شوباتی داهاتوو لە كوردستان هەڵبژاردنە، هەڵبژاردنێك كەمتر لەوانی پێشتر و زۆرتر لە یەكەمین هەڵبژاردنی ساڵی 1992ـی دەستپێك دەچێت، ئەو دەمەی بۆ یەكەم جار داوای چانسمان له جيهان كرد و بە متمانه‌وه گوتمان: ئێمە شایستەی دەرفەتین.
پێدەچێت شوباتی داهاتوو هەڵبژاردنێك نەبێت بۆ كێبڕكێی حیزبییانەى هاوشێوەی ئەوانی رابردوو، بەڵكو دەرفەتێكی درەنگ وەخت بێت بۆ چانس وەرگرتنەوە و تۆخكردنەوەی وێنەی كاڵوەبووی دیموكراتییانەی ئەزموونی هەرێمی کوردستان و گیان و شەرعیەت بە بەرداكردنەوەی دامەزراوە لەشەرعیەتكەوتووەكانمان و دووبارە سەلماندنەوەی شایستەییمان.
شوباتی دادێ، كەمتر دەرفەتە بۆ سەركەوتنی ئەم يان ئەو حیزب، زیاتر دەرفەتە بۆ سەركەوتن و دووبارە هەڵسانەوە و سەرپێكەوتنەوەی كوردستان. چاوی ناوخۆ و دونیاش كەمتر لەسەر كێبڕكێی ئەجێندای حیزبەکانە و چاوەڕوانییەكان زیاتر لەسەر گەڕانەوەی هەموو لایەكمانە بۆ پرنسیپە سەرەكییەكانی دەسپێك و راستكردنەوەی لارییەكان.
لە شوباتی داهاتوودا پێدەچێ پێویستبێ دووبارە سەری رێگەی سەلماندنەوەی ئەو راستییە بگرینەوەبەر كە: ئێمە گەلێكی دیموكراتخوازین و دەمانەوێ لە تاقیکردنەوەی دیموكراسی دا سەركەوین. سەرەڕای هەر نووچدانێك، بەڵام هەر سوورین لەسەر شایستەیی و سەركەوتن. وەك چۆن كاتی خۆی چاوەڕوانیمان لێدەكرا لە ژیانی دیموكراتیانە و هەڵبژاردن لە وادەی خۆیدا، ببینە نموونە بۆ ئێراق و تیشك بۆ ئەوێندەر بدەینەوە. دەبێ هەر وابین نەك هەڵبژاردن نەكەین و بشمانەوێ بە دیموكرات لەقەڵەم بدرێین، یاخود بەهانە بدەینە دەست دادگای ئەوێندەر بەرمەبنای دواخستنی هەڵبژاردن و لەدەستدانی شەرعیەت، دامەزراوەكانمان لەكار بخات!!
شوباتی داهاتوو پابەندیمان بە پرنسیپە سەرەتاییەكانەوە دەمەزەرد دەكەینەوە، لار و وێرى و كه‌موكاسييه‌كانمان به‌ره‌و چاره‌سه‌ر ده‌به‌ين، به‌ڵام هاوكات ده‌ست به‌و راستييه‌شه‌وه ده‌گرين كه سەرچاوەی بوون و مان و دەسەڵات و شەرعیەتی ئەم هەرێمە، گه‌له‌كه‌ى و دۆزی رەوای گەلەكەیەتی، نه‌ك سه‌ركه‌تن و لێوه‌شاوه‌يى دەستەبژێرە سياسييه‌كه‌ى، ئەم هەرێمە موڵكی كوردستانییانە كە هەر تاكێكیان له‌پێناو دروستبوونی دا چیرۆكێكی پڕ زووخاوی بەسەرهاتووە، بۆیەش دەمێنێ و هەڵناوەشێتەوە و لە بەین نابرێت، كايه و دەستەبژێرە سياسييه‌كه‌شى شتێك نين جگه له ئامراز و كه‌ره‌سته‌ى خزمه‌ت به گه‌ل و بەرژەوەندییە باڵا و نەگۆڕە نیشتمانییەكانی.
