تا ئێستا ڕوون نییە، گەڕانەوەی (مام جەلال) وەك سكرتێری گشتی یەكێتیی نیشتمانیی كوردستان بۆ گفتوگۆ لەگەڵ حكومەتی ئێراق، ناچاری بوو یان تاكتیك، بەڵام ئەوە زانراوە، كە دواجار شكست بە گفتوگۆ هات. ئەوەشی مێژووی ئێراقی خوێندبێتەوە، زۆر باش دەزانێت، كە كۆی گفتوگۆكانی نێوان دەسەڵاتدارانی ئێراق و كورد، هەمیشە بێ ئەنجام و كۆتاییەكەی شكست بووە. هەربۆیە كۆتایی ئەو گفتوگۆیانەش بێ ئەنجام بوو. بەو ڕووداوەش (دوو) رێگا لەبەردەم یەكێتییدا هەبوو، یان گەڕانەوە بۆ چیا و درێژەدان بەو خەباتەی لەساڵی (1975ز) كاری لەسەر كرد بوو، یان گەڕانەوە بۆ لای كۆماری ئیسلامی ئێران و قبوڵكردنی ئەو مەرجانەی بەسەریدا ئەسەپێنرا. ڕێگای یەكەم سەخت و دژوار بوو، چونكە دەرچوون لە گفتوگۆیەك بە شكست، نەك هەر دەبوا ڕووبەڕووی كاردانەوە سەختەكانی حكومەت و دەوڵەتی ئێراق ببێتەوە، بەڵكو دەبوا ڕووبەڕووی كۆماری ئیسلامی ئێرانیش بێتەوە، كە دەسەڵاتی تەواوی بەسەر كۆی سنوورەكانی لەگەڵ دەوڵەتی ئێراق و پارت و ڕەوتە كوردییەكانی باشووری كوردستاندا هەبوو. هەروەها دەبوا ڕووبەڕووی پارت و ڕەوتە كوردە نەیارەكانی بكاتەوە. بەوەش دەبوا شەڕی (دوو) دەوڵەت و چەندین پارت و ڕەوتی كوردی بكات. هەرچی رێگای دووەمە، نەك هەر شەری كۆماری ئیسلامی ئێرانی لە كۆڵ دەبوویەوە، گوند و ناوچە سنوورییەكانی بۆ واڵا دەكرا، تا باشتر شەڕی هێزەكانی سوپای ئێراق و نەیارەكانی بكات. ئەمەو هەر لەو رێگایەشەوە، بیر لە ئاشتەوایی بەرەی جودیش بكاتەوە، ئەو كات تەنیا حكومەت و دەوڵەتی ئێراقی لەبەرامبەر بوو، تا شەڕی بكات. هەربۆیە گەڕانەوەی بۆ ئێران باشترین بژاردەی ئەو قۆناغە بوو.
لەنێو ئەو دۆخەدا یەكێتیی لە رێگای دۆستەكانی لەنێو بەشێك لە پارت و ڕەوتە كوردییەكانی باشووری كوردستان و هەروەها لە رێگای دەوڵەتی سوریاوە، كە هاوپەیمانی كۆماری ئیسلامی ئێران بوو، بیرۆكەی نزیكبوونەوە لەو دەوڵەتە كردە كاری سەرەكی. بۆ سەركەوتنی ئەو كارەش، دەستی بە كۆمەلێك جوڵەی سیاسی كرد. هەر لە پەیوەندیكردن بە چەند بەرپرسێكی سیاسی و سەربازی ئەو دەوڵەتە و ناردنی نامەی تایبەت بۆیان، تا بە هاندانی پارت و ڕەوتە عەرەبییەكانی هاوپەیمانی و نزیك لە ئێران. سەیریش ئەوە بوو، كە كۆماری ئیسلامی ئێران، سەرباری ئەوەی شەڕی دەوڵەتی ئێراقی ئەكرد، دەبوا كۆی هێز و پارت و ڕەوتە كوردییەكانی نەیار بەو دەوڵەتە لە خۆی نزیك بكاتەوە. كەچی لەو بوارەدا زۆر پشوو درێژ و ئارام و خۆڕاگر بوو. بە ئاستێك، تا پێویست نەبوو، كاری وای نەكرد. هەربۆیە تا سەرانی یەكێتیی و لەسەروویانەوە (مام