پەرژینێكی قایم بێت لە رووی خوێنەرانی هێژا، كاتێ سێكسفرۆشێک لەسەر شەقامێکی سەرەکیی شارێكدا، جەستەی خۆی هەڕاج دەکات، سەدان جار لەو كەسانە شەریفترە كە خیانەت لە خاك و نەتەوە و نیشتمانی خۆیان دەكەن و دەیانخەنە ژێر پۆستاڵی گرووپێكی بێگانەی داگیركەر یان میلیشیایەكی چەتە و خوێنڕێژ، ئاخر ئەو كەسە سێكسفرۆشە گەرچی بە هەموو پێوەرێك كارێكی قێزەون دەكات، بەڵام زۆرترین زیانەكانی بۆ خۆیەتی، لێ كەسێك كە خیانەت لە نەتەوە و خاك و نیشتمانی خۆی دەكات، كارەسات بۆ ملیۆنان كەس دەنێتەوە و دۆزی نەتەوەیەك سەدان ساڵ دەگێڕێتەوە بۆ دواوە و تووشی بێئومێدیی گەورەی دەكات. دەبێ بشزانین، خیانەتكردن لە خاك و نەتەوە و نیشتمان، هەر تەنیا ئەوە نیە سەنگەرێك بە فرۆشتن بە دوژمنان تەسلیم بكەیت، یان بەرەیەكی جەنگ چۆڵ بكەیت، یان خەنجەری ژەهراوی لە پشتەوە لە نەتەوەی خۆت بدەیت، بەڵكوو كاتێ بۆ بەرژەوەندیی دوژمنان و داگیركەرانیش قسە دەكەیت و دەنووسیت، تۆ هەر لە ریزی خائینانیت، كاتێ بە شانوباڵی خائینانیشدا هەڵدەدەیت و خیانەتی گرووپێك دەكەیتە نیشتمانپەروەری لای خەڵك، دیسان تۆ هەر خائینیت و هێشتا سێكسفرۆشەكە لە تۆ شەریفترە.
كە لە سێكسفرۆشێك دەپرسیت: ”بۆچی ئەم كارە دەكەیت؟ بۆچی جەستەی خۆت هەڕاج دەكەیت؟“ رەنگە یەكێك لەم وەڵامانەت بداتەوە: ”برسی و بێدەرەتانم و دەمەوێ وەكوو خەڵك بژیم! یان: جەستەی خۆمە و هەڕاجی دەكەم تۆ حەقت چیە؟
یان: كارێكی خراپە و خووم پێوە گرتووە و بۆم تەرك ناكرێت!“ ئەم وەڵامانە هیچییان نابنە پاساو و بیانوو بۆ ئەو كارە بێزراوە، بەڵام بەڕاستی نازانم كاتێ لە نیشتمانفرۆشێك بپرسین: ”ئەرێ تۆ بۆ نیشتمان هەڕاج دەكەیت؟“ ئاخۆ وەڵامی چیمان بداتەوە. ئاخر نیشتمانفرۆش بۆی نیە وەك سێكسفرۆشەكە بڵێ: ”برسی و بێدەرەتانم و دەمەوێ وەك خەڵك بژیم!“ چونكە نیشتمان بەتەنیا موڵكی ئەو نیە، موڵكی ملیۆنان كەسە.
هەروەها نیشتمانفرۆش ناتوانێ وەك سێكسفرۆش بڵێ: ” جەستەی خۆمە و هەڕاجی دەكەم تۆ حەقت چیە؟“ دیسان لەبەر ئەوەی نیشتمان بەتەنیا هی ئەو نیە تا ئازاد بێت لە هەڕاجكردنی. دوایین وەڵام گەر نیشتمانفرۆشێك بیەوێت وەك سێكسفرۆشێك وەڵام بداتەوە، دەبێ بڵێ: ”كارێكی خراپە و خووم پێوە گرتووە!“ رەنگە ئەمە وەڵامێكی ماقووڵ بێت بۆ نیشتمانفرۆشانی ئەمڕۆی باشووری كوردستان، هەر بەراستی ئەمانە خوویان بە خیانەتەوە گرتووە.
شێخ سەعیدی پیران (گۆڕی پڕ نوور بێت) جارێكیان فەرموویێتی: ”زۆر لەو كەسانە مەكەن كە نیشتمانیان ناوێ، ئاخر نیشتمان شەرەفە، كەس ناتوانێ بە زۆر شەرەف بدات بە كەسی بێشەرەف.“ جا ئەمڕۆ كە میدیاكان باسی رووداوەكانی فرۆشتنی كوڵەجۆیان كرد و دوێنێ كە یەكێتی هەموو كەركووك و خانەقینی بۆ پۆستێك فرۆشت و پێرێ كە خیانەتی 16ی ئۆكتۆبەری كرد، هەزار رەحمەتم بۆ شێخ سەعیدی پیران نارد و گوتم: چەند پڕ حیكمەتی پیری پیران.
