ئاماژەكان بۆ ئەوە دەچن، ئەم هەڵبژاردنە، واتە هەڵبژاردنی شارەوانییەكانی توركیا لە 2024، هەدەپە، بە شێوەیەكی نهێنی كەوتبێتە دانوستان لەگەڵ ئاكەپە، ئەمەش پێشوازیی باشی لە باكووری كوردستان لێ كراوە، بەتایبەت بنكەی جەماوەریی هەدەپە و ئەو كوردانەی موحافیزكارن و دەنگ بە ئاكەپە دەدەن. دەر كەوت هەدەپە هیچ دەرچەیەكی نییە تا بتوانێت بەپێی خۆی بوەستێت، تاكە دەرچەی، دانوستان و رێككەوتنە لەگەڵ ئاكەپەدا، چونكە ئۆپۆزسیۆنی توركیا، هەدەپەی بەكار هێنا و بەنهێنی لەگەڵ نەژادپەرست و دژە كوردەكان رێك كەوتبوو و دەنگدەری هەدەپەی وەك كەوێك لەناو قەفەسدا حیسابی كردبوو، كەی ویستی یان پێویستی پێی بوو دەریبهێنێت و لە بەرژەوەندیی خۆی بەكاری بهێنێت.
یەكێك لە دەسكەتەكانی پرسی چارەسەری لە 2013، دامەزراندنی هەدەپە بوو، هەروەها رێگەخۆشكردن بوو بۆ ئەو پارتە، تا بتوانێت وەكوو پارت بچێتە پەرلەمانەوە، هەرواش بوو و توانی لە هەڵبژاردنی 2015 بەربەستی هەڵبژاردن بشكێنێت و 80 كورسیی بردەوە. لە هەموو ئەو سەردەمانەی نێوانی هەدەپە و ئاكەپە خۆش بووە، یاخود لەناو رێككەوتنێكدا بوونە، كورد حەساوەتەوە و دەنگی گوللە كپ بووە و دەنگی ئاشتی بەگوێی گەلدا بەرز بووەتەوە، بەپێچەوانەوە، جەرگی دایكان سووتاوە و دەرگای زیندان بۆ پەرلەمانتار و سەرۆك شارەوانییەكانی هەدەپە كراوەتەوە، جا بۆ ئەوەی هەدەپە لەو گۆشەگیری و فشارە رزگاری بێت، پێویستە بكەوێتە دانوستان لەگەڵ ئاكەپە، بەتایبەت لە هەڵبژاردنی شارەوانییەكانی 31ی 3ی 2024، چونكە ئاكەپە زۆر پێویستی بە دەنگدەری هەدەپەیە، بەتایبەت لە (ئیستانبوڵ، ئەنكەرا، ئەنتاڵیا).
ئەو هەڵبژاردنە، بۆ ئاكەپە زۆر گرنگ و ستراتیژییە، چونكە تاوەكوو ئێستا نەیتوانیوە قەڵای ئۆپۆزسیۆن بڕووخێنێت، ئەگەرچی 12 هەڵبژاردنە هەمیشە براوەیە.
لینین، دوای ئەوەی شۆڕشی ئۆكتۆبەری كرد و توانیی بەسەركەوتوویی لێی بێتە دەرەوە، دەڵێت ئێمە لە شۆڕشدا سەركەوتوو بووین، بەڵام بەو مانایە نییە، كە بۆرژوازیمان لەناو بردبێت و كۆتاییمان پێ هێنابێت، نەخێر ئەوان ئێستاش بەهێزن و بەدوای هەلێكدا دەگەڕێن، تا حكوومەتی سۆڤیەت لەناو ببەن و بگەڕێنەوە سەر دەسەڵات، بۆیە قۆناغە سەختەكە ئێستایە و دەبێت بۆ لەناوبردنیان بەردەوام لە شۆڕشدا بین.
ئەم گوتەیەی لینین، بەسەر ئێستای ئاكەپە و رەجەب تەییب ئەردۆغاندا جێبەجێ دەبێت، راستە ئەردۆغان براوەی هەڵبژاردنی 14ی ئایاری 2023یە، بەڵام تاوەكوو ئێستا نەیتوانیوە بەتەواوی ئۆپۆزسیۆن لاواز بكات، بەڵكوو ئۆپۆزسیۆن هەمیشە لە هەوڵدایە تا بتوانێت هەر هیچ نەبێت لە هەڵبژاردنی شارەوانییەكاندا، شارەوانییە گەورەكانی وەكوو (ئیستانبوڵ، ئەنكەرا، ئەنتاڵیا، ئیزمیر) بباتەوە، لەو دەرگایەشەوە بەرەو سەركەوتنی هەڵبژاردنی سەرۆكایەتیی 2028 هەنگاو بنێت، بۆیە ئەردۆغانیش پێویستی بە هەدەپەیە، چونكە بەبێ هەدەپە، ناتوانێت ئەو شارەوانییە گەورانە بباتەوە و حوكمی تێدا بگێڕێ.
