لەگەڵ ئەوەی ماوەیەكی كەمە هێرشە سەربازییەكانی توركیاو گروپە چەكدارییەكان دەستیپێكردووە، بەڵام رۆژ لەدوای رۆژ ئاسەوارەكانی داگیركاری توركیا بۆ باكوری سوریاو ناوچە كوردییەكان ئاشكرا دەبن، ئەوەش وای لە رێكخراوی نەتەوە یەكگرتووەكان كرد لێكۆڵینەوەی فەرمی لەبارەی تاوانەكانی جەنگ بەرامبەر بەكورد بكەن.
دوای بڵاوبوونەوەی وێنەی (محەمەد)، ئەو منداڵەی كە جەستەی بەچەكی قەدەغەكراوی توركیا سوتا، گۆڤاری (نیوزویك)ی ئەمریكی چەندین وێنەی مەترسیداری تری بڵاوكردەوە، كە قوربانییەكانی كوردنو بەهەمان چەكی قەدەغەكراوی توركیا سوتاون، بەشێوەیەك بەدەگمەن كەسەكان دەناسرێنەوە.
ئەو گۆڤارە لەراپۆرتێكیدا نوسیوییەتی: “ئەوەی زۆرترین باسی لێوە دەكرێت لەم جەنگە داگیركارییەی سوریادا، بەكارهێنانی چەكی قەدەغەكراوی كیمیاویو موشەكی سوتێنەرە، كە ئامانج لە بەكارهێنانی رووناككردنەوەیە لەشەودا، بەڵام ئەو چەكانە بەشێوەیەكی خراپ جەستەی مرۆڤ دەسوتێنێت”.
راپۆرتەكە ئاماژەی بەوەش داوە: “لەئێستادا توركیا بەوە تاوانبار دەكرێت كە فسفۆری سپی بەكارهێناوەو چەند وێنەیەكیشمان دەستكەوتووە كە بەڵگەی زیاتر نیشان دەدا”.
لە راپۆرتەكەی (نیوزویك)دا هاتووە: “لەگەڵ ئەوەی زۆربەی شەڕڤانە كوردەكان سەر بەهێزەكانی سوریای دیموكراتنو هاوبەشێكی سەرەكی ئەمریكا بوون لە شەڕی دژی داعش، بەڵام ئەو هاوبەشییەیان لەم شەڕەی ئێستادا دژی توركیا نەماوە”.
راپۆرتەكە ئەوەشی رونكردۆتەوە كە فسفۆری سپی بۆ روناككردنەوە لە شەودا بەشێوەیەكی بەرفراوان بەكاردێت، بەڵام ئەم فسفۆرە لە پرۆتۆكۆلی سێیەم رێككەوتنی قەدەغەكردنی چەكدا، بەكارهێنانی لە شوێنی قەرەباڵەغو دانیشتوانی مەدەنی چڕدا قەدەغە كراوە.
لەوبارەیەوە (سیا پیدەرسن) رۆژنامەنوسی سەربەخۆی دانیماركی كە وێنەی قوربانیانی فسفۆری سپی لە باكوری سوریای گرتووە، حاڵەتەكە بە ترسناك ناودەباتو لەزاری یەكێك لە پزیشكەكانەوە دەڵێت: “پێویستیمان بە شارەزاو پسپۆر هەیە كە لێكۆڵینەوەی لەبارەوە بكات، چونكە حاڵەتێكی زۆر ناسروشتییە”.
ئەو رۆژنامەنوسە چەندین وێنەی قوربانییەكانی فسفۆری سپی گرتووە، كە دەیسەلمێنێت توركیا فسفۆر سپی دژی كوردەكان بەكارهێناوە.
وەرگێڕان/ کاوان
