* ماوەی چەندڕۆژێکە جیاواز لە جارەکانی پێشوتر هێرشە تیرۆرستیە درۆنیەکان بۆ سەر هەرێمی کوردستان زۆر زیادی کردوەو جیاوازی هێرشەکانی ئەمجارە ئەوەیە کە ژێرخانی وزەی و نەوتی هەرێمی کوردستانی کردوەتە ئامانج بێشک ئامانج لەم هەنگاوەش ڕوونە بۆ پەکخستنی کەرتی وزەو سەرچاوەی داهاتی ئەم هەرێمەیە.
* ئەم درۆنبارانە درێژکراوەی ئەو هەنگاوانەیە کەنزیکەی یازدە ساڵە حکومەتەکانی ئێراق دژی هەرێمی کوردستان گرتویانەتەبەر، ئەگەر ئەوێ ڕۆژێ ڕێگەیان نەدەدا کەشتیە نەوتیەکانی هەرێم بچنە بازاڕەکانی وزەوەو بفرۆشرێن ئێستاو پاش ڕاگرتنی فرۆشتنی نەوتی هەرێم بە شەکوای حکومەتی ئێراق لە دادگای پاریس خەریکی درۆنباران و وێرانکردنی ژێرخانی وزەو نەوتی هەرێمی کورسستانن بۆ ئەوەی هەتا ماوین هەر میللەتێکی برسی و چاو لەدەستی ئەوان بین و وەک دەرۆزەکەر بژین.
* باشترین پاڵپشت بۆ ئەم ڕایەی من ئەم کۆتا ڕێککەوتنەی نێوان هەرێم بەغدایە کە حکومەتەکەی سۆدانی مەرجی سەرەکی ناردنی مووچەو بوودجەی هەرێمی کوردستانی بەستوەتەوە بە ژمارەی ئەو بەرمیلە نەوتانەی هەرێم بە کۆمپانیای سۆمۆی دەدات بۆ فرۆشتن و وەبازاڕخستنی کەوابوو دەرکەوت نەوت و کەرتی وزە خاڵێکی بەهێزی هەرێمی کوردستانەو خۆڕاگری هەرێمی کوردستان بۆ تەسلیم نەکردنی بێ مەرج و قەیدی ئەم کەرتە بە بەغداد خاڵێکی گرنگ و جێگەی دەستخۆشیە.
* هاوزەمان لەگەڵ ئەم درۆنبارانەی سەر هەرێمی کورستان هێزە چەکدارەکانی ئەحمەد شەرع لە سوریا پەلاماری پارێزگای سوەیدای دەروزنشینیانداو لەگەڵ کۆنترۆڵکردنی هەر گوندو جێگایەک دەستدرێژیان کردە سەر دانیشتوانی ئەو جێگایانەو وێڕای تاڵانی ماڵ و سامان و ماڵات و پەلەوەرەکانیان سوکایەتیان بە ڕەمزە ئاینیەکانیان کردن و شواربی پیرو گەنجیان تاشین و لەمیدیاو سۆشیاڵ میدیاوە بەشانازیەوە بڵاویان کردەوە کە دیمەنێکی زۆر ناشارستانیەو ڕەوشتی گروپە تیرۆرستەکانیان نیشانی جیهاندا.
* بەڵام جیاوازی درۆنەکانی سەر ئێمەو هێرشەکانی سەر دەروزەکان لەوەدایە کە ئەوان دۆست و هاوپەیمانەکانیان زۆر دڵسۆزو ڕاستگۆ بوون و نەیانهێشت جینۆسایدی دەروزەکان بەردەوامبێت و کۆشکی سەرۆکایەتی کۆماری ئەحمەد شەرع و وەزارەتی بەرگری سوریاو زۆر جێگەی دیکەیان بۆردومان کردو وێرانیان کردن تا کار گەشت بەوەی کە سوپامیلیشیایەکەی شەرع سوەیدایان چۆڵکردو شەرع بەزۆری فڕۆکەکانی ئیسرائیل ناچاربوو ناوچەکە تەسلیمی هێزی دەروزەکان بکات و پاشەکشەیان کرد.
* بەداخەوە بەدرێژایی مێژوو لەبەختی ڕەشی ئەم میللەتە هەرگیز ئێمە دۆست و دڵسۆزو هاوپەیمانێکی وەهامان نەبوە کە ئاوها گەرماوگەرم لەسەرمان وەجواب بێت، وێڕای جینۆسایدو ئەنفال و کیمیابارانی ساڵانی ڕابردوو کە جیهان زۆر بێ مۆراڵانە هیچی نەوت و لەسەرمان نەهاتەجواب ئەوەتا ئێستاش بە بەرچاویانەوە ڕۆژانە بەفڕۆکەی بێفڕۆکەوان پەلاماردی شادەماری ئابووریمان دەدەن و میللەتەکەمان برسی دەکەن کەچی یەک دەوڵەت لەسەرمان بەجواب نایەت و هیچ دەوڵەتێک هەڵوێستێکی توندو پێویستی بەرامبەر گروپە میلیشیایەکان نەگرتەبەر، ئەمە لەکاتێکدایە کە بەشێک لەم دەوڵەتانە بەتایبەت ئەمریکا لەکەرتی وزەی هەرێمی کورستاندا بەرهەمهێنانی گەورەیان هەیەو بێشک هێنانی کۆمپانیا گەورەکانی جیهانیش بۆ کەرتی وزە لەلایەن حکومەتی هەرێمی کوردستانەوە بۆ ئەوەبوە لەکاتی پێویستدا لەسەرمان وەجواب بێن
بەداخەوە ئەو پاڵپشتی و بەدەمەوە هاتنەمان نەبینی بە مەرجێک هەر دوێنێ بوو سەرۆک وەزیران مەسرور بارزانی گرێبەستێکی گەورەی زیاد لە سەدملیارد دۆلاری لەگەڵ واژۆکردن ئەم پێدراونە پێمان دەڵێن باشترین کارتی ئێمە یەکڕیزی و تەبایی خۆمانە نەک دانیشتن بەدیار دۆستی ناڕاستگۆوە.
