“دەسپێكردنەوەی شۆڕشی كورد لەنێوان (گوڵان)و (نوێ)دا”
لە (26ی مایسی1976ز)دا سەركردایەتی كاتی پارتی دیموكراتی كوردستان بانگەشەی بۆ شۆرشێكی تر كرد، كە لە ئەدەبیاتی خۆیدا بە (شۆڕشی 26ی گوڵان) ناوزەد كرا. لەكاتێكدا ناونانی بە (شۆڕشی26ی گوڵان) هەڵەیەكی مێژوویی بوو، چونكە هەرگیز (26ی مایسی ساڵنامەی زایینی) نەیدەكردە (26ی گوڵانی ساڵنامەی كوردی)، بەڵكو هاوكات بوو لەگەڵ (6ی جۆزەردان)، بەڵام تازە ئەو بەروارە بە هەڵە شوێنی خۆی لە مێژوو و ئەدەبیاتی پارتيدا گرت. ئەو كاتەشی ئەو شۆڕشە هەڵایسا نزیك بە ساڵێك بوو شۆڕشی ئەیلول دووچاری شكستێكی گەورە هاتبوو. هەربۆیە لەسەر سەركردایەتی (پارتی دیموكراتی كوردستان) پێویست بوو، بەرەنگاری ئەو دۆخە بێتەوە، كە ڕووبەڕووی خاكی باشووری كوردستان و كۆمەڵانی خەڵك هاتبوو. بۆ ئەو مەبەستەش لەسەری پێویست بوو دەست بداتەوە شۆڕش و سنوورێك بۆ ستەم و چەوساندنەوەكانی حكومەتی ئێراق و ڕژێمی بەعسی دەسەڵاتدار دابنێت، كە كۆمەڵانی خەڵكی باشووری كوردستانیان دووچاری بارێكی ناهەواری سەخت كردبوو.
خاڵێكی گرنگ و سەرنج ڕاكێشی تریش ئەوەبوو، كە (شەش) ڕۆژ دوای ئەو ڕووداوە، واتە لە (1ی حوزەیران)ی هەمان ساڵ، (یەكێتیی نیشتمانیی كوردستان) بانگەشەی شۆڕشێكی تری بە ناوی (شۆڕشی نوێ) كرد. تەنانەت وایان بانگەشە كرد كە هەڵایسانی هەوڵەكەی سەركردایەتی كاتی پارتی دیموكراتی كوردستان، بۆ لێدانی شۆڕشەكەیان بووە، بێئەوەی بۆ ئەوە چووبن، كە (شۆڕشی گوڵان) تەواو (شەش) ڕۆژ پێش (شۆڕشی نوێ) كەوت. خۆ ئەگەر سەركردایەتی كاتی پارتی دیموكراتی كوردستان، بەو بەرنامەیان زانیبێت، كە (یەكێتیی نیشتمانیی كوردستان) بە نیازە شۆڕشێكی تر لەسەر ئاستی باشووری كوردستان بەرپا بكات، تا بەرەنگاری ئەو دۆخە ناهەموارە بێتەوە، ئەوا بێ پاساو و پیاهەڵدان كارەكەی سەركردایەتی كاتی پارتی، نەك هەر مێژوویی، بەڵكو لە شوێنی خۆیشیدا بوو، چونكە لەلایەك خۆی كردە هەڵگرسێنەری شۆڕشێكی تر و درێژەپێدەری( شۆڕشی ئەیلول). لەلایەكی دیكەوە پێش هەوڵەكەی (یەكێتیی نیشتمانیی كوردستان) كەوت.