ئەردۆغان، جیا لە ئیستانبوڵ، چاوی لە ئەنتاڵیایە، چونكە ئەو شارە بە پایتەختی گەشتیاریی توركیا دادەنرێت و ساڵانە ملیۆنان گەشتیار رووی تێ دەكەن و داهاتێكی زۆریشی هەیە، بۆیە مەولوود چاوشئۆغڵوی كردووەتە بەربژێر بۆ هەڵبژاردنی شارەوانییەكان، بەڵام دەنگی ئاكەپە، تەنانەت لە هەڵبژاردنی سەرۆكایەتیی 2023شدا لە دەنگی ئۆپۆزسیۆن كەمتر بووە.
لە هەڵبژاردنی شارەوانییەكانی 2023، كەمال كلیچدارئۆغڵو لە ئەنتاڵیا توانی 926 هەزار و 707 دەنگ بەدەست بهێنێت، ئەردۆغانیش 689 هەزار و 175 دەنگی هێنا، بەڵام دەنگی كلیچدارئۆغڵو، دەنگی هەدەپە و پارتی خاس و سەعادەتیشی لەگەڵدا بووە.
بۆیە ئەگەر دەنگی هەدەپە بخەیتە سەر دەنگی ئاكەپە، ئەمەش لە ئەگەری رێككەوتنی ئەو دوو پارتە لە هەڵبژاردنی داهاتووی شارەوانییەكان، ئەگەر زۆرە چاوشئۆغڵو بتوانێت براوەی هەڵبژاردن بێت، چونكە هەدەپە، خاوەنی زیاتر لە 100 هەزار دەنگە لە ئەنتاڵیا.
هەدەپە، بۆ ئەوەی بتوانێت درێژە بە سیاسەت بدات، دەبێت خۆی لەژێر فەرمانی پەكەكە دەربهێنێت، دەبێت بۆ ئەم هەڵبژاردنە خاوەنی ستراتیژییەتی خۆی بێت، ئەو ستراتیژییەش نزیكبوونەوەیە لە ئاكەپە، نەك بەو مانایەی بەرامبەر بە ئاكەپە خۆی بچووك بكاتەوە، نەخێر بەو مانایەی ئاكەپە، پێویستی پێیەتی و ئەویش پێویستی بە ئاكەپەیە، بۆیە بۆ بەرژەوەندیی كورد و بوونی هێزی كورد لەناو پەرلەمانی توركیا و كاریگەرییان لە هاوكێشەی سیاسیی توركیا، دەبێت ئەمجارەیان هەدەپە بەدوای ئۆپۆزسیۆن نەكەوێت، ئەو ئۆپۆزسیۆنەی بەنهێنی لەگەڵ ئومید ئۆزداغ كەوتبووە رێككەوتن، بەوەی ئەگەر كلیچدارئۆغڵو، ببێتە سەركۆماری توركیا، ئۆزداغ دەكاتە وەزیری ناوەخۆی توركیا، ئەو ئۆزداغەی بڕوای بە نەتەوەی كورد نییە و رۆژانە سووكایەتی بە كورد و سەركردەكانی دەكات.
ئاكەپە، تاكە داوای لە هەدەپە ئەوەیە، لە هەڵبژاردنی شارەوانییەكاندا بەربژێری خۆیان هەبێت و دەنگ بە بەربژێری ئۆپۆزسیۆن نەدەن، لەبەرامبەردا، ئەوانیش چەند داواكارییەكی هەدەپە جێبەجێ دەكەن، وەكوو قەیووم نەكردنی شارەوانییەكانی هەدەپە و هێنانە بەرباسی پرسی چارەسەری، بەڵام بەشێوازێكی دیكە و رەنگە ئازادكردنی سەڵاحەدین دەمیرتاشیشی بەدوادا بێت، بەڵام ئەگەر پەكەكە فشار بكاتە سەر هەدەپە و زۆریی لێ بكات دەست نەخاتە ناو دەستی ئەردۆغان، ئەوكات باجەكەی بۆ هەدەپە زۆر قورس دەبێت، بەتایبەت ئەگەر بەهۆی هەدەپەوە، ئەردۆغان، شارەوانییەكانی ئیستانبوڵ و ئەنتاڵیا بدۆڕێنێت.
