لۆزان لە فنجانی قاوەیەکی ئیسپریسۆدا !
شکاندنی شکۆی کورد لە کافێکانی ئەوروپادا.
خەمی هەڵوەشاندنەوەی غەدری پەیماننامەی لۆزان خەم و پڕۆژەیەکی گەورەیەو لەناو فنجانی قاوەیەکی تاڵدا نییە لەکافێکانی ئەوروپادا، تا بەچەند وتارو بڵاڤۆک و کۆنفڕانسێک چارەسەری بکەن و وەک جینۆسایدی کوردان و پرسە دیموکراسی و نیشتیمانیەکانی دیکەو ئاڵای کوردستان، ئەویش پەرت بکەن، ئەسڵەن بەوجۆرە شکۆی کورد ناپارێزرێ و گوتاری کوردو ئێش و ئازارەکانی نانوسرێتەوە، خۆری کوردان تەنها لە ناوخۆی نیشتیمانەوە هەڵدێ و لەسەر خاکی خۆی و بە مۆڕاڵی بەرزو ئیرادەو یەکڕیزیی نەتەوەیی نەک پەرتەوازەیی و حیزبی.
لۆزان خۆ شانازیی نییە بۆ ئەوروپا، تا مرۆڤی کورد سناپی پێوە بکات و وێنەی شارستانیەتی ئێستای پەڕلەمان و مۆزەو موزیک و ئۆرکێستراو شەقام و هۆتێل و کافێکانی بگرێت و بەئایدۆلۆژیی بکات لە گەشتێکی کاتی و ڕاگوزەردا، شورەیی و شەرمە بەنێوچاوی سویسرای بوکی ئەوروپاوە، لۆزان دەلیل و سڵۆگانێکە بۆ دڵڕەقی و جەهل و فەسادی سیستمە ئۆرستۆکراتی و دیموکراتی و پادشاییەکانی ڕۆژئاوا کە نەیانتوانی بۆ یەک جار لەگەڵ دەوڵەتی سەربەخۆو مافە دیموکراتیەکانی کوردا تەبا بن
لۆزان مێژووی درۆی سپی و ڕەشی ڕۆژئاواییەکانە وەک هەموو درۆکانی تریان، وەک چۆن فابریکەو کۆمپانیاکانیان بە بەرنامە چەکی کوشندەی کیمیایی سیانیدو خەردەلیان دروست کردو لەسەر دەستی، سەدانی وەک فراس ڤان ئانراتی سپیپێستی هۆڵەندی ڕاسیست و بکوژ، فرۆشت و بەخشی بە ڕژێمی سەددامی دیکتاتۆر، دواتر دەهاتن فرمێسکیان بۆ لۆزان و هەڵەبجەو ئەنفال دەڕشت ، لۆزان تاوان و برین و غەدرێکی مێژوییەو هێشتا خوێنی لێدەچۆڕێ لەجەستەو زیهن و فیکرو ئایدیای کوردی ڕەسەنداو درۆی کاراکتەرە سیاسیەکانی ئەوروپاو قاوەخواردنەوەی ملپێچ سورەکانی خۆمان و دژە ناسیۆنالیستەکان و ڕاوێژکارو خانەنشینانی ناڕازیی، هەرگیز چارەی ناکات و قەرەبووی ناکاتەوەو بەم فۆڕمەش یادی ناکرێتەوە.
دەبێت کورد گوتاری جددی ڕووبەڕوو بوونەوەی هەبێ لە ئێستادا دژی فاشیزمی نوێ و دیکتاتۆریزمی ناوچەکە، تۆی کورد دەبێ هەست بە گەرمایی ئەو غەدرە بکەیت و زیهنییەت و پەرێزو دیدگات پاک بکەیتەوە لە هەر ئاراستەیەکی دژە نەتەوەیی و جڤاکیی و نیشتیمانی، تا مۆدێلی قەهرو ستەمکاری و غەدری مونەززەمی هەرێمایەتی و غەربی دژی گەلی کورد ستۆپ پێبکەین و بگۆڕین بە دۆخێکی باشتر لە ئێستا.
ڕێککەوتن و پەیماننامەکانی وەک سایکس پیکۆ و لۆزان و سەعدئابادو جەزائیر هێشتا ئامادەیەو ئەوروپیەکان باشتر ئاگایان لێیەتی، تاوەکو بیزنس و نەوت و گازی سروشتی و سیخوڕی و سپکردنەوەی پارەکانیان بەردەوام بێت، کەچی تۆی سادەو سایلە، وادەزانی پێکەنینی سیاسیەکی کەڵتەکۆنی بێویژدانی ئەوروپی و ڕۆژئاوایی دەتوانێ بەری پێبگرێ و قەرەبووی ئەو غەدرانەی مێژوو بکاتەوە.