هەر چوون بێت ئەو ڕووداوە ئەگەر لە بنەڕەتیشدا هیوایەكی نوێی بۆ كوردی باشووری كوردستان لەگەڵ خۆی هێنابێت، بەڵام لە هەمانكاتدا كێشەی زۆر گەورەشی بە دوای خۆیدا هێنا، بەوەی (دوو) شۆڕش و بە (دوو) ئاراستەی جیا، كورد و كۆمەڵگای كوردی باشووری كوردستانی، كرد بە گژ بە یەكدا. لەلایەك (یەكێتیی نیشتمانیی كوردستان)، شۆڕشی گوڵانی بە كۆسپ بۆ بەردەم هەوڵ و هیواكانی زانی. تەنانەت بە (شۆڕشی چەواشە) ناوی هێنا، چونكە پێی وابوو، كە ئەگەر (پارتی دیموكراتی كوردستان) لە هەوڵی هەڵایسانی شۆڕشێكی تردا بوو؟ بۆ كۆتایی بە شۆڕشەكەی پێشوو واتە (شۆڕشی ئەیلول) هێناو درێژەی پێنەدا؟ یان ئەگەر ئەوان ئامادەبوون شۆڕشێكی تر دەست پێبكەنەوە، بۆ یەكسەر دوای ساڵێك و بە چەند ڕۆژێك بەر لە هەڵایسانی شۆڕشی نوێ بەو كارە هەستان؟ لەلایەكی ترەوە (پارتی دیموكراتی كوردستان)یش شۆڕشی نوێی بە كۆسپ و لەمپەر بۆ شۆڕشەكەی و پەرتبوونی كۆمەڵگای كوردی دانا.
كاتێكیش مێژووییانە بۆ وەڵامی ئەو پرسیار دەگەڕین، دەگەینە ئەوەی، كە هۆكاری شكستی شۆڕشی ئەیلول (پارتی دیموكراتی كوردستان)و سەركردەكەی (مستەفا بارزانی) نەبوون، بەڵكو ئەو رێكەوتنامە نێودەوڵەتییە بوو، كە شۆڕشی ئەیلولیان سنووردار كرد و كۆتاییان پێهێنا.
هەر چۆن بێت (شۆڕشی گوڵان) یان بەواتایەكی تر (شۆڕشی نوێ) لەكاتێكدا دەستیان پێكرد، كە باشووری كوردستان لە دۆخێكی سیاسی و سەربازی و كۆمەڵایەتی و ئابووری و فەرهەنگی گەلێك خراپدا تێدەپەڕی. بە بڕوای مێژوونووسان و شایەتحاڵەكانی سەردەمەكەش، بە دریژایی هەردوو قۆناغی مێژووی نوێ و هاوچەرخ هیچ كات كوردستان بە وەها دۆخێكدا تێنەپەڕی بوو. ئەوەش بەوەی شۆڕشێكی (چواردە) ساڵ تەمەن بە پیلانێكی هەرێمی و نێو دەوڵەتی لێبدرێت و ڕاستەوخۆ دوای شكستی ئەو شۆڕشە، باڵە كۆنەكەی مەكتەبی سیاسی ئەو هەلە بقۆزنەوەو بانگەشە بۆ ڕێكخراو و بەرنامە و هەڵایسانی شۆڕشێكی نوێ بكات؟ لەگەڵ هەموو ئەوانەشدا، ئەوە ڕوویدا، كە دەبوا ڕوونەدات.
بە كورتی (شۆڕشی گوڵان) وەك درێژەپێدەری (شۆڕشی ئەیلول) پەیامی خۆی گەیاندە جەماوەر و خەڵكە پەرتەوازەكە. گەیاندنی پەیامەكەشی چۆڵنەكردنی گۆڕەپانی باشووری كوردستان بوو بۆ تانك و دەبابە و فرۆكەكانی ڕژێمی بەعس و هەروەها چۆڵنەكردنی گۆڕەپانەكە بۆ ئەو ئەوانەی دەیانوویست بە گیانی تۆڵەوە كار بكەن. هەرچی (شۆڕشی نوێ)شە بانگەشەی بۆ ئەوە كرد، كە ئەو بە گیان و وورەیەكی نوێوە هاتۆتە مەیدان و چیتر بوار نادات، كە كوردی باشووری كوردستان، دووچاری شكستێكی وەك (شۆڕشی ئەیلول)و ئەو دۆخە نەخوازراوە بێت، كە دووچاری هات. لەكاتێكدا هەردووكیان، ئاڵای شۆرشیان بە باڵای خۆیان ئەدروو.
