ئێراق ئەمجارە بە وریاییەکی زۆرەوە، گرنگی بە هەڵبژاردنی ئەنجومەنی پارێزگاکان و چەسپاندنی سیستمی دیموکراسی پارێزگاکان و حوکمە خۆجێییەکان ئەدات و دەسەڵاتدارانی هەرێمیش خەریکە دەکەونە ناو ئەو هەرێزو پلانە مەترسیدارەوە!
سیستمی پارێزگاکان و حکومەتە خۆجێیەکان و کانتۆناتی بچوک بچوک و پەرت و بڵاو، خەون و گوتاری ناوەوەی شیعەگەرای زاڵ پێک دەهێنێت بۆ دوو مەبەست؛
یەکەم- پاراستنی یەکپارچەیی عێراق و ڕێگریکردن لە یاخیبوون و پەرتکردن و دروستنەبوونی هەرێمەکانی باشورو ناوەڕاستی ئێراق، سوننەو شیعەی ناڕازیی.
دووەم- لاوازکردنی حکومەتی فیدڕاڵی هەرێم و بەرگرتن لە دروستبوونی هەر جۆرە حکومەتێکی فیدڕاڵی نەتەوە جیاوازەکان چ لە ئێراق و چ لە ئێران و تەنانەت لە سوریاش خەریکی ئەو پلان و گەمەیەن و ناوی کوردو دەوڵەت و سەربەخۆییان سڕییەوە لە ئەزموونەکانی ڕۆژاڤاو وەک ناوچەی سوریای دیموکرات هەژماری دەکەن.
ئینجا بنەمای پارێزگاکان و مەدرەسەو کەلتورەکەی، نزیکە لە مەرجەعیەت و دەوڵەتانی شەرقی و دوورە لە خەباتی دیموکراسی و ئازادی فیدڕاڵیەتەکان و کۆنفیدڕاڵی و گوتاری سەندیکایی و دیدی نوێ، وەک ئەوەی لە ئەوروپاو ڕۆژئاوا هەیە.
دوور نییە سبەی بەهەمان ئەو یاسایانەی پارێزگاکانی ئێراق، هەرێمی کوردستان لە قاڵب بدەن و ناچاری بکەن بێتە ژێر باری یاسا مەرکەزیەکانی پارێزگاکان و بەکانتۆنکردن و وردە وردە پرسی فیدڕاڵیزم و دەوڵەت کاڵ بکەنەوە لە زیهنیەتی ئێراقیەکاندا بەرەو هەمواری دەستور، ئەوە سپیکردنەوەی دراوی ڕەشی ئایدۆلۆژییەو خواستێکی میللیگەراو سوڵتەویی نوێی حەشدو خولگەی ویلایەتی فەقیهە بە ئاراستەی سێنتراڵکردنەوەی بەغدا.
لە پڕۆژە یاسای بوجەی سێ ساڵەی ئێراقیشدا بینیمان، بە زۆرینەی پەڕلەمانیی، لە مادەکانی ١٢ و ١٣ و ١٤ کە تایبەت بوو بەهەرێمی کوردستان، بڕگەیەکی مەترسیداریان چەسپاند، ئەگەر پارێزگایەک شایستە داراییەکانی وەک پێویست پێ نەدرا، بۆیان هەیە داوا لەسەرۆکی حکومەتی فیدراڵ بکەن ڕاستەوخۆ پارە بۆ پارێزگاکە بنێرێت، ئەوە سەرەتای ئەو پلانە مەترسیدارە بوو بەرەو گەڕانەوە بۆ لامەرکەزیەتی پارێزگاکان.
