بۆ مرۆڤێک بیەوێت تێبگات دەمێکە ڕوون بوەتەوە کە بڕینی بەشە بوودجەو موچەی هەرێمی کوردستان جەنگی برسیکردنەو ڕێگایەکە بۆ تەسلیم بوون و کۆتاییهێنان بەو تەنها هەرێمە فیدراڵیەی لە ئێراقی دوای ڕژێمدا بوونی هەیەو گەڕانەوەیە بۆ دەوڵەت مەرکەزیەکی مەزهەبی.
ئەمڕۆ زیاد لە یازدە ساڵە حکومەتی ئێراق بەبێ هەبوونی هیچ پاساوو هۆکارێکی دەستوری و یاسایی قوتی خەڵکی کوردستانی بڕیوەو لەو ماوەیەدا بەم ڕێگایە ویستوویەتی و دەیەوێت کۆتایی بە چیرۆکی سەرکەوتنی ئەزمونی کوردستان بهێنێت و ئەو پێشکەوتنانە ڕاگرێت کە لە هەرێمی کوردستان هەیە، دەیانەوێت ئەوەی کە ڕژێمەکانی پێشوو بە بۆمب و تانک و کیمیاباران و ئەنفال پێیان نەکرا ئەمان بەبرسیکردن بیکەن بۆ ئەمەش بە داخەوە داردەست و مەقاشیان لە ناو کوردستاندا زۆرەو جیهانی شوشە بەندی میدییاو سۆشیاڵ میدیاش ڕەوشێکی وەهایان دروستکردوە کە قسەی ناڕاست و ئیرهابی فیکری گوێلێگیراوترون و بازاڕی قسەی ناڕاست گەرمترە تا هەقیقەت.
لەم نێوەندەدا دۆستەکانی خەڵکی کوردستانیش وەک پێویست ڕاستگۆو پاڵپشتی کوردستان نەبوون و لە زۆر وێستگەی حەساس و گرنگدا بەتەنها جێیانهێشتین، وەک ١٦ی ئۆکتۆبەرو کاتی بڕیاری دادگای ناوبژیوانی پاریس بۆ ڕاگرتنی هەناردەکردن و فرۆشتنی نەوتی کوردستان، ئەگەرچی هێزی پێشمەرگەی کوردستان بەنوێنەرایەتی هەموو ئازادیخوازانی جیهان جەنگی دژی داعشی کردو چیرۆکی سەرکەتنی نوسیەوە مەخابن هەرزوو ئەو هێزەیان بەتەنها جێهێشت و بەهەمان تانکەکانی ئەوان هێرش کرایەوە سەر کوردستان پێشمەرگەو ئەو یازدە ساڵیشە ئەو گەلە برسی دەکرێت کە ماڵەکانی خۆیان کرد بە پاناگە بک ئاوارە لێقەوماوانی ناوچەکە.
لەماوەی ئەم یازدە ساڵەدا هەموو هێزی خۆیان بۆ ڕاگرتنی ئاوەدانی و تێکدانی ئارامی کوردستان بەکارهێنا وەلێ هەرێمی کوردستان بە سیاسەتێکی حەکیمانە وەڵامی هەموو ئەو پیلانگێڕیانەی دایەوەو ڕووبەڕووی هەموو هێرش و پیلانگێڕیەک بویەوە، ئێستاش ئەوەتا دەبینین ڕۆژانە چیرۆکی سەرکەتن دەنوسینەوەو کاک مەسرورو کابیمەکەی هەفتانە یا بەردی بناغەی پرۆژەیەک دادەنێن یاخود پرۆژەیەک دەکەنەوە پێشکەشی خەڵکی کوردستانی دەکەن لەسەرجەم سێکتەرە جیاوازەکاندا، بێگوامن ئەمەش بەرهەمی خۆڕاگری خەڵکی کوردستان و دەسەڵاتەکانیەتی.
ئەم جەنگی برسیکردن و پەلاماردان و پیلانگێڕیانە هەر ئامانجێکی لەپشتەوەبێت هیچ لەو ڕاستیە ناگۆڕێت کە خەڵکی کوردستان و حکومەت و دەسەڵاتداریەتەکەی خاوەنی قەزیەیەکی ڕەواو سەوابتی نەگۆڕەو بۆ هیچ فشارو زەختێک سازش و پاشەکشە لە ئامانجەکانی ناکات و چیرۆکی سەرکەوتن و ئاوەدانی ئێمە بەردەوام دەبێت و ئیرادەی پۆڵاینی کوردستان جەنگی ئیرادەش وەک جەنگی داعش دەباتەوە.
