ئێستا له‌نێو گوتار و ئاخاوتن و بیركردنه‌وه‌ی كۆمەڵگەی كوردیدا، لایەنه نێگە‌تیڤه‌كان زاڵترن له لایه‌نە پۆزه‌تیڤه‌كان، هەڵبەت مەبەستم زاڵبوونی دەنگە. جاران ئەگه‌ر كه‌سێك به نێگە‌تیڤی بیری بكردبایه‌‌وه یان تێڕوانینی بۆ ژیان نێگەتیڤانە بوایە، دەمانگوت: ”كێشه‌یه‌كی تایبه‌تی، یان گرێیەكی ده‌روونیی هەیه“ به‌ڵام ئێستا ئه‌م جۆره بیركردنه‌وانه له حاڵه‌ته‌وه بوونەته دیارده، بۆ دەڵێم دیاردە؟ چونكە ژمارەی مرۆڤە بەدبیركەرەوەكان زۆر بوون، ئەو مرۆڤانەش تەنیا زیانیان لە خۆیان نەداوە، بەڵكوو ڕۆژانه ئه‌م ژه‌هره بەسەر دەوربەریانا دەڕێژن و كۆمەڵگەیان تەواو ماندوو كردووە و لە هەوڵدان كەسێتیی مرۆڤی كورد وەك هی خۆیان لاواز بكەن.
داتا و ئاماری ورد و تویژینەوەی زانستییم لەبەردەستدا نیە، لێ ئەوەندەی من وەبیرم دێ و هێندەی گوێم لە بەسەرهات و سەربردە و رووداوەكان و ژیانی رابردووی كۆمەڵگەی كوردی بووبێت، هەرگیز كۆمەڵگەی كوردی بەم ژمارە و رێژەیەی ئێستای، مرۆڤی خودان بیركردنەوەی نێگەتیڤانەی نەبووە و ئەو مرۆڤانەش هەرگیز هێندەی ئێستا كاریگەریی خراپیان بەسەر كۆمەڵگەوە نەبووە، ئاخر نەگبەتی لەوەدایە سۆشیال میدیا بووەتە ماشێنێكی بەهێز بەدەست ئەم مرۆڤە بەدبیركەرەوانەوەی كوردەوە.
ئه‌زموونی ژیانی كۆمه‌ڵگای كوردی و هه‌ڵكه‌وته‌ی جوگرافیاكه‌ی له ڕوانگه‌ی سروشته‌كه‌یه‌وه، هه‌ر خۆی وه‌ها ده‌كات كه مرۆڤێكی گه‌شبین و پڕ كه‌یف و سه‌فا بێ و ژیاندۆستانە و خۆشبینانە لە ژین بڕوانێت. بیركردنەوەی پۆزەتیڤانە بەشێك بووە لە هەست و هزری مرۆڤی كورد، گەر وا نەبوایە لەگەڵ ئەم هەموو ئازار و ئەشكەنجە و كۆمەڵكوژی و هەوڵی سڕینەوەیەی دوژمناندا، كورد كۆتایی پێدەهات و نەدەما، ئەوە خۆشبینی و گەشبینی و گەشبیرییە، بووەتە یەكێك لەو هێزانەی كوردیان هێشتووەتەوە.
بەشبەحاڵی خۆم وای دەبینم، جوگرافیای سیاسی و گۆڕانكارییە ئابوورییەكان و ئه‌و ململانێ سیاسییانه‌ی ناوخۆی هه‌رێمی كوردستان و هەروەها نێوان هەرێمی كوردستان و وڵاتانی دەوروبەر، هەم دۆخی بیركردنەوەی بەشێك لە مرۆڤی ئەم نیشتمانەی گۆڕیوە، هەمیش خەڵكی بیربەد و ملكەچ و خۆچەمێنیشی هێناوەتە ئارا، ململانێكان پڕن لە رق و بوغز و كینە، جاشێتی و خۆفرۆشی لەبری ئەوەی نەنگی و مایەی سەرشۆڕی بێت، خەریكە دەبێتە مایەی شانازی و سنگ دەرپەڕاندن! زاڵبوونی وتاری پۆپۆلیستییش كاریگەریی خۆیی هەیە، لە زاڵبوونی دەنگی بەدبیران و بەدبیناندا.
نموونەیەك دەهێنمەوە بۆ سەلماندنی قسەكانم، ماوەیەكی باشە، حكوومەتی هەرێمی كوردستان، بە ستراتیژێكی روون و ورد و رژد، هەندێ هەنگاوی گرنگی ناوە و پرۆژەی گرنگی خستووەتە بواری جێبەجیكردنەوە و بڕیاری زۆر باش لە بەرژەوەندیی هاووڵاتیان و ئایندەی هەرێمی كوردستان دەدات، كەچی خەڵكێكی پۆپۆلیست، بەدبین و رەشبیر، دژی ئەو هەنگاو و پرۆژە گرنگانە دەدوێن و مەخابن خەڵكێشكیش دەكەونە بن كاریگەریی ئەوان.
سەیر كەن، كاتژمێری زیرەكی ئاو و كارەبا دادەنرێت كە بە دڵنیاییەوە لە بەرژوەندیی خەڵكە و سامانی ئاو دەپارێزێت و كارەباش دادپەروەرانە دابەش دەكات، كەچی خەڵكێك دژی دەوەستنەوە و كاتژمێرەكان دەشكێنن. كامێرای چاودێریی تیژڕەوی كە سەدا سەد بۆ پاراستنی سامان و گیان و ژیانی خەڵكە، كەچی دیسان خەڵكێك دژی دەدوێن و خەڵكێكیش دەكەونە ژێر كاریگەرییانەوە. زیندووترین و نزیكترین پرۆژه، پرۆژەی (هه‌ژماری من)ە. ئه‌م پرۆژه‌یه چه‌ندین لایه‌نی گرنگی هه‌یه، بۆ خزمەتكردنی خەڵكی كوردستان و لەپێش هەموویانەوە مووچەخۆران و فەرمانبەران، كەچی خەڵكێك بێ ئەوەی هیچی لێ بزانن، دژی دەوەستنەوە!
بەڕاستی ئەوانەی دیدی نێگەتیڤانە بەنێو كۆمەڵگەی كوردستانییدا پەخش دەكەن، هێندەی ئەوانە تاوانبارن كە بە كیمیایی مرۆڤی كوردیان دەیكوشت، ئاخر ژەهرەكەی سەدام مرۆڤی كوردی لەڕووی جەستەییەوە كوشت و ژەهرەكەی ئەمانیش مرۆڤی كورد لەڕووی دەروونیەوە دەكوژێت.
