“گفتوگۆی (یەكێتیی نیشتمانیی كوردستان) لەگەڵ حكومەتی ئێراق”
هۆكارەكانی گەڕانەوەی (یەكێتیی نیشتمانیی كوردستان) بۆ گفتوگۆ
ا. هۆكارە تایبەتەكان
لەسەر هۆكارەكانی گەڕانەوەی (یەكێتیی نیشتمانیی كوردستان) بۆ لای حكومەتی ئێراق و گفتوگۆكردن لەگەڵی، زۆر وتراوە و زۆریش نووسراوە. هەر لە بۆچوون و بیرەوەری “مام جەلال” وەك سكرتێری گشتی ئەو حیزبەو بۆچوون و بیرەوەری سەركردەو كادیر و پێشمەرگەكانی، تا بە بۆچوونی دۆست و نەیارەكانی دەگات، بەڵام بەهەمووشیان ڕیشەی هۆكارەكانی ئەو گەڕانەوەیان نەخستۆتەڕوو. ئەوەش بێ هۆكار نەبووە، چونكە هەریەك لەوان لە دیدگای تایبەتی خۆیانەوە بۆ ئەو ڕووداوەیان ڕوانیووەو بۆچوون و بیرەوەری خۆیان گێراوەتەوەو هۆكارەكانیان خستۆتەڕوو، بەڵام سەرباری ئەوەش چەندین هۆكاری تر هەبوون، كە تیشكیان نەخراوەتەسەر.
لەلای خۆشمانەوە، وەك شایەتحالێكی سەردەمەكەو ئەو ڕووداوانەی لەكاتی خۆیدا بە چاوی خۆمان بینیمان، یان وەك ووتار و بۆچوون نووسران و شرۆڤە كران، تا بەو چاوپێكەوتنانە ئەگات، لەگەڵ كەسانی وابەستە بەو ڕووداوە ئەنجام دران، گەیشتینە ئەوەی، كە چەندین هۆكاری تر لە پشت ئەو ڕووداوەوە بوون. یەكەمین هۆكاری تایبەتیش وابەستە بوو بە ڕۆڵی “دكتۆر عەبدولڕەحمان قاسملۆ” سكرتێری گشتی حیزبی دیموكراتی كوردستانی ئێران. ناوبراو سەرباری ئەوەی پەیوەندییەكی مێژوویی لەگەڵ “مام جەلال” سكرتێری گشتیی یەكێتیی نیشتمانیی كوردستنان هەبوو، وە وەك (دوو) هاورێ مامەڵەیان ئەكرد، پەیوەندییەكی بەهێزیشی لەگەڵ (سەدام حوسێن) سەرۆك كۆماری ئێراق هەبوو، بۆیە نزیك كردنەوەی هەردووكیان، كارێكی ئەستەم نەبوو. ئامانجی ناوبراویش سەرباری ئەوەی دەیویست چاكەیەك لەگەڵ حكومەتی ئێراق و سەرۆكەكەی بكات، تا نیاز پاكی خۆی و پارتەكەی نیشان بدات، لەهەمانكاتدا دەیویست بەو كارەی چاكەی پشتیوانی دەوڵەت و حكومەتی ئێراقیش بداتەوە، كە لە شەڕەكانیدا لە دژی كۆماری ئیسلامی ئێران، نەك هەر داڵدەی هەزاران پێشمەرگەو كادیرو خێزان و بنەماڵەی پارتەكەی لەناو خاكی ئێراقدا، پشتیوانی چەك و تەقەمەنیشی بۆ شەڕەكانی لە دژی دەوڵەتی ئێران كردن.
