گرەوی سەدر لەسەر چیە؟
موقتەدا سەدر بە کشانەوەی لە پارلەمانی ئێراق و بەشداری نەکردنی لە هەڵبژاردنی ئەنجومەنی پارێزگاکان دەبێتە تاکە هێز کە لە دەرەوەی پرۆسەی سیاسی، سیاسەت بکات بەمەش موقتەدا سەدر دەبێتە ئەو ئۆپۆزسیۆنە راستەقینەیەی کە هێشتا لە ئێراقدا دروست نەبوە بەمەرجێ بتوانێ ئەم دەستپێکە بە باشی ئیدارە بدات ئەو بەرێزانەی وا دەبینن موقتەدا سەدر دۆڕاوە پێیان وایە گرەوی ئەو ڕێبەرەی شیعە لەسەر بەشداری نەکردنی خەڵک لە هەڵبژاردندا بوە، بەڵام ئەمە وانییە.
بۆ موقتەدا سەدر هاوکێشەکە لەوەدا نیە رێژەی بەشداری لە هەڵبژاردندا چەند بووە ئەوە پۆینتە گرنگەکە نییە، بەڵکو بابەتی گرنگ دروستکردنی ئۆپۆزسیۆنی راستەقینەیە کە دەمێکە شەقامی شیعەی ئێراقی خەونی پێوە دەبینێت. ئەو ئۆپۆزسیۆنەش هەر دەبێ لە دەرەوەی سیستم دروست بێت و بە ئەزموون دەرکەوت لەناوسیستمدا دروستنابێت.
بۆیە موقتەدا سەدر بە بەشداری نەکردنی لەم هەڵبژاردنەدا دەبێتە یەکەم هێزی ئۆپۆزسیۆنی راستەقینەی ئێراق، چونکە بونی ئۆپۆزسیۆن لەناو سیستمێکی سیاسی وەک ئەوەی ئێراقدا و وەک ئەوەی زۆربەی حزبەکان ئەنجامی ئەیەن بەشێکی تەواو کاریە بۆ پرۆسە سیاسی.
لەکاتێکا خەڵکی ناڕازی، ناڕازین لە کۆی سیستمی سیاسی و ئیداری و یاسایی نەک لە کابینەیەک و کەسایەتییەک و حکومەتێک و ئەدای حکومەتێک، وەک ئەوەی لە رۆژئاوا هەیە لە راستیا ئەگەر چی لە ئێراق ناڕەزایەتی زۆرترە کەچی مۆدێلی ئۆپۆزسیۆنی سیاسی هێشتا لاوازەو تەنانەت نەگەیشتۆتە ئاستی هەرێمی کوردستانیش، چونکە لەوێ دواجار هەموو حزبە دیارەکان پشکدارن لەدەسەڵاتداو پاشان لەسیستمیشا.
لە هەرێمی کوردستان ئۆپۆزسیۆنی سیاسی تەنها بەشداری سیستمە نەک دەسەڵات و حکومەت. بۆیە پێم وایە بەشداری نەکردنەکەی موقتەدا سەدر لەم پۆینتەدا دەبێتە سەرکەوتن کە دەستپێکێکە بۆ دروستکردنی بەدیلێکی راستەقینە بۆ سیستم لە دەرەوەی گەمە دوبارەکانی هەڵبژاردن.
ئەی کەواتە ئایا ئەم بەدیلە کەی و چۆن خۆی دەخاتە ڕوو؟
بۆ وەڵامی ئەم پرسیارە دەڵێین:
موقتەدا سەدر ناگەڕێتەوە ناو پرۆسەی سیاسی هەتا ڕێژەیەکی گەورەی سەرکەوتن لە شەقامی شیعیدا تۆمارنەکات و بە ئیسراحەتی خۆی و بەتەنها حکومەت تەشکیل نەکات. بۆ ئەمەش دەبێت موقتەداو رەوتەکەی ئیدارەیەکی باشی ئەم سەرەتایە بدەن بەرەو تەوژمێکی جەماوەریی گەورەتر لە قۆناغەکانی داهاتوا.
