لەدوای ئەنجامدانی سەرووی 200 هێرش لەلایەن مقاوەمەی ئیسلامییەوە بۆ سەر بنکە و بارەگاکانی ئەمریکا لە ئێراق و سوریا وە کوشتن و بریندارکردنی چەندین سەربازی ئەمریکی ، کۆتا هێرشی مقاوەمەی ئیسلامی بریتی بوو لە هێرشکردنە سەر بنکەی سەربازی ئەمریکی (Tower 22) لە ئوردن کە لەئەنجامدا 3 سەربازی ئەمریکی کوژران و نزیکەی 40 سەربازیش برینداربوون بەپێی ڕاگەیەندراوی وەزارەتی بەرگری ئەمریکا.
لەناوخۆی ئەمریکا دا فشارێکی توند لەسەر ئیدارەی بایدن و حکومەتەکەیەتی بۆ ئەوەی کۆمەڵێک ئۆپەڕاسیۆنی سەربازی ئەنجامبدات بۆ سەر هێزە پڕۆ-ئێرانییەکان لە ناوچەکە ، کۆمارییەکان بەبەردەوامی ڕەخنە لە حکومەتی بایدن دەگرن بەوەی کەمتەرخەمە لە ئاست وەڵامدانەوە و پاراستنی گیانی سەربازە ئەمریکییەکان لە ڕۆژهەڵاتی ناوەڕاست ، بەڵام بەپێی بەدواداچوون بۆ لێدوانی سیناتۆر و کەسایەتییە ناودارەکانی ئەمریکا کە هانی هێرش دەدەن ، دەردەکەوێت زۆربەی ئەو کەسانەی هاندانییان هەیە بۆ ئەم هێرشانە کەسانێکی میدیایین زیاتر لەسەر بنەمای عاتیفە و تویتکردن بڕیارە سیاسییەکانییان یەکلادەکەنەوە ، هەرییەك لە دۆناڵد تڕەمپ و لیندسی گڕاهام و چەندین کەسایەتی تر.
تڕەمپ لە ئێستا دا پرسی تۆڵەکردنەوە وەک بانگەشەی هەڵبژاردن بەکاردەهێنێت ، ئەوانی تریش تەنها لەژێر کاریگەری تویتکردن ڕەخنە لە ئیدارەی بایدن دەگرن، بەڵام واقعی سیاسی ئێستای ڕۆژهەڵاتی ناوەڕاست زۆر جیاوازترە لەو واقعە جیۆپۆلەتیکییەی کەوا لە ساڵی 2003 بوونی هەبووە ، یاخود لەکاتی ئیدارەی بۆش ، ئەوانەی لەژێر کاریگەری تویت و هوتافی میدیای فشار لە پنتاگۆن دەکەن بۆ تۆڵەکردنەوە جیاوازی ناکەن لەنێوان ئەم دوو واقعە سیاسییە.
وا پێدەچێت ئیدارەی بایدن داوای لە حکومەتی ئێراق کردبێت فشار لە حزبوڵای ئێراقی بکات بۆ ماوەیەکی کاتی دەست هەڵگرن لە هێرشەکانییان تاوەکوو دۆخی ناوخۆی ئەمریکا سەقامگیر بێت و دۆخەکە سارد ببێتەوە و هیچی تر پرسی هێرشەکەی ئوردن مانشێتی ڕۆژنامەکان گەرم نەکات، حکومەتی ئێراقیش داوای لە هێزەکانی حزبوڵای ئێراقی کردووە بۆ ماوەیەکی کاتی هێرشەکانییان ڕابگرن وە قسەییان بە ئەمریکییەکان داوە، وە حکومەتی ئێراق پێی ڕاگەیاندوون کەوا هەموو هەوڵێکی دیپلۆماتیمان خستووەتە گەڕ تاوەکوو لەگەڵ هاوپەیمانان دابنیشین و پێیان بڵێین هێزەکانتان بکشێننەوە لە ئێراق، حزبوڵای ئێراقیش لە بەیاننامەکەی دا ئاماژەی بەو خاڵە داوە کەوا هێرشەکانییان ڕادەگرن بۆ ئەوەی حکومەتی ئێراقی شەرمەزار نەبێت وە چاوەڕێی هەوڵەکانی سودانین بۆ دەرکردنی ئەمریکییەکان بەڕێگای دیبلۆماسی.
وە پێدەچێت ئیدارەی بایدن بۆ کەمکردنەوەی ڕەخنەکانی ناوخۆ کۆمەڵێک هێرشی سیمبووڵی ئەنجام بدەن (Symbolic Attack) بۆ گەڕاندنەوەی ئاستی خۆیان لە ناوچەکە، ئەم جۆرە هێرشانە زیاتر لە هێرشی ساختە دەچن بەبەکارهێانی کۆمەڵێک بۆمب و مووشەك و هێرشی ئاسمانی بۆ سەر چەندین ناوچە تاوەکوو مانشێتی ڕۆژنامەکانییان پێ گەرم بکرێت لەکاتێکدا هێرشەکان لە ئەرزی واقع دا هیچ ئامانجێکی ستراتیژییان نەپێکاوە، هێرشەکانی ئەمریکا لە چەند کاتژمێری داهاتوو کۆمەڵێک هێرشی لەم جۆرە دەبن بۆ کەمکردنەوەی فشارە سیاسییەکانی ناوخۆ.
