گوتیان حوشتر مژدەمان بدەرێ كوڕێكت بوو، ئەویش گوتی: كوڕم ببێت یان كچ، كۆڵی خۆم بە كۆڵمەوەیە و كەس بۆم هەڵناگرێت!
توركەكان ئێژن: كوردی باش ئەوەیە كە لە ژێر خاكدایە، بیری دژە كوردی و دژە نەتەوەكانی ترلە هزری تاكی توركدا( زۆرینەیان) پەیوەندی نییە بەوەی كە ئەو توركە لەم بەرەیە یان ئەو بەرە، بەڵكو پەیوەندی بەو میراتە ڕەگەزپەرستییەوە هەیە كە لە چەندین باوانەوە بۆیان ماوەتەوە!
كێ لە هەڵبژاردنی داهاتوی توركیادا بیباتەوە، باری كورد هەر بەسەر شانی خۆیەوەیەتی و نە عەلمانییەكی توركی و نەقەومییەكی توركی و نە موسڵمانێكی توركی، بۆی هەڵناگرێت!
هاتنی ئیسلامییەكانی توركیا بۆ سەر حوكم، دەرئەنجامی سیاسەتی خراپی قەومی و بەناو عەلمانییەكانی توركبوو، لێشاوی بە ئیخوانبوونیش لەو وڵاتەدا كاردانەوەبوو لە حوكمی خراپی ئەوانەی پێشوو، ئەمڕۆش كە دەرئەنجامەكە پێچەوانە ئەبێتەوە و خەڵكی لە حوكمی ئیسلامییەكانی توركیا ڕائەكەن، هەر هەمان هۆكارە كە ئەویش خراپی حوكمدارییە!
توركەكان كاتێك حاكمێك یان حیزبێك ئەگۆڕن، بۆئەوە نایگۆڕن كە ئەو حاكم و حیزبە لەگەڵ كورددا خراپ بوە و نەتەوەكانی تری توركیای عەزیەت داوە، بەڵكو هۆكاری گۆڕینەكە پەیوەندی بە بەرژەوەندی توركیا و توركەكانەوە هەیە!
ئەوەی بە ناوی دینەوە لەم ساڵانەی ڕابوردودا حوكمی توركیای ئەكرد، بەرانبەر كورد و بەرانبەر نەتەوەكانی تریش لەوانەی پێشی خۆی باشترنەبوو، ئەوانەش كە سبەینێ یان چوارساڵی تر بێنە سەرحوكم لەمانەی ئەمڕۆ باشترنابن!
دژایەتی ئێمە بۆ ئەردۆگان دژایەتییەكی ڕەوایە، بەڵام هیوا هەڵچنین لەسەر كەسێكی تر كە هەر لە ئێستاوە هەڕەشە لە چەند هەزارێك ئاوارەی سوری و چەند هەزار پەناهەندەیەكی بێ دەرەتان ئەكات، ئەوپەڕی نائومێدی و سەرلێشێوانە، چونكە هیچ كەسێكی ڕەگەزپەرست ناتوانێت حوكمێكی باشبكات.
ئەوەی سەیرە لەلام ئەوانەی لە كوردستانی باشوردا كەوتونەتە سەنگەری پارێزگاری ئەردۆگان، خەڵكە بەناو ئیسلامییەكانی كورد و هەندێك لایەنن كە بەرژەوەندی ئابووری و سیاسی زۆریان لەگەڵ ئاكەپە هەیە، لەڕاستیدا ئەبوو بەرە ئیسلامییەكانی كوردستان وەكچۆن نكوڵی لە ئیسلامبوونی داعش و ئاخوندەكان ئەكەن و كار و كردار و ڕەفتارە ناشیرینەكانیان بە دوور لە دینی ئەدەن لەقەڵەم، ئاواش ئەردۆگان و كار و كردەوەكانی ئەو ڕژێمەیان ئیدانە بكردایە و بە دورلەدینی و نائیسلامیبوون بیان ناساندایە( ئەوە جوانتر ئەبوو)، ئەوانەشی كە هیوایەكیان بە گۆڕینی ئەقڵی نەژادپەرستی دەسەڵاتدارانی تورك هەیە دوای ئەردۆگان، بێگومان ئەو خەونە نایەتەدی كە لە ژێر حوكمیاندا ئاهێك بەبەری كورددا بێتەوە.
نەژادپەرستی و شۆڤێنییەتی زۆرینەی تورك پەیوەندی بە ئیسلامی و عەلمانی و قەومییەوە نییە، مەلایەكی تورك و ئارەقخۆرێكی تورك و گەنجێكی تورك كە لە ئەوروپا لەدایكبووە و جەندرمەیەك لە دژایەتی كورددا جیاوازییان نییە!
كەواتە وەكچۆن ئەوان ئەڵێن كوردی باش ئەوەیە لەژێر خاكدایە، ئێوەش بڵێن باشیان لە خراپیان خراپترە و ئیتر ئەوەنە دانەكیڕە مەكەن لەیەك!
بنیشن وەخەیر.
