یەکێک لە هەرە پرسە گرنگەکانی ئەمڕۆی فەرمانبەران موچەیە کەقووت وژیانی خێزانەکانی لەسەر بەندە، پرسی موچەش بە سیاسی کراوەو دەسەڵاتدارانی ئێراق لە بری بیرکردنەوە لە چارەسەرکردنی زیاتر فشار دەخەنە سەرهەرێمی کوردستان و ئەم پرسە وەک کارتێکی فشار لە دژی هەرێم بە کاردەهێنن و سیاسیانە مامەڵەی لەگەڵ دەکەن کەباجەکەشی فەرمانبەران وکارمەندانی دام ودەزگاکان دەیدەن، بەدواکەوتن ونەدانی موچەکانیان، لەکاتێکدا کە ئەمە پێشێلکاریەکی تەواوی سەرەتاترین ماف و پرنسیپەکانی یاساو دەستورەو تێکەڵ بە پرسی سیاسی کراوە، دەسەڵاتدارانی ئێراق بێ گوێدانە گوزەران و ژیانی فەرمانبەرانی هەرێم، بە هانەی لاوەکیان کردوەتە ئاستەنگ و بۆ شرۆڤەکانی دەستوور ناگەڕێنەوە، وێڕای ئەوەی ئەگەر بەهانەیەکی یاساییش هەبێت لەم بابەتەدا ئەوا هێشتا نابێتە سەنەد بۆ دواخستن و نەناردنی مووچەی فەرمانبەران.
خۆلادان و خۆتێ نەگەیاندنی حکومەتی ناوەند لەمووچە و قووتی فەرمانبەرانی هەرێم پێشێلکاری دەستوورە چونکە هەرلەیەکەمین ماددەی دەستوری ئێراق هاتوە کە (کۆماری ئێراق دەوڵەتێکی فیدڕاڵی یەکگرتووی سەربەخۆی خاوەن سەروەریە، سیستمی حوکمڕانی تێیدا کۆماری نوێنەرایەتی (پەرلەمانی) دیموکراسیە، ئەم دەستورەش یەکپارچەیی ئێراق دەپارێزێت )، ئەمە وێڕای ئەوەی کە خودی دەستورەکە وەک لە مادەی (١٣) دا دەڵێت : دەستور پێداگری لەسەر ئەوە دەکاتەوە کە دەڵێت (دەبێت ڕێز لەم دەستورە بگیرێت و نابێت یاسایەک دابنرێت پێچەوانەی ئەم دەستورە بێت) هەربۆیە بۆمان دەسەلمێنێت کە وەزارەتی دارایی ئێراق لە بەکارهێنانی یاسای بودجەدا پێچەوانەی ئەم مادەیەی سەرەوە کاردەکەن وگوزەران و ژیانی هاوڵاتیان دەخەنە مەترسیەوەو بەمەش شیرازەی کۆمەڵگە بەرەو ناهەمواری ئابوری دەبەن و جیاکاری دەکەن لە نێوان فەرمانبەرانی ناوەندو هەرێمدا.
هەروەها لەچەندین مادەی ترا ئەم دەستورە گوزارشت لە یەکسانی ئێراقیەکان دەکاتەوەو جیاوازی وجیاکاری تیایەبەدی ناکرێت لە هیچ ڕوویەکەوە، بەڵام لە ئێستادا ئەو مامەڵەیەی لەگەڵ فەرمانبەران و مووچە وەرگرانی هەرێمدا دەکرێت نا حەقی و نادەستووریەو دوورە لە بنەماو بڕگەکانی ئەم دەستوورەوە کە بە ڕوونی ئاماژەی بەمافی تاکەکانی کۆمەڵگە داوە هەرلەمناڵی شیرە خۆرەوە هەتا بەساڵاچوویەک ، هەربۆیە پێویستە شارەزایان و ئابوری ناسان ووردتر لەسەر ئەم بابەتە بوەستنەوە وئەم گرفتەشاندی دانوستانکاری شارەزاو بەهێزی دەوێت کە سەرجەم تەفسیرە دەستوەریەکان لەسەر بابەتی مووچەی فەرمانبەران بەکاربهێنن تا بتوانن لەگەڵ حکومەتی فیدڕاڵ بگەنە ئەنجامی چارەسەر، چونکە ئەگەر ئەم کێشەیە چارەسەرنەکریت ئەوا هەڵکشانی مەترسیەکانی زیانی گەورە بە هەرێم و دانیشتوانەکەی دەگەیەنێت و دوورنیە ڕێسی ئەم سی ساڵە نەکاتەوە بە خوری و ئەمەش دەبێتە هۆی تێکدانی ئاشتی کۆمەڵایەتی و پەل دەکێشێت بۆ ناسەقەمگیری سیاسی و هەڵوەشاندنەوەی سەرجەم دام ودەزگاکانی هەرێم بە قەوارە کەشیەوە کە ئەمەش خەونی ناحەزانی کوردەو بەشێکە لەو پیلانەی کە دەوڵەتانی هەرێمایەتی گرەوی تەواوی لەسەر دەکەن وئامانجیان سڕینەوەی ئەم قەوارەیەیە.