جەلال) وەك سكرتێری گشتی ڕووی لەو دەوڵەتە نەكرد، ئێرانییەكان ئەو كاریان نەكرد. بەو هۆیەش ماوەی گەڕانەوەی یەكێتی بۆ لای كۆماری ئیسلامی ئێران نزیك بە ساڵێكی خایاند. لەو ماوەیەشدا لەسەر ئاستی خوارەوەو مام ناوەند، كۆبوونەوەی نهێنی و لابەلا لەنێوان سەرانی كۆماری ئیسلامی ئێران و بەرپرسانی یەكێتیی ئەنجام دراو چەندین دانیشتن و گفتوگۆ لەنێوانیاندا ڕوویدا. دواجار بابەتەكە گەیشتە سەرانی باڵادەستی كۆماری ئیسلامی ئێران لەسەر ئاستی وەزارەتەكانی جەنگ و ناوخۆ و ئیتڵاعات و بەرپرسە باڵاكانی سوپای پاسداران، تا بە (ئایەتوڵڵا خومەینی) رابەری شۆرشی ئیسلامی ئێران ئەگات. دواجار حكومەتی ئێران بۆ سەلماندنی نیازپاكی سەرانی یەكێتیی، داوای لێكردن چالاكییەكی پارتێزانی لەگەڵ یەكەیەكی سوپای پاسداران لەناو خاكی ئێراق ئەنجام بدەن. دوای چەندین كۆبونەوەی نهێنی و ئاشكرا، دواجار داواكەی حكومەتی ئێران قبوڵكراو بڕیار لە لێدانی بیرە نەوتەكانی كەركوك درا.
ئەنجامی ئەو چالاكییە هاوبەشەش كەوتە (10ی تشرینی یەكەمی1986ز). ئەوەش كاتێك لە (8ی تشرینی یەكەم) چەك و تەقەمەنی و پێداویستی جەنگی و ئازوخە لەناو خاكی كۆماری ئیسلامی ئێرانەوە بەرەو ناوچەی سنوورییەكان و سنووری پارێزگای سولەیمانی گوازرانەوەو لە گوندی (خاڵخالان) جێگیر كران. دواتر لەوێوە ڕەوانەی سنوروی پارێزگای كەركوك كران. لە چالاكییەكەشدا (3000) پێشمەرگەی یەكێتی لەگەڵ (150) پاسداری ئێرانی، كە چەندین شارەزایی سەربازی و ئاسایشی و هەواڵگری و تەكنیكی و كیمیایی و نەوتی بەشداریان تێدا كرد. دواتر لە (سێ) قۆلەوەو لە سنووری پارێزگای كەركوك و لە شوێنی تایبەت جێگیر كران. قۆلێك بە فەرماندەیی (شەوكەتی حاجی موشیر)و قۆلێكی تر بە فەرماندەیی (ئازاد حەمەغەریب)و قۆلی سێیەم بە فەرماندەیی (نەوشیروان مستەفا ئەمین)، كە ئەركی سەرپەرشتیكردنی (دوو) قۆلەكەی تر و كۆی چالاكییەكەی لە ئەستۆ بوو. كۆی ئەو هێزانەش بە چەندین چەكی سوكی وەك (كلانشیكۆف و ڕومانە)و چەكی قورسی وەك (هاونی 120ملم، كاتیوشا، ساروخی سامی دژە فڕۆكە، سارۆخی دژە تانك) پشتیوانیكران و لە چەند شوێنێكی نزیك شاری (كەركوك) جێگركران و دواجار كێڵگەی نەوتی باباگوڕگوڕ، درایە بەر هێرش و زیانێكی زۆریان پێگەیاند. بەو چالاكییەش سەرانی كۆماری ئیسلامی ئێران متمانەیان بە یەكێتیی كرد و لاپەڕەیەكی نوێیان لەگەڵ كردنەوە.
ئەو ڕووداوەش چەندە بۆ كۆماری ئیسلامی ئێران سەركەوتن و بۆ یەكێتیی ڕازیكردنی ئەو دەوڵەتە و زیان بوو بۆ دەوڵەتی ئێراق. لێدانی پێگەی ئابووری ناوچەیەكی خاكی باشووری كوردستان بوو.
