“ڕووداوی هەكاری و قووڵكردنەوەی شەڕی ناوخۆ”
پ. بڕیاری كشانەوە لە هەكاری و ڕوودانی كارەسات
ئەو دۆخەی بەسەر هەردوو یەكەی دووەم و سێیەمی هێزەكانی یەكێتیدا هات لەناو خاكی ئێران و گەیشتنیان بە ناوچەی برادۆست، بڕستی لێ بڕین و شەكەتی كردن. هەربۆیە كاتێك بڕیاری چوونە نێو خاكی توركیایاندا، وەك چوونە ناو خاكی ئێران، زیانیان پێگەیشت. زیانەكەش لەوەوە سەرچاوەی گرت، كە ئەمجارەش بەلێنی كۆمیتەی سەركردایەتی بە هێزەكانیان پێچەوانە گەڕا، بەوەی بەڵینیان پێدرابوو، كە لەناو خاكی وڵاتی توركیادا رێكخراوی (دەدەكا-DDKA)ی كوردی پشتیوانیان دەكات و سەرباری رێنیشاندەریان بەناوی خاكی وڵاتەكەیاندا بۆ خاكی سووریا، خواردن و پێداویستی گەشتەكەیان بۆ دابین دەكات، بەڵام كاتێك گەیشتنە نێو خاكی باكووری كوردستانی بندەستی دەوڵەتی توركیا، نەك هەر ئەو ڕێكخراوە بەدەنگیانەوە نەهات، بەڵكو گوندنشینەكانی سەر سنوورو ناوچەی هەكاریش، هاوكاریان نەكردن. بەپیچەوانە بەشێك لە گوندنشینەكان هەواڵیان دایە یەكەكانی دەزگای میتی توركی ناوچەكانیان و بەو هۆیەوە، هێزەكانی سەر سنووری دەوڵەتی توركیا هاتنە سەریان و تۆببارانیان كردن. ئەمەو جگە لە ڕووبەڕووبوونەوەی هێزێكی كرێگرتەی دەوڵەتی توركیا بەناوی (هێزی شێخ موس)، كە ئەوانیش زیانی زۆریان پێگەیاندن.
هەروەها ئەو هێزەی سەركردایەتی كاتی پارتی، كە بە فەرماندەیی (سامی عەبدولڕەحمان)و بە یاوەری (کەمال کەرکوکی، وریا سەعاتچی، جەوهەر نامیق، کەریم سنجاری، حەمید ئەفەندی) چووبوونە ئەو ناوچەیە بۆ لێدانی هێزەكانی یەكێتی، ڕووبەڕوویان بوونەوە. ڕووداوەكەش كەوتە ناوچەی (بازێ) باکوری کوردستان. بەو هۆیەوەش هێزەكەی یەكێتی سەریان لێشێواو پەرتەوازە بوون. هەربۆیە بە نەشارەزایی و بەناچاری بەرەو گوندی (کەهی)ی نزیک شاری (جولەمێرگ) ڕۆیشتن. بێ ئەوەی بزانن بۆ كوێ دەڕۆن و بە كوێ دەگەن؟ دوای مانەوەشیان لەو گوندە بۆ ماوەی چەند ڕۆژێک، تا خۆیان ڕێک بخەنەوەو ڕووبەڕووی ئەو دۆخە ببنەوە، جارێكی تر كەوتنە بۆسەی هێزەكانی سەركردایەتی كاتی پارتی و ڕووبەڕووی شكستی گەورە بوونەوە. بەو هۆیەوەش بڕیاری كشانەوە درا، بەڵام دوای چی؟ دوای ئەوەی تەواوی هێزەكە پەرتەوازە بوون. بەشێكیان بە نەشارەزایی بەرەو ناوچە سنوورییەكانی باشووری كوردستان لەناوچەی بادینان كشانەوە. بەشێكیشیان خۆیان ڕادەستی هێزەكانی دەوڵەتی ئێراق كرد، كە ژمارەیان (176) پێشمەرگە بوو، كە لەنێو ئەواندا (117) چەكدار و (59) پێشمەرگەی بێ چەك هەبوون. ئەو بەشەشی ڕووبەڕووی شەڕ بوونەوە بە شكست لێ دەرچوون. تەنانەت چەند فەرماندە و پێشمەرگەیەكیان بە دیلی كەوتنە دەست پێشمەرگەكانی سەركردایەتی كاتی پارتی، لەوانە (عەلی عەسكەری، خالید سەعید، حوسێن بابا شێخ)و چەندانی تر. چارەنووسی ئەوانیش كوشتن بوو. بڕیاری كشانەوەی هێزەكان و ئەو ڕووداوانەش كەوتنە سەرەتایی مانگی حوزەیرانی ساڵی (1978).
لە كۆی هێزە پەڕێوەكەش بۆ ناوچەی هەكاری، تەنیا (170) پێشمەرگە ڕزگاریان بوو. ئەوەش كارەساتێكی كەم نەبوو، ئەو ژمارە زۆرە ببنە قوربانی یان بە دیلی بكەونە دەست هێزەكانی سوپای ئێراق. بەتایبەت دوای ئەوەی فەرماندەكانیان (عەلی عەسكەری، تاهیری عەلی والی بەگ، خالید سەعید، حوسێن باباشێخ) لە (٧ی تەمموزی1978ز) لەلایەن سەرکردایەتیی کاتی پارتییەوە بە چەکی (ئاڕ بی جی) كوژران.
ماوەتەوە بڵێین؛ ڕووداوەكە بە (كارەساتی هەكاری) تۆماركرا، لەكاتێكدا بەپێ بڕیاری كۆمیتەی سەركردایەتی یەكێتی، چوونی ئەو هێزانە بۆ ناوچەی برادۆست بوو، تا لەوێ جێگر ببن و ئەو ناوچەیە بۆ بارەگای نوێی سەركردایەتی یەكێتی بپارێزن، بەڵام چوونی ئەو هێزانە بۆ ناوچەی هەكاری، دەریخست، كە ئامانجی كۆمیتەی سەركردایەتی شتێكی دیكە بووە، وەك لە پێشتردا ڕوونمان كردەوە. هەربۆیە دواجار بە شكست لێ دەرچوون.