شوباتی دادێ ده‌رفه‌تى دووباره دڵنياكردنه‌وه‌ى هەموو لایەكە له‌وه‌ى: ئێمەی سەت ساڵ بۆ ئازادی و مافی مرۆڤ تێكۆشاو، ئازادی و مافی مرۆڤ و ئەو پرنیسپانەی دەیان ساڵە جیهانیان كردووەتە دۆست و پشتیوانمان، بە پرنسیپی نەگۆڕ و باوەڕی پتەوی خۆمان و مافی بەدەستهاتووی گەلەكەمان دەزانین و لێیان ناكشێینەوە، نە گەلی ئازادیخوازی خۆمان و نە جیهان لە خۆمان نائومێد ناكەین.
دۆست و خه‌مخۆران دڵنياده‌كه‌ينه‌وه كه ناوی پیرۆزی پێشمەرگە لەسەر سوپایەكی نیشتمانیی یەكگرتووی پابەندی خاك و وڵات دەنەخشێنين، نەك له‌سه‌ر هێزێكى پەرتەوازە و سەر بە بەشی حیزبەکان. دامەزراوە و دەزگا نیشتمانییەكانمان كە بە خوێن و خەبات بەدیهاتوون، بەرز و بە هەیبەت و دوور لە هەر دەستتێوەردانێك رادەگرین. وەك سایە و سێبەر و مەرجەع له ياسا و ياساسه‌روه‌ريى دەڕوانین، هێزە سیاسییەكانمان سەرباری لێكنەچوون و جیاوازی، بەڵام نەك هەر پشتی یەكدی بەرنادەین و پشتی میللەتەكەمان ناشكێنین، بەڵكو لە ئاستانەی داكۆكی لە ماف و نان و ئیستحقاقی گەلەكەماندا، هەموو دەبینەوە یەك و یەك دەست و یەك بازوو. ئێمەیەك كە رۆژگارێك رێگەی پێكەوەیی و یەكدەستیمان پێشانی پێكهاتەكانی دیكەی ئێراق دەدا، بە یەكڕیزی ماف و دەسكەوت و بەركەوتمان بۆ گەلەكەمان بەدیهێنا، چۆن لەو بەغدایەی كە ئێستا جگە لە دەنگی زوڵاڵی یەكدەنگی، هیچ دەنگێكی دیكە نابیستێ، لێكدەترازێین و هەر یەك لە ئاوازێ دەخوێنین!
بە كورتی و كرمانجى: ئەگەر چاومان لە هەستانەوە و بەهێزبوونەوەیە، دەبێ ئەو ئومێدانەی سەرەوە بە خەونی ئەرخەوانی و شاعیرانە نەزانین، دەبێ شوباتی دادێ بكەینە شوباتی پتەوكردنەوەی باوەڕە نەگۆڕەكان، دەمەزەردكردنەوەی بنەما دیموكراتییەكان، گێڕانەوەی هێز و شەرعیەت و متمانە بەدامەزراوەكان و جۆشدانەوه‌ی ژیانی سیاسی و بەرزڕاگرتنەوەی بەرژەوەندییە باڵاكانی گەل و تەرخانبوونی هەمووان بۆ چارەی كێشەكانی ژيانى خەڵكی خۆڕاگر و قەیرانباری كوردستان.
هەر لەم سۆنگەیەشەوە بوو سەرۆك نێچیرڤان بارزانی لە وتارەكەیدا لە پێنجەمین كۆنگرەی یەكێتیی نیشتمانی كوردستان، هیچ ئەركێكی لە پێش هێزە سیاسییەكان و بەتایبەت پارتی و یەكێتی لە ئەركی سەرخستنی هەڵبژاردنی شوباتی داهاتوو بە گرنگتر و چارەنووسسازتر نەزانی، چونكە بە باوەڕی ئەو، هه‌ڵبژاردن كە بنه‌ماى سه‌ره‌كيى ره‌واييى ده‌سه‌ڵات و حوكمڕانييە، دەبێتە مایەی بەهێزبوونەوەی هەرێمی کوردستان و هەر بەوەش دەتوانرێ رۆڵ و ئاماده‌يى و كاريگه‌ريى پێویست له به‌غدا بۆ به‌رگرى له ماف و نان و ده‌ستكه‌وته‌كانى خەڵك دەستەبەر بكرێت.