ئەمەو دەرگای وڵاتی ئێراقی بە ڕووی جیهاندا بۆ خستنە سەر پشت، تا لەوێوە بە دونیای دەرەوە بگەن و دەنگی كوردی ئێران و پارتەكەی بە دۆست و نەیارەكانی بگەیەنن. لەلایەكی دیكەوە مافی خۆشی بوو، هێزێكی تری نەیار بە ئێران بۆ بەرەكەی زیاد بكات و لەلایەن حكومەتی ئێراقەوە پشتیوانی بكرێت، تا باشتر دژایەتی كۆماری ئیسلامی ئێران بكات. لەبەرامبەردا متمانەی خۆی و پارتەكەی لای سەرۆكی ئێراق و حكومەتەكەی زیاد بكات، هەروەها چاكەیەكیش لەگەڵ یەكێتیی و “مام جەلال”ی هاورێی تەمەنی بكات، بەوەی لەو دۆخە سەختەدا بە هانایەوە دێت و لەگەڵ حكومەتی ئێراق، ئاشتنیان ئەكاتەوە. ئەوەش لەپای ئەو چاكەیەی بەر لە چەند ساڵێك (یەكێتیی نیشتمانی كوردستان) لە پشتی (حیزبی دیموكراتی كوردستانی ئێران)ەوە وەستاو دژایەتی كۆماری ئیسلامی ئێرانی كرد. دیارە “دكتۆر عەبدولڕەحمانی قاسملۆ” بە چەند مانگێك بەر لە دەسپێكردنی گفتوگۆ لەسەر هێڵ بوو لەگەڵ “مام جەلال” و بەرپرسە باڵاكانی یەكێتیی، تا زەمینەیەك بۆ دانوستان و رێكەوتن لەگەڵ حكومەتی ئێراق بدۆزێتەوەو لەیەك نزیكیان بكاتەوەو بگەنە رێكەوتنێكی گشتی لەسەر بابەتە ناكۆكەكان. هەربۆیە ڕۆڵی ناوبراو بەرچاو و كاریگەر بوو، وە كاری خۆشی كرد.
لەلایەكی دیكەوە ئەگەر باس لەوە كرابێت، كە بیرۆكەی دانوستان لەگەڵ یەكێتیی، لەلایەن خودی (سەدام حوسێن)ەوە بووبێت، یان بەرپرسە باڵاكانی حكومەتی ئێراق و دەزگای ئەمنی و هەواڵگرییەكانی، تا بە داوای “مام جەلال” و ئەندامانی مەكتەبی سیاسی دەگات لە حیزبی دیموكراتی كوردستانی ئێران و خودی “دكتۆر عەبدولڕەحمانی قاسلۆ”، هیچ لەو ڕاستییە ناگۆڕن، كە پردی ئەو پەیوەندییە هەر “دكتۆر عەبدولڕەحمانی قاسملۆ”و سەرانی باڵای پارتەكەی بوون. هەڵەش نییە ئەگەر بلێین: هەموویان ڕۆڵیان لەو ڕووداوەدا هەبوو. جیاواز لەوانەش بۆ یەكێتیی پێویست و گرنگ بوو، بەو دانوستانە لەگەڵ حكومەتی ئێراق، سوود لەو دۆخە ببیننن و كەمێك پشوو بە رێكخستنەكانی ناوخۆییان بدەنەوەو چاوی دەزگاو دامەزراوە ئەمنییەكانیان لەسەر هەلبگرن. هەروەها پشوویەكیش بە كادیر و پێشمەرگەگانی شاخ بدەن و بە كەسوكار و ڕێكخستنەكانی ناو شاریان، بگەیەنێتەوە. ئەوەش دوای نزیك بە (هەشت) ساڵ، شەڕ و ململانێی لەگەڵ حكومەتی ئێراق، هەر لەساڵی (1975ز) تا بە ساڵی (1983) دەگات. هەربۆیە كار و هەوڵەكەی سكرتێری گشتی حیزبی دیموكراتی كوردستانی ئێران، چەندە لە بەرژەوەندی خۆی و حكومەتی ئێراق بوو، چەندین هێندە لە بەرژەوەندی یەكێتیی و (مام جەلال)و كۆی كادیرو پێشمەرگەو رێكخستنەكانی ناو شار شارۆچكەو شارەدێ و گوندەكان بوون. وەك یەكێتیی نیشتمانیی كوردستانیش لە بەرژەوەندی بوو، بەو كارەی لەلایەك نیازپاكی خۆی نیشانی حكومەت و دەوڵەتی ئێراق بدات. ئەمەو چاكەیەك لەگەڵ هاوپەیمانەكەی (حیزبی دیموكراتی كوردستانی ئێران)و سكرتێرە گشتییەكەی بكات.
لەم پێودانگەشەوە هەڵە نییە ئەگەر هۆكارە تایبەتەكانی ئەو دانوستانە، بۆ داواو و ڕەزامەندی هەریەك لە (سەدام حوسێن)و “دكتۆر عەبدولڕەحمانی قاسملۆ”و “مام جەلال” بگێڕینەوە، چونكە هەریەكەیان بە شێوەیەكی ڕاستەوخۆ سوودیان لێ دەبینی و لەبەرهەمەكەیان دەخوارد.
