* پاش تێپەڕینی دوومانگ بەسەر جەنگی حەماس و ئیسرائیلدا ئیتر ڕەنگە کاتی ئەوەهاتبێت سنوری جەنگ و بەرەی شەڕو پێکدادان فراوانتر بکرێت و باشترین جێگەش بۆ ئەم مەبەستە وادیارە ئێراقە، ئەگەرچی حوسیەکانی یەمەن و حیزبوڵای لوبنانی بەچەند ڕۆکێت و چالاکیەک بەشداریان لەو جەنگەدا کردوە، بەڵام هێشتا کاریگەری هێرش و پەلامارەکانی هێزەکانی ئەمریکاو هاوپەیمانانی لە ئێراق و سوریا کاریگەرتربوون بەجۆرێک ئەم هێرشانە تەنگی بە بەرپرسانی ئەمریکا هەڵچنیوەو لەبەر بارودۆخی هەڵبژاردنەکانی ئەمریکاش دیموکراتەکان نایانەوێت ڕاستەوخۆ بچنە شەڕەوە چونکە ڕەنگە لە هەڵبژاردنەکەدا بەزیان کۆتایی بێت بۆیان.
* ئەم هێرش و پەلاماردانانەی هێزەکانی ئەمریکاو هاوپەیمانانی بە درۆنی بۆمب ڕێژکراو یاخود هەندێک ڕۆکێت زیانی گیانی و مادی و سومعەیشی لە هێزەکانی ئەمریکا داوەو لەوەڵامدا ئەمریکا دووجار وەڵامی داونەتەوە جارێک لە سوریا جارێکیش لە ئێراق لەکاتێکدا نزیک دەبێتەوە لە سەد هێرش و پەلامار لەلایەن ئەو هێزانەی خۆیان ناوناوە بەرەی موقاوەمە.
* هەرێمی کوردستان دوورو نزیک نایەوێت ببێت بەقوربانی جەنگێک کە هیچ پەیوەندیەکی پێوەی نییە، بەڵکو دەیەوێت کۆی کێشەکە چارەسەربێت کە ئەویش هەرزوو سەرۆکی هەرێمی کوردستان و سەرۆکی حکومەتی هەرێمی کوردستانیش بە حەلی دوو دەوڵەت ناویانبرد واتە فەڵەستینیش وەک ئیسرائیل ببێت بە خاونی کیان و دەوڵەتی سەربەخۆ، بێگومان بەبێ هاتنەدی ئەم ڕێگەچارەیەش جەنگ و کوشتار بەردەوامی دەبێت کە بێشک ئەم هەڵوێستەش وێڕای ئیدانەکردنی جەنگ هاوسۆزیە بۆ قەزیەی فەڵەستین و ناوخنیشدا هەمان مانای بۆ قەزیەی کوردی هەیە.
* ئێراقی دوای ڕژێم بڕیاربوو لەسەر بنەمای ( تەوافوق و تەوازون و موشارەکە)بونیاد بنرێت و دەوڵەتانی ڕوخێنەری سەدام هێزە ئۆپۆزسیۆنە ئێراقیەکانی ئەوێ ڕۆژێش ئەو بەڵێنەیان بە کوردستان دا، بەڵام بەداخەوە هەرزوو ئێراق لە بەڵینەکانی پەشیمان بویەوەو ئەو مافانەشی تایبەتن بە هەرێمی کوردستان لەدەستوری ئێراقیدا تا ئەم چرکەساته هێشتا مرەکەبی سەر کاغەزەو هیچیتر، جا ئەگەر دەستور وەک زەخرەفە هەڵگیرابێت و کاری پێنەکرێت بێگومان ڕێککەوتنەکان و ئیمزاو واژۆکانی دیکەش دۆخیان زۆر خراپترەو هەر دوای پێکهێنانی کابینەکانی حکومەت هەمووی پشتگوێ خراوەو کەمترینیشی جێبەجێ نەکراون.
* ئەوە ئێمە لەمانگی دوازدەداین و بەغداش هێشتا موچەی مانگی نۆی پێنەداوین تا دابەشی بکەین بەسەر موچەخۆراندا لەولاشەوە لە مانگی ئازارەوە بە سکاڵاو شکایەتێک لە دادگای نێوبژیوانی پاریس فرۆشتنی نەوتی هەرێمی کوردستانی ڕاگرتوە واتا نەدەهێڵێت خۆما پارەو موچە بۆ خەڵکی خۆمان دابین بکەین نە خۆشی بۆمان دەنێرێت کوردیش دەڵێت( ئاسمان بەرزو زەوی سەخت).
* ئەو وەفدوو وەفدکاریەی چەند ساڵ و مانگی ڕابردوو بەڕێوەبوون بۆ بەغداد هەوڵ و هەنگاوە دروستەکانی هەرێمی کوردستان بوون بۆ چارەسەرکردنی ڕیشەیی ئەو کێشانەی لەنێوان هەرێم و بەغدادا هەبوون و هەن هەرچی خواست و داواکاری بەغدادش هەبوون لەهەموو بوارەکاندا هەرێمی کوردستان جێبەجێی کردن و نوێنەری وەزارەتەکانی حکومەتی بەغداد خۆیان ئەو ڕاستیەیان وتوەو ئەو شاهێدیەیان داوە بۆ حکومەتی هەرێمی کوردستان، لەماوەی ڕابردوودا خەڵکی هەرێمی کوردستان و موچەخۆران چاوەڕوانی حەوسەد ملیارەکە و سێ حەوسەد ملیاری دیکەش بوون بۆ پێدانی موچەی موچەخۆران کەچی تازە بەتازە بەغدا لەبری بوودجەو موچە درۆن بۆ ئێمە دەنێرێت و تێکڕای داهاتەکانی ئێراقیش بۆخۆی حەپەلوش دەکات.
