لە کاتێکدا حکوومەتی هەرێمی کوردستان بە هەنگاوی دڵنیایی و ستراتیژییەوە بەرەو قۆناغێکی نوێی سەقامگیریی سیاسی و بووژانەوەی ئابووری هەنگاو دەنێت، دەستە ڕەشەکان جارێکی تر دەیانەوێت بە ئاگری کینە و دوژمنایەتی، ڕێگری لەم کاروانە بکەن. هێرشەکەی شەوی ڕابردوو بۆ سەر کێڵگەی غازی کۆرمۆر، بەس پەلامارێک نییە بۆ سەر دامەزراوەیەکی وزە، بەڵکو کاردانەوەی راستەوخۆی نەیارانە بەرامبەر بەو سەرکەوتنە گەورانەی کە حکوومەت لەسەر ئاستی ناوخۆیی و دەرەکی بەدەستی هێناون.
ئەوەی ئەمڕۆ لە هەرێمی کوردستان دەگوزەرێت، شۆڕشێکی خزمەتگوزارییە. حکوومەتی هەرێمی کوردستان هەنگاوی گەورەی نا بە دابینکردنی کارەبای ٢٤ کاتژمێری، کە خەونێکی لەمێژینەی هاووڵاتیان بوو و بووە واقیع.
کێڵگەی کۆرمۆر وەک سەرچاوەی سەرەکیی بەگەڕخستنی وێستگەکانی کارەبا، بڕبڕەی پشتی ئەم پڕۆژە نیشتمانییەیە. بۆیە، ئەم هێرشە هەوڵێکی نەزۆکە بۆ ئەوەی هەرێم لە تاریکیدا بهێڵنەوە و ڕێگە لە خۆشگوزەرانی خەڵک بگرن. ئەوانەی چاویان بەم پێشکەوتن و ئاوەدانییە هەڵنایێت، دەیانەوێت بە تێکدانی ژێرخانی ئابووری، کینە و دڵی ڕەشی خۆیان دەربخەن.
ئەم هێرشە لە هەر لایەک و بە فەرمانی هەر کەسێک کرابێت، خیانەتێکی گەورەیە لە خاک و خەڵکی هەرێمی کوردستان. کردەوەیەکی ترسنۆکانەیە، چونکە بەئامانجگرتنی سەرچاوەی وزە و ژیانی خەڵک، نیشانەی ئیفلاسی ئەخلاقی و سیاسیی ئەنجامدەرانیەتی.
ئەوان کاتێک دەبینن ناتوانن لە مەیدانی سیاسەت و بنیاتناندا کێبڕکێی حکوومەتی هەرێم بکەن، پەنا بۆ مووشەک و درۆن دەبەن بۆ تێکدانی ئاسایش.
بەڵام مێژوو سەلماندوویەتی کە ئیرادەی گەلی کوردستان و حکوومەتەکەی لەم پیلانانە بەهێزترە. پێشتریش چەندین جار و بە شێوازی جیاواز ئەم فشارانە کراون، هەوڵ دراوە لە ڕێگەی ئابڵووقە و هێرشی سەربازییەوە ئەژنۆ بەم هەرێمە دابدەن، بەڵام هەموویان شکستیان هێناوە و هەرێمی کوردستان هەر بە پێوە ماوەتەوە.
دەنگی تەقینەوەکان ناتوانن دەنگی ئاوەدانی کپ بکەن. ئەم هێرشە نەک هەر ساردی ناکاتەوە، بەڵکو حکوومەت و خەڵکی کوردستان پێداگرتر دەکات لەسەر پاراستنی دەستکەوتەکان و بەردەوامبوون لەسەر پرۆژەی دابینکردنی کارەبای بەردەوام و گەشەپێدانی ژێرخانی ئابووری. ڕووناکیی کوردستان بە بای دوژمنان ناکوژێتەوە.
سزادانی تووندی بکەرەرانی ئەم هێرشە ترسنۆکانەیە و ئاشکرا کردنی دەستی ڕەشی هێرشکاران، ئەوکاتە گومانەکان کەمدەکاتەوە لەسەر ئەوانەی تا ئێستاش بە ئاشکرا دژایەتی حکوومەتی هەرێمی کوردستان، دەنا ئەوکات لای هەمووان ڕوون و ئاشکرا دەبێت، کە کێن ئەوانەی خائینانە و ترسنۆکانە دژایەتی پێشکەوتنەکانی هەرێمی کوردستان دەکەن.
