لە دوای گۆڕانكارییە خێراكان لە ئێراق و ناوچەكەدا، بە تایبەتی لە نێوخۆی هەرێم، بەداخەوە جارێكی دیكە هەرێمی كوردستان كرایە ئامانج، بە شێوەیەك كە نەیاران و دوژمنان، هەرجارەو شێوازێك بۆ ئەم مەبەستە بەكار دەهێنن، بەڵام وەكو هەمیشە ئەوا خۆڕاگریی گەلەکەمان کە بە ئیرادەیەکى بەهێز وپۆڵاین لە ژێر سەركردایەتییە ژیرانەدا، وای كردووە کە ڕووبەڕووى نەیاران لە ناوخۆ دەرەوە ببێتەوە و هەنگاو بەهەنگاو بەسەر گشت ئاستەنگەكاندا زاڵ بن.
دوژمنانى کوردستان بە سوود وەرگرتن لە قەیرانسازى و لێکترازانى ناوخۆیی بەکارهێنانەوەیان لە دژى خودى گەلى کوردو لە ڕێگەی حكوومەتی ئێراقی و بڕینی بودجە و مووچەی فەرمانبەرانی هەرێم، فشارەكانیان بۆ سەر هەرێم دەهێنا، بەڵام ئەمجارە نەیاران بەهەموو جۆرە ئامراز و چەکى بەردەستیان بەڕێگەى ئابوورى و دادگاوە هەوڵەكانیان چڕ كردەوە بە ئاراستەی تێكدانی ئارامیی هەرێم و لێدان لە ناوبانگ و پێگەی هەرێمی كوردستان.
لە ماوەی رابردووی گەشەسەندنەکان و ئاوەدانی و پێکەوەژیان لە کوردستان بەتایبەتی لە هەولێری پایتەخت بووەتە هۆی هیستریاونیگەرانی دوژمنانمان، هەر بۆیەش هەموو هەوڵێک دەدەن بۆ لەباربردنی ئەم ئارامی و سەقامگیرییە و ئەزموونەی لە ئارادایە، بەڵام هەر وەک چۆن جەنابی سەرۆک بارزانی دەفەرموێ “هەرگیز لەکەس قبووڵ ناکەین تەعدامان لێبکات و سەرناچەمێنین، و تەعداش لەکەس ناکەین” ئەمەش خۆی لە خۆیدا پەیامێکی روون و ڕاشکاوە بۆ نەیارانی کوردو کوردستان.
بە هەمان مەبەستی دژایەتیكردنی ئەم ئەزموونە، زۆرێك لە هێزە سیاسییەكان لە ماوەی ڕابردوودا بەربەست بوون ، بۆ دروستكردنی كۆدەنگی بوو لە بەغدا، ئەمەش كاریگەریی راستەوخۆی دەبێت لەسەر پێگەی كورد لە ئێراقدا سوودوەرگرتنى نەیارانى گەلەمان، چونکە ئەوەى دەسەڵاتدارانى فاشیزمى لە ئێراق مەبەستیانە شکست وگەندەڵى و ڕیسواییەکانی 21 ساڵى حکوومڕانی حکومەتە یەک لەدوای یەکەکانی بەغدا بەڕێگەى دروستکردنى فشار و ئینجا ڕێگریکردن لە گەشەسەندن و پێشکەوتنى زیاترى هەرێمى کوردستان بە پاساوبیانوو و قەیرانسازى هەمەچەشن کوردستانیش هاوشێوەی ناوچەکەکانى ناوەڕاست و باشوورى و رۆژئاواى ئێراق دواکەوتوو و بێ خزمەتگوزارى بێت، بەڵام سەرکردایەتیی سیاسى کوردستان خوێندنەوەى وردبینانەى بۆ بابەتەکان و هەموو ئەو هەوڵە نەزۆک و بەربەستانەى فاشیزمەکانى ئێراق بە چاوساغى بۆ نەیارانى کورد بە ڕێگەى حزبی سیاسی هەن لە کوردستان لە جیاتی ئەوەی لە سەنگەری بەرگری نیشتیمانیدا ڕۆڵی خۆیان ببینن بە پێچەوانەوە کەوتونەتە نێو سەنگەری دوژمنانی گەل و وڵاتەکەیان و بە هەموو هێزو توانایێکیانەوە دژایەتی ئەزمونی کوردستان دەکەن و لەم ڕوانگەیەشەوە هیچ درێغییان نەکردووەو هەرجارە بە شێوازێک و پیلانێک هەوڵی لاواز کردن و لەکەدار کردنی حکومەتی کوردستان دەدەن و هەموو جورە میکانیزمێک و ڕێگایەک بە کار دەهێنن بو لێدانی ئاسایشی نەتەوەیی و نیشتیمانی ئەم هەرێمە.
لە سەر ئاستی ئێراقی و هەرێمی و نێودەوڵەتی حزبی سیاسی چۆن دەبێت لە گەڵ فاشیزمى و ڕەگەزپەرستەکانی ناوچەکە ڕێک بکەوێت بۆ لە نێو بردنی ئەزمونی وڵاتەکەی بەتایبەتى کە لەماوەى رابردوو بەڕێگەى هاندان چین و توێژەکان و سووکایەتیکردن بە پیرۆزییەکانى کوردستان و دامەزراوەکانى خەونى قوڵکردنەوەى ناکۆکییە کۆمەڵایەتییەکان دەبینن بە پیلانی هەندێك حزب و لایەنى دیاریكراوە بۆ لەكەداركردنی پێگەی هەرێمی كوردستان لەسەر ئاستی ناوچەیی و نێودەوڵەتیدا، لەگەڵ ئەوەشدا دوژمنانى کوردستان بە شێوەیەکى چڕ و پڕ جەنگێکى دەروونى یان لەگەڵ خەڵکى کوردستان دەستپێکردووە لە پێناو دروستکردنى بێ ئومێدى لە حکوومەتى کوردستان و سەروەرى و پیرۆزى و قەوارەى هەرێمى کوردستان بۆ مەرامى لێدانى سەنگ و پێگەى کوردستان، لە ماوەى چەند ساڵى رابردووش زۆر هەوڵی تر دراوە ئیرادەی گەلی کورد بشکێنرێت، بەڵام سەرجەم هەوڵەکان بێ ئاکام بوون، هەموو ئەم هەوڵانەى فاشیزمەکانى ئێراق بەرامبەر بە خۆراگرێى کوردستان هاوشێوەى رابردوو شکستخواردوو و دەبێت و تێکدەشکێت .
