دژایەتیکردن و سەركوتكردن و لەناوبردنی كورد و وێرانكردنی گوند و شارەكانی كوردستان، مێژوویەكی درێژ و تاڵی هاوبەشی نێوان ئێمە و دەسەڵاتدارانی عەرەبی سوننەی ئێراقە، لەم مێژووە درێژ و تفت و تاڵەدا، ڕژێمە یەك لەدوای یەكەكانی ئێراق، لە یەكەمینیانەوە تا دەگات بە سەدام حسێن، چییان لەدەست هات بەرانبەر بە كورد كردیان جگە لە بڕینی مووچە و بودجەی خەڵك و شارە كوردستانیەكان. دوای لەناوبردنی ڕژێمی بەعس و سەدامی دیكتاتۆر و ئازادبوونی ئێراق، پێویست وا بوو كە ئەم وڵاتە لەسەر بنەما و پایەكانی ئازادی و دیموكراسی و دادپەروەری و لەگۆڕنانی جیاكاریی نەتەوەیی و ئایینی و مەزهەبی دابمەزرێتەوە، دەستوور دادوەری نێوان هەموان بێت، دەوڵەت دەوڵەتی هەموو پێكهاتەكان بێت لە زاخۆ تا بەسڕە، بەڵام ئایا وەها دەرچوو؟ بێگومان نەخێر وا دەرنەچوو، هەر زوو خەونی ڕەنگاوڕەنگی كورد بە ئێراقی فرەڕەنگ و ئازاد و دیموكراس و دادپەروەر كاڵ بووەوە.
سەرەتا بە ئینكاریكردنی مافەكانی كورد و چاوهەڵنەهاتن بەو پێشكەوتن و ئاسایش و ئارامییەی لە كوردستاندا هەبوو دەستی پێكرد، پاشان بڕینی بودجە، دواتر شەڕی داعش و ئینجا داگیركردنەوەی ناوچە كوردستانیەكانی دەرەوەی ئیدارەی هەرێمی كوردستان، تا ئێستاش دوژمنایەتیكردنی خەڵكی كوردستان درێژەی هەیە بەڵام بە فۆڕم و شێوازێكی نەرم و جیاواز. زیندانەكەی ئێراق بۆ كورد هەمان زیندانە بەڵام ئەوەی گۆڕاوە تەنیا شكڵ و شێوە و مەزهەبی جەللادەكەیە، جەللادی پێشوو عەرەبی سوننە بوو، لە زیندان بە گوللە یان لەژێر ئەشكەنجە یان پەتی سێدارە دەیكوشتین، بەڵام جەللادەكەی ئێستا عەرەبی شیعەیە و لە هەمان زینداندا دەمانكوژێت بەڵام بە شێوازی پێشوو نا بەڵكوو بە نانبڕین.
برسیکردنی خەڵكی کوردستان، هەمان سزا و دوژمنایەتیكردنی سەردەمی بەعسە، بۆیە دەبێ بزانین ئەم سزایە پەیوەندیی بە داتاكانی داهاتی ناوخۆ و نەوت و ئەو شتانەوە نیە بەڵكوو ئەمە ستراتیژی تواندنەوە و مەحفكردنەوەی كورد و قەوارە دەستوورییەكەیەتی، هیچ گومانی تێدا نیە كە لەم ستراتیژەدا ئێران ڕۆڵی كاریگەر و نەخشەسازی هەیە، شتێكی ئاشكرایە دوای ڕووخانی سەدام شتێك لە ئێراقدا نەما بە ناوی دەوڵەتی خاوەن سەروەری و خاوەن بڕیاری سەربەخۆ، ئەوەی هەیە درێژكراوەی دەوڵەتی ئێرانە، واتە ئێستا ئەم ئێراقە هەرێمێكی بن دەستی ئێرانە. مادام بەم جۆرە ئەجیندایەكی ئیقلیمی تەحەكوم بە ئێراقەوە دەكات و زۆربەی هێزە ئێراقی و كوردستانیەكانیش جگە لە پارتی و دوو سێ حزبی بچووك، هەموان بوونەتە بەشێك لەو سیاسەت و ئەجیندا و بەرنامەیە و هەموان بەتەواوی چوونەتە خزمەتیەوە، ئەوا دەبێ كورد و كوردستانویستان بەرنامە و پلانی ستراتیژی دابڕێژن بۆ بەرەنگاربوونەوە و دەرهێنانی كوردستان لە دەستی ئەم دوژمن و نەیارانە تا لەوە زیاتر هەوڵی لەناوبردنی هەرێمی كوردستان نەدرێت و ئیرادەی خەڵكەكەشی لەوە زیاتر لاواز نەكرێت.
ئەگەر ویژدان هەبێت ئەوە دان بەو ڕاستیەدا دەنرێت كە پارتی چەندین ساڵە لە ڕیزی پێشەوەی سەنگەری بەرگریكردندایە لە ماف و ئازادییەكانی خەڵكی كوردستان و هەر بەو جۆرەش دەمێنێتەوە، بەڵام پێویستە خەڵكی كوردستانیش بەتایبەت ئەوانەی تا ئێستا خۆیان یەكلا نەكردووەتەوە بێنە پێشەوە و لە مەیدانەكەدا بە دەنگی بەرز و بە كردەوە بەرگری لە ماف و ئازادییەكانی خۆیان و گەلەكەیان بكەن و چیتر وەك بینەری یارییەكی چارەنووسساز تەماشای شەڕ و ململانێی نێوان پارتی و بەرەی ئەنتی پارتی لە ئێراقدا نەكەن، تا هەموان لەگەڵ پارتی رێ لەو زوڵم و ستەمە زۆرەی داگیركەرانی كوردستان بگرین كە دژی خەڵكی كوردستان پێڕەوی دەكات. ئەگەر ئیرادەی خەڵك بەهێز بێت و خەڵكەكە بەو ئیرادە بەهێزەوە ڕووبەڕووی دوژمن و كێشە ناوخۆییەكانی كوردستان ببنەوە، ئەوە سەركەوتن وەك ڕۆژی ڕوناك دیارە و پیلان و هەوڵ و بەرنامەی دوژمنان لەگۆڕ دەنرێت و قۆناغە سەختە چارەنووسسازەكە پێكەوە تێدەپەڕێنرێت.
