی (عەلی عەسكەری) ئەندامی مەكتەبی سیاسی و هەروەها مەكتەبی عەسكەری و بە یاریدەدەری (تاهیری عەلی والی بەگ، سەید كاكە، تالیب ڕۆستەم)، رێگای برادۆستیان بەناو خاكی خۆرهەڵاتی كوردستانی بندەستی ئێران گرتەبەر. ژمارەی ئەم هێزەش وەك ئاماژەمان پێدا (500) پێشمەرگە بوون، لەنێو ئەوانیش (150) پێشمەرگەیان بە چەك و (350) پیشمەرگەیان بێ چەك بوون. ئەوەشی جی باسە، ئەم هێزە وەك هێزی یەكەم نەگەیشتە ناوچەكە، بەڵكو ڕووبەڕووی ئاستەنگی گەورە بوونەوە. هۆیەكەش ئەوەبوو، كە بەهۆی زۆری ژمارەی هێزەكەیان، وا بڕیاردرا، كە بە ئۆتۆمبێل و بەناو خاكی وڵاتی ئێراندا بپەڕنەوە بۆ ناوچەی برادۆست. دابینكردنی ئۆتۆمبێلیش بۆ ئەو ژمارە زۆرەی پێشمەرگە و بەناو خاكی وڵاتی ئێراندا، نەك هەر قورس بوو، بەڵكو مەحاڵیش بوو. هەربۆیە بەدوای دابینكردنی ئۆتۆمبێلدا، هەواڵەكە گەیشتە دەزگای ساواكی ئێران و بەدوایدا حكومەتی ئێراق. تەنانەت ئەو بەلێنەشی بەو هێزە درابوو، كە حكومەتی ئێران لێیان نادات و رێگریان لێناكات وەك چۆن رێگری لە كاروانی یەكەمی هێزەكە نەكرد، وادەرنەچوو. تەنانەت ئەو بەلێنەش وادەرنەچوو، كە خەڵكی گوندەكانی سەرسنووری خۆرهەڵاتی كوردستان بەدرێژایی ئەو رێگایە، نان و ئازوخە و پێداویستیان بۆ دابین دەكەن. هەربۆیە ئەو هێزە لەژێر هەڕەشەی تۆببارانی یەكە سنوورییەكانی وڵاتی ئێران و بەفری زۆری ناوچە سنوورییەكان و سەرمای سەختی ئەو ساڵە، پەرێنەوە ناوچەی برادۆست. بە گەیشتنیشیان بۆ ئەو ناوچەیە، ڕووبەڕووی بۆمباران و تۆببارانی سووپای ئێراق بوونەوە. سەرباری ساردی و سەختی ناوچەكە بەهۆی بەفری باریوی زۆری ئەو بەهارەوە. بەو هۆیەش ژمارەیەك پێشمەرگە بوونە قوربانی و ژمارەیەكشیان لە برسا مردن و هەندێكیشیان لە سەرمادا ڕەق بوونەوە. وەك ئەوەی (حەمەی نانەوا) بە برینداری و لە سەرما بڕستی لێ بڕاو و هێزەكە لە بن بەردێك بەجێیان هیشت، بێئەوەی بزانن چی بەسەر دێت؟ (عەبەی مەلا)ش لە مەفرەزەکەی (تایەری عەلی والی یەگ) بە تۆپێك جەستەی كرا بە دوو كەرتەوە و گیانی لەدەستدا. ئەمەو جگە لە كوژرانی (٤٠ بۆ ٥٠) پێشمەرگەی تر بە كۆپتەرەكانی حكومەتی ئێراق. ئەو كارەساتەش لەكاتێكدا بوو، كە هێزی سێیەمیش بێئاگا لەوەی هێزی دووەم چییان بەسەرهاتووە، بە هەمان ئاستەنگ و نارەحەتی گەیشتنە ناوچەی برادۆست و بە (دوو) هێزەكەی تر گەیشتنەوە.
