١. ئێمە لە خاكێكی جیاوازین، مێژوویەكی جیاوازمان هەیە و سێمبوول و شانازییەكان و تامی خواردن و كولتووریشمان جیاوازە. ئێراق نیشتیمانی مێژوویی من نییە، من خەڵكی كوردستانم، كە مێژوویەكی زۆر دێرینەتری لەم ئێراقە هەیە، كە مێژووەكەی دەگەڕێتەوە تەنیا بۆ سەرەتای سەدەی بیستەم.
٢. ئێراق بۆ من قەفەسێكی ئاسنینەو تیایدا بەندكراوم. تیایدا كۆیلەم و هاووڵاتیی دووەمم و من نیشتیمانێكی میژووییم هەیە، نەك سیاسیی و دروستكراو. زێتر لە سەد ساڵە داهاتی گشتی ئەم ئێراقە، بە نەوتی كەركووكیشەوە، لە تواندنەوەی منی كوردستانیدا بەكار دەهێنرێت.
٣. ئێراق نیشتیمانێكی دروستكراوە، بە زۆر كوردی تێئاخنراوە و ناچار كراوە بە زۆر قەبووڵی ئەم زیندانە بكات. ئێراق نیشتیمانێكی ڕۆحیی من نییە، هێندەی ئەوەی قەوارەیەكی سیاسییە كە ئێمە لە 2003دا بۆخۆمان زیندوومان كردەوە.
٤. باجی ئەم زیندووكردنەوەیەمان دا و سەرمان دای لەبەرد. ئەو كاتەی ئەوەمان دەكرد، هاووڵاتیانی كورد مەستی ڕووخانی ڕژێمی سەدامی دیكتاتۆر بوون و سیاسیەكانی ئێمە مەستی بەدەستهێنانی پاداشت و بەرژەوەندی.
٥. “دادگای بەڵای ئێراق” بەرهەمی ئەم زیندووكردنەوەی لاشە تۆپیوەی ئێراقی بەعس و شۆڤێنییەتەیە.
٦. لە وتارەكانی داهاتوودا زۆر شتی دیكەش دەنووسم.. ئێوەش هەر جوێنم پێدەن خۆشەویستان..
٧. سەرشۆڕی بۆ ئەو بەناو نووسەرە كوردانەی بە كوردی دەنووسن و كەچی ڕێز لەو پەیوەندییە ناگرن كە ئەوان بە نیشتمانەكەیانەوە دەبەستێتەوە و لەم چاخانە و لەو باڕ سوكایەتی بە نەتەوەخوازانەوە دەكەن.
