داوا كراوە وەزیری دارایی حكوومەتی بەغدا و وەزیری دارایی هەرێمی كوردستان بچنە ئەنجوومەنی نوێنەران (پارلەمانی ئێراق). پاشان دوێنێ سوودانی بە ئاشكرا گوتی: شتێ نییە ناوی مووچەی فەرمانبەرانی هەرێمی كوردستان لە بودجەی ئیتیحادیدایكە خۆدزینەوەیە لە هەر بەرپرسیارێتییەك لەو ڕەوشەی دروست بووە لەنێوان هەرێم و بەغدادا.
ئەو پرسە دوو ڕووی هەیە: قانوونی و سیاسی:
1: لە ڕووی قانوونییەوە، وەزیری دارایی هەرێمی كوردستان لە پارلەمانی ئێراق متمانەی وەرنەگرتووە، تا بچێتە بەردەم ئەو پارلەمانە.
2: لە ڕووی سیاسییەوە. ئەگەر بچێ ئەوا دەبێتە (سابیقە)یەك كە هەر ڕۆژە بە ناوی مێوانداریكردن كاربەدەستانی دیكەی هەرێمی كوردستان پەلكێش بكەن و هەق و حیسابی عارەبانەیان لەگەڵدا بكەن! ئەگەر وەزیری دارایی نەشچێ ڕەنگە لایەنە فەڕمانڕەواكانی ئێراق بیقۆزنەوە و بڵێن ها ئەوە هەرێمی كوردستان لە ڕووبەڕووبوونەوە و دەرخستنی ڕاستییەكان دەترسێ. (قول الحق یراد به الباطل).
3: ئەمە هەمووی بنكۆڵكردنی هەرێمی كوردستانە وەكوو یەكەیەكی فیدراڵیی دەستووری بەتایبەتی كە وا هزر دەكەم لایەنە باڵادەستەكانی شیعە، لە ساڵی داهاتووشدا ئاستەنگ بۆ كۆمیسیۆنی باڵای سەربەخۆی هەڵبژاردنەكان لە ئێراقدا دروست بكەن كە لە 7ی 1ی 2024دا ویلایەتەكەی كۆتایی دێ بەو ئاراستەیەی كە نەكرێ لە 25ی شوباتی 2024 هەڵبژاردن بۆ پارلەمانی كوردستان بكرێتەوە و حكوومەتێكی نوێ دروست بكرێ. بەو مانایەی بۆشایی دەستووری لە هەرێمی كوردستاندا بەردەوام بێ.
4: تا 19ی ئەم مانگە كە گوایە دوا وادەی ئێرانە بۆ چەككردنی حزبەكانی ڕۆژهەڵاتی كوردستان، فشارەكان بۆ سەر هەرێمی كوردستان و حزبەكانی ئێرە زیاتر دەبن و بەغداش هاوئاهەنگ لەگەڵ ئەم فشارە هاوئاواز دەبێ و توركیاش بەڕای خۆم دەستێكی لەو پلانەدا هەیە.
5: ئاسان نییە لەیەك كاتدا ڕووبەڕووی ئەو هەموو تەحەددییاتانە ببینەوە، بەڵام ئەگەر لایەنە كوردستانییەكان تەبا بن و پێكەوە بڕیار بدەن كە چۆن مامەڵە لەگەڵ ئەو وەزعە سیاسی و داراییی و “سەربازی”یە بكەن ئەوا زیانمان كەمتر دەبێ.
6: هەڵبەت یەكێ لە بژارەكان، كشانەوەیە لە هەموو دەسەڵاتە گشتییە ئیتحادییەكان: وەك سەرۆكایەتیی كۆمار، پارلەمانی ئێراق، دادگەی باڵای ئیتیحادی، حكوومەتی ئیتیحادی و هەر دەستەیەكی دیكە. جاڕی ئەوەش بدرێ كە حكوومەتی ئیتیحادی، حكوومەتێكی نوێنەرایەتی نییە بەو مەرجەی كەوا ئێمەی گەلی كوردستانی تێدا بەشدار نییە. حكوومەتێكە جیاكاری دەكا لەسەر بنەمای نەتەوەیی و مەزەبی و…
7: دیارە ڕێگەی ملكەچكردن و تەسلیم بوونیش هەیە!
