ئەو ناونیشانەی سەرەوە کەس نیە پێی ئاشنا نەبێت، بەتایبەت لە نێو ئێمەی گەلی کورد، بە تایبەت تر لە باشوری کوردستان دا. برا کوژی یان شەڕی برا کوژی لە جیهان دا مێژوویەکی دورو درێژی هەیە کەم لە میلەتان و گەڵانی جیهان هەیە بەو قۆناغەدا تێپەڕ نەبوبێت، بە تایبەت لە قۆناغی ڕزگاری نیشتمانی و قۆناغەکانی ڕاگوزەرو یانەخۆ گۆڕین و دەستاودەستکردنی دەسەڵات ، جا لە ڕێگای کودەتا سەربازیەوە بوبێ یان هەر هۆکارێکی ترەوە، شەڕی ناوخۆو ڕشتنی خوێنی براکان وارد بوەو زۆربەی میلەتان بەتایبەت لەناو میلەتانی دواکەوتوو زۆر کەمن بەو پرۆسەیەدا ڕەت نەبوبێتن.
ئەگەر لە دۆخی باشوری کوردستان بڕوانین شەڕی براکوژی و خوێن ڕشتنی هاوخوێن و هاوزوبانی کوردی لەم دەڤەرەی کە دەکەوێتە باشوری کوردستانەوە،مێژویەکی دورو درێژی هەیە، کە برا هاوزمانەکانی خۆمان خوێنی یەکتریان نەڕشتبێ،جا ئەو شەڕە نەگریسەی براکوژی دەستی دەرەکی تیا بوبێت لە داگیرکەرانی کوردستان، یان هۆکاری سیاسی و کۆمەڵایەتی هەبوبێ،وەک دەبینین زۆربەی میرنشین و ئیمارەتەکانی کوردستان سەرەڕای بەهێزییان و خاوەنی نفوزی ناوچەی فراوان و بەهێزی دەوروبەری خۆیان بەڵام بە هۆی ناتەبای و شەڕی ناوخۆی و براکوژیەوە ناویان تەنها لە مێژوو ماوەتەوە، بەڵکو نەک ئەو ناتەباییەی ئەو دەسەڵاتدارە خۆجێیانەی ناوچەکەب براکوژی بە جۆرێک شۆڕبوتەوە بۆ خوارەوە زۆر کات لە نێوان عەشیرەتە گەورەکانی وەک جاف و زەنگەنەو کاکەی و هەمەوەند و …..هتد.
شەڕی براکوژی ڕوی داوەو خۆێنی چەندین کەسایەتی و لاوانی عەشیرەتەکان بە ناهەق ڕژاوە، کە سەرچاوەی ئەو شەڕو پەلامادانانە هۆکاری نانەوەی دوبەرەکی بوە کە دەستی دوژمنانی کوردی لە پشتەوە بوە، جگە لە هۆکاری کۆمەڵایەتی و باڵا دەستی دەسەڵات و دارایی بوە، کە پێشتر لە مێژوی سەدەکانی ڕابردوو گەلێک کارەسات بەرۆکی گەلەکەمانی گرتوەو ڕشتنی خوێنی براکان زیانی زۆری بە دۆزی گەلی کورد گەیاندوە.
بەڵام بە داخەوە کورد بەتایبەت لایەنە سیاسییەکان پەندیان لەو تاقیکردنەوە تاڵە وەرنەگرتوەو شەڕی برا کوژی هەر بەردەوام بوەو خوێن لە جەستەی کوردستان بە هۆی کوشتنی براکان چۆڕاوە، ئەگەر جاران شەڕی براکوژی زیاتر هۆکاری ئابوری و کۆمەڵایەتی بوبێت،شەڕی ئەمڕۆی سەردەمانی شۆڕشی کوردایەتی زیاتر شەڕی دەسەڵات و هەیمەنەی باڵادەستییە، جگە لەوەی دوژمنان و داگیرکەرانی کوردستان هەمیشە لە کەمین دا بونە بۆ ئەوەی کورد نەتوانێت برایەتی بپارێزێ و یەکڕیزی لە نێوانیان دا هەبێت، بەتایبەت دەبوایە لایەنە سیاسییەکانی کوردستان لە باشوری وڵات زیاتر لەو تاقیکردنەوە تاڵانە تەجروبەی هەبوایە و تەحریمی شەڕی براکوژی بکردایە بەڵام بەداخەوە خوێنێکی زۆری براکان لەو نێوەدا بە فیڕۆ ڕشێنران و ئێستاشی پێوە بێت لایەنە کوردیەکان لە ئاراستەکانیان دا بۆنی شەڕی براکوژی لە پەیامەکانیان دێت،وەک ئەوەی درکیان بەو ڕاستییە نەکردبێت ئەگەر ئەو تواناو خوێنەی لە شەڕی براکوژی بە ناهەق ڕشتویانە، گەر لەبەرامبەر دوژمنان و داگیرکەران بیاندایە ئێستا دۆخی کورد جۆرێکی تر دەبوو، بەڵام ناتەبایی و چەند گوتاری و فرەڕەنگی لایەنە سیاسییەکان ئەوەندەی ئەجیندای داگیرکەرانی کوردستان جێبەجێ دەکات چارەکی ئەوە خزمەت بە کوردستان و پاشەڕۆژی دۆزەکەی ناکات.
