پارتی دیموكراتی موردستان لەمێژووی خۆیدا ڕۆڵی ئافرەتی بە گرنگ زانیوە و بایەخی پێداوە، هەمیشە لە ئۆرگانەكانی پارتی و دامەزراوەكانیدا ئافرەتی چالاك و خاوەن توانا هەبوون و ئەركی سیاسی و ڕێكخراوەییشیان پێ سپێردراوە، تەنانەت لە خەباتی پارتیزانی وسەردەمی شۆڕشدا پێگەی ئافرەت لە ناو پارتی و لە شؤڕشدا ون نەبووە و ئافرەتانی دیار وخاوەن هەڵوێستی مەردانە چوونەتە مێژووی شۆڕش و پارتیەوە، ئەمە سەرەڕای ئەو داكۆكیانەی پارتی لە ماف و پێگەی ئافرەتان كردویەتی لە سەردەمی حوكمڕانی ولە ناوەندە حكومیەكاندا.
لە دواهەمین كۆنفرانساتە ناوخۆییەكانی پارتیشدا دەرفەتێكی باش ڕەخسێنرا بۆ ئەوەی ئافرەتان پێگە وسەنگی خۆیان هەبێت لە ڕیزەكانی حیزب و لەناوەندەكانی بڕیاری حیزبدا، هەر بۆیە بەپێی ئەو دۆخەی لەڕوی پەیڕەوییەوە ڕەخسێنرا ژمارەیەكی باش ئافرەت لە گشت ئۆگانەكاندا جێگە و ڕۆڵیان پێدراوە و متمانەی حیزب و ئەندامانی حیزبیان وەدەستهێناوە، لێرەوە ئیتر ئەركە گەورەكە دەكەوێتە سەرشانی خودی ئەو ئافرەتانە و ئەوان دەتوانن بیسەلمێنن كە شیاوی ئەو پێگە و متمانەیەن.
ئەم ڕۆڵ ومتمانەیەی بە ئافرەتان دراوە لە ناوەندە حیزبیەكانی دوای كۆنفرانسدا بەچەند ئاستێك ئەركی سەرشانی ئافرەتان زیاد دەكات و دەیانخاتە بەردەم بەرپرسیارێتی گەورەوە:
– بێگومان ئەو ئافرەتانە سەرەڕای ئەوەی نوێنەرایەتی گشتی ئەندامانی حیزب دەكەن بەهەردوو ڕەگەزەوە، بەڵام لەڕوی مەعنەوییەوە نوێنەرایەتی تایبەتی ئافرەتانیش دەكەن و دەبێت بە توانا و لێهاتوویی خۆیان بیسەلمێنن كە ئافرەتان شیاوی پێسپاردنی ئەركن و شایستەن بۆ ئەوەی پێگەی سیاسیان هەبێت و لەناوەندەكانی بڕیاردا هەبن، وە بەپێچەوانەوە ئەگەر نەتوانن ئەوە بەكردەوە بسەلێممن ئەوا توانا و لێهاتوویی ئافرەت دەخەنە ژێر پرسیارەوە وڕەنگە ببنە نمونەیەكی نێگەتیڤ و بۆ گشت ئافرەتان و ڕۆڵ و پێگەیان.
– ئافرەتان لە ناوەندە حیزبیەكان و ئەركە سیاسیەكانیاندا پێویستە بەردەوام پەرە بەتوانا و لێهاتووییەكانی خۆیان بدەن و ڕیگەنەدەن لە كاروانی پێگەیشتن وپێشكەوتن دوابكەون، بۆ ئەوەی بتوانن پلەی باڵاتر وەدەست بێنن و لە ئاستێكی دیاریكراودا تواناكانی ئافرەتان نەوەستن.
– پێگەی ئەو ئافرەتانەی لە ئۆرگانە جیاوازەكاندا متمانەیان بەدەستهێناوە ئەوەیان لێدەخوازێت بەدڵسۆزیەوە كار بۆ دۆزی ئافرەتان وپرسە پەیوەندیدارەكانی ئافرەت بكەن، هەمیشە لە هەوڵی ئەوەدا بن ئافرەتی سەركردە لەدوای خۆیان دروست بكەن، بۆ ئەوەی گۆڕەپانی حیزبایەتی لە ئافرەتی بەتوانا خاڵی نەبێت.
– ئەركێكی تری ئەو ئافرەتانەی بوونەتە خاوەن پێگە لە ئۆرگانەكاندا ئەوەیە كە بتوانن بیسەلمێنن توانا ولێهاتوویی پێوەری شایستەبوونە بۆ بەدەستهێنانی پێگە وبەرپرسیارێتی، ئەمەیش بەوەدەبێت كە خاوەنی پرۆژەی هەمەلایەن ودەوڵەمەند بن وهەمیشە دەستپێشخەری كاری داهێنەرانەیان هەبێت، ئەمە دەبێتە خاڵی یەكلاكەرەوە بۆ جیاكردنەوەی ئەوانەی بە توانا ولێهاتوویی خۆیان بەو پێگانە نەگەیشتوون، وە لێرەوە سەركردە بەتواناكانی ئافرەتان دەردەكەون و دەگەشێنەوە. ئەوەی باسمانكرد هەندێك ڕاوسەرنج بوون لەپێناو زیاتر بەهێزكردنی پێگەی ئافرەتاندا لە دامەزراوەكانی حیزبدا، بەو ئومێدەی هەموان لەئاست ئەو بەرپرسیارییەدا بن كە لەڕێگەی متمانەی ئەندامانەوە بەدەستهاتوون.
