ئەمریکا هێشتا بەشار ئەسەدی هێشتۆتەوە لەبەر دڵی ئێران و ئەو خێڵە شیعەگەرییەی دەوری خێزانی ئەسەدیەکان کە عەلەوین و ئەوەش پێی دەوترێت عەقدی درێژخایەن. بزوتنەوەی تاڵیبانی دەیان ساڵ لە گۆڕەپانەکە دوور خستەوەو تاڵیبانێکی بە ڤیژنی نوێ له 15ی ئابی 2021 هێنایەوە سەر حوکم ئەوەش پێی دەوترێ فشارو گرێبەست.
کورد لە ئێراقدا نەفەس درێژانە دەبێت مانۆڕ بکات لەگەڵ پرسە گەرمەکاندا بۆ مانەوەی خۆی و هەڵچوون و توڕەبوون دادی نادات لەنێوان پشتگیری بەلاش بۆ ئەمریکاو دژایەتی هەرزان بۆ بەرەی موقاوەمەی شیعە چونکە هیچ گرێبەستێکی نیە. قەوارەی هەرێم لەبەردەم دۆخێکی ناسکدایە کەدۆخی غەزەب و فەتوای مەزهەبی و رایسیزمی شیعیەگەرییە نەک ئێرانی، ئێران زیرەکانە گۆڕەپانەکە بەکاردەهێنێت بۆ سودی خۆی و ئاسایشی نەتەوەیی، مجمع تشخیص مصلحت نظام ئەوە دەکات، چونکە دەوڵەتە، بەڵام هێشتا نایەوێ ئێراق دەوڵەتیانەترو مۆدێرنتر لەخۆی دەربکەوێ و یاری زیرەکانە بکات و پڕیکردوە لە کەتیبەو فیرقەو گروپی توندڕەوی چەکدار، بۆیە ئەو گروپە مەزهەبیانەی ئێراق خۆیان بە خاوەنی خاکی هەرێم دەزانن و داوای هەڵوەشانەوەی دەکەن و درۆن بارانی دەکەن بەهۆی داڵدەی ئەمریکیەکانەوە نییە بەتەنها، پرسەکە پرسی ختوکەدانی مەزهەبیشەو هاوپەیمانێتی کوردە لەگەڵ ئەنکەرەو دەوحەو ڕیاز، ئینجا کوردیش هەرزان خاکی خۆی دەخاتە بەردەست ئەویتر، ئەوەی شیعە لە ئێستا دەیگرێتەبەر سیاسەتی میدیایی و میلیشیاییە بۆ فشار نەک دەوڵەتیانە، قوتت نادەن، تۆش وەک کورد شەڕی دەستوریی بکەو سەرۆک کۆمارو مەندوب و وەزیرو پۆستت هەیەو خۆت بەخاوەنی بەغداو بەسرەو نەجەف بزانەو هەرێمی بەسرە بخەرە ڕۆژەڤ و وروژاندنی میدیایی بۆ بکەو مەترسە لە مانۆڕی سیاسی وەک قادسیەو ئومولمەعاریک و هەڕەشەکان.
دەرکردنی هێزی هاوپەیمانان بەتایبەت سەربازانی ئەمریکا بڕیاری پەرلەمانی بۆ دەرچوەو یاساییە لە ٥-١-٢٠٢٠ دەنگی بۆ دراوە ڕێک دوو ڕۆژ دوای بە ئامانج گرتنی کوژرانی قاسم سولەیمانی و ئەبوو مەهدی موهەندیس، گەرچی ڕێککەوتنی سیاسی واژوکراویش هەیە لەنێوان نوری مالیکی و هێزە ئەمریکیەکان لە ساڵی ٢٠٠٨ بۆ مانەوەی هاوپەیمانان، بەشێکی ئەرکانی عەقدیش ئیلتیزامە «العقد مصدر من مصادر الالتزام» کەواتە دۆخەکە یاسایی و عەقدی و پابەندیەو ئەمریکا دەبێت خۆی چارەی بکات نەک کورد، چارەشی دەکات.
