* لەدوای ڕیفراندۆمی ڕەوای گەلی کوردستان ئێراق و وڵاتانی هاوسێی هەرێمی کوردستان گەمارۆیەکی هەمەچەشنی ئابوری و سیاسی و دیبلۆماسی و ئاسمانیان خستە سەر هەرێمی کوردستان، بەڵام لەناوجەرگەی ئەو گەمارۆیانەداو لەنێو ئەو ڕۆژگارە تاریکەدا سەرۆک ماکرۆن لەکۆشکی ئیلیزێوە گورزێکی کەمەرشکێنی لەو گەمارۆیانەداو نێچیرڤان بارزانی سەرۆکی ئەوکاتی حکومەتی هەرێمی کوردستان و وەفدێکی باڵایی کوردستانی بانگهێشتی ئیلیزێ کردو لەوێوە دەلاقەکان لەسەر هەرێم کرانەوەو کۆتایی بە گەمارۆکان هات و کوردستان گەڕایەوە بۆ سەر مێزی گفتووگۆکان.
* لەدوای بڕیاری دادگای نێوبژیوانی پاریس تایبەت بە ڕاگرتنی فرۆشتنی نەوتی هەرێمی کوردستان جارێکی دیکە باشوری کوردستان کەوتوەتەبەر فشارگەلی جۆراوجۆرو هەر ڕۆژەو پیلانگێڕیەکی بەناوی دادگاو یاساوە دژ دەگێڕن و لەبری کارکردن بەدەستورو گەڕانەوە بۆ ئەو بنەمایانەی ئێراقی نوێی لەسەر بونیادنرا کەچی ئەوەتا نەک مافەکانی خۆی پێنادەن بگرە بەقەرزیش بەشی موچەی موچەخۆرانی کوردستان نادرێت و لەڕێگەی ئەم برسیکردنەوە دەویسترێت کۆتایی بەهەموو دەسەڵاتەکانی کوردستان بێنن وەک پارێزگایەک مامەڵەی لەگەڵدا بکەن کە ئەمەش ڕێک پێچەوانەی بنەماکانی ئەو دەستوریە کە هەموومان دەنگمان پێدا.
* پاریس بەئاگایە لەوەی چی لە ئێراق و ناوچەکە دەگوزەرێ و تێگەشتوە لەوەی ئەم لە قاڵبدانەی هەرێمی کوردستان و هەوڵی بچوکردنەوەی پێگەکەی لەڕووی سیاسی و وزەوە زیانێکی زۆر بە بەرژەوەندیەکانی ئەوان دەگەیەنێت، چونکە لەم بارودۆخەی شەڕی ئۆکرانیاو کەمی سەرچاوەی وزەدا بڕینی نزیکەی پێنج سەد هەزار بەرمیل نەوتی ڕۆژانەو لە ئایندەیەکی نزیکیشدا ئەو غازە بەرهەمهێنراوەی کوردستان کە ئەویش ڕێگری لێدەکرێت بێشک ئەم هەنگاوانە هیچ بۆ ئەورپیەکان مایەی دڵخۆشی نین لە هەوڵی ئەوەدان سەرچاوەکانی وزەی هەرێمی کوردستان بگەڕێتەوە بۆ بازاڕەکانی جیهان بەشێک لەو بۆشاییە پڕبکاتەوە کە جەنگی ڕوسیاو ئۆکرانیا دروستیان کردوە.
* سەرۆک ماکرۆن بەم پێشوازیە گەرمەی لە نێچیرڤان بارزانی سەرۆکی هەرێمی کوردستان دەیەوێت بە ئێراق و هاوسێکانی بڵێت سەرەڕایی ئەوەی فەڕەنساو جیهان سەرقاڵی دوو جەنگی گەورەی ڕوسیاو ئۆکرانیاو کەرتی غەزەو ئیسرائیلن، بەڵام پاریس دۆستەکانی لەبیر ناکات و ئەوان کوردستانێکی بەهێزیان لە چوارچێوەی ئێراقێکی یەکگرتوودا دەوێت، بێشک نایانەوێت ساحەی ئێراق بەیەکجاری چۆڵبکرێت و بدرێتە دەست نەیارەکانیان و هێندەی دیکە تەنگیان پێهەڵچنن و بەرژەوەندیە ئابوری و سیاسیەکانیان بکەوێتە بەردەم مەترسی لەناوچوون.
* ئەمە لە کاتێکدایە چینیەکان بە گڕوتینێکی نوێ هاتونەتە ناوچەکەو لە سعودیەو ئێراق کۆمەڵێک گرێبەستی جۆراوجۆریان بە ملیارات دۆلار ئەنجامداوەو لەساڵی ٢٠١١ ئەمریکاو ئەوروپیەکان ساحەی سوریایان بۆ یەکلایی نەبویەوەو لەبەرژەوەندی ڕاکبەرەکەیان ماوەتەوە کەچی شەڕی ئیسرائیل و غەزەشی هاتەسەرو وا خەریکە بەدەست بەتاڵی لەناوچەکە دەکرێنەدەرەوە بۆیە لەم چرکەساتەدا گرنگە بلۆکی سەرمایەداری هەنگاوی گرنگ و جدی بنێنن و پێگەی خۆیان زیاتر بەهێز بکەنەوە ئەگینا دژبەرانی ئەمریکاو ئەورپا وەختە کش مەلیکێکی گەورە دەکەن.
* ئیلیزێ جارێکی دیکە بەم پێشوازیە گەرمەی لە سەرۆکی هەرێمی کوردستان وێڕای هەموو ئەو تەوەرو بابەتانەی کە نێوەرۆکی کۆبوونەوەی هەرد سەرۆک بوون بە ئێراق وڵاتانی ناوچەکەشی وت هەرێمی کوردستان قابیلی بچوککردنەوە نیەو ئەم میوانداری پێشوازییە پرۆتۆکۆلیەی ئەمڕۆ هێزێکی گەورەی دیکەی بەهەولێر بەخشیەوەو ڕەنگە لە ئایندەشدا هەنگاوی دیکە دیبلۆماسی گرنگی لەم چەشنە لە کوردستان و وڵاتانی دیکەی دونیا ببینین.
