هەیان بوو بەپاساوی، سیاسی یان ئابوری یان جیۆسیاسی دژبوون، بەڵام هەیان بوو بەپاساوی مەزهەبی و نەتەوەیی.
بەشێك لەدژبەرانی ڕیفراندۆم لەناوخۆدابوون و بێ پەردە وتیان نەخێر لەئێستادا. هەیانبوو هاوڕێی نیوەڕێ، لەسەرەتاوە هاوڕابوون، لەنیوەی ڕێ پاشگەزبوون.
دژەكانی ڕیفراندۆم، جۆری دیكەشیان هەبوو، هەیانبوو لەسەرەتا وایانزانی گەلی كورد وەك كارتی فشار باسی ڕیفراندۆم دەكات، بۆیە دژایەتییەكی ئەوتۆیان پیشان نەدا، بەڵام كاتێ بۆیان دەركەوت كورد بەڕاستی دەیەوێت سەربەست بێت، كەوتنە دژایەتی، پەلامار و دروستكردنی بەربەست.
بەشێك لەوانەی دژایەتی ڕیفراندۆمیان كرد، وەك تابوری پێنج لەناوخۆدا و بۆ ساردكردنەوەی كورد لەدەنگدان بەسەربەخۆیی، شەڕی دەرونی و پڕوپاگەندەییان بەكارهێنا. بەشێكیان بەبەرنامە ئاستەنگی ڕاستەوخۆیان دروستكرد وەەك هەڕەشەی دانەنانی سندوقەكانی دەنگدان لەچەند دەڤەرێكی كوردستان.
ئەوانەی لەناوچەكەدا زلهێزبوون، وێڕای دانانی فشار و ناردنی شاندی جۆراوجۆر بۆ ڕاگرتنی خواستی سەربەخۆیی، بەڵام لێنەگەڕان و سیناریۆی سەربازی و گەمارۆی ئابوریشیان بەكارهێنا.
سەرۆككۆماری توركیا ڕەجەب تەیب ئەردۆگان” گەیشتە ئەوپەڕی لەدەستدانی مرۆڤایەتی و لەپای پرۆسەیەكی دیموكراسی ئاشتیانە، سوكایەتی بەهەموو گەلی كورد كردو، هەڕەشەی جینۆسایدی گەلێكی كرد و گوتی: سنورەكانیان لێدابخەین كورد لەبرسان دەمرن.
ئێرانییەكان سنوریان داخست و گەمارۆی ئابورییان سەپاند بەسە خەڵكی كوردستاندا. بەبەرچاوی هەموو جیهان و سزای بەكۆمەڵی خەڵكی كوردستانیان دا.
ئێراقییەكان گەیشتنە ترۆپكی دژایەتی و بەپێچەوانەی دەستور و پێكەوەژیان و هەماهەنگی چەندین ساڵەوە، هێزی سەربازی و تانك و زریپۆشیان بەكارهێنا، لەئەنجامیشدا بەشێكی زۆر لەخاكی كوردستانی بەزۆری هێزی سەربازی داگیركردەوە.
حەیدەر عەبادی لەمێژووی كوردا دەبێتە نمونەی هەرە دیاری ئەو دوژمنانەی كورد كە دەستیان بەخوێنی كورد سورە و بەشدارن لە كوشتنی خەونەكانی كورد بۆ سەربەخۆیی و سەروەری.
وێڕای ئەوەی دژەكانی ڕیفراندۆم بەچەندین ئامراز و شێواز، تا بەڕشتنی خوێنی دەیان كورد كۆتایی هات، دژایەتی خۆیان بۆ ڕیفراندۆمی سەربەخۆیی ڕاگەیاند.
گەلی كورد وەك خوی هەمیشەیی خۆی، بەرپەرچی هێرشەكانی داگیركەرانی دایەوە. پێشمەرگە لەسەردەمی دیجیتاڵدا موعجیزەی پیشانی جیهاندا و پێشكەوتووترین تانكەكانی ئەبرامزی ئەمریكی كەداگیركەران بۆ سەركەوتكردنی كورد بەكاریان هێنا، تێك و پێك شكاند.
پردێ و سحێلا، بوونە دوو تایتڵی بەرەنگاری كورد، بوونە گۆڕستانی دوژمنان و ئەبرامز.. لەئەنجامی بەرخۆدان و بەرگری پێشمەرگەی كوردستان، وەزارەتی دەرەوەی ئەمریكا هاتە سەرخەت و پەیامی دا” كوردستانێكی بەهێزمان دەوێت” ئیدی داگیركەران هێرشەكانیان ڕاگرت.
دواتر كۆشكی ئەلیزێ هاتە سەرخەت و گەمارۆی دیپلۆماتی و سیاسی سەركوردستانی شكاند. بەوەی سەرۆكوەزیران و جێگری سەرۆكوەزیرانی كوردستانی بانگهێشتكرد بۆ پاریس.
لەكایەی ڕیفراندۆمدا، كورد دۆست و دوژمنە ناوخۆیی و دەرەكییەكانی خۆی باش باش ناسییەوە. كە زەمەن و پێشكەوتن و كرانەوە نەیگۆڕیون و ئەوان بەرانبەر كورد هەر دوژمنە ڕق لەدڵەكانن. كوردستانیش بە سەرمایەی ڕیفراندۆم، بۆ مێژوو، بۆ نەوەكانی داهاتوو لەو ململانێیە هاتە دەرەوە.
ڕیفراندۆم، سۆنەرێكی گەوهەریی بوو بۆ دەرخستنی دۆست و دوژمنەكانی كورد چ لەناوخۆ چ لەدەرەوە. سڵاو لەڕیفراندۆم و ئەوانەی گوتیان بەڵێ و ئەو دۆستانەش كە هەرگیز پشتی ریفراندۆمیان بەرنەدا. نەفرەت لەوانەش كە دژی ڕیفراندۆم و دژی مافی سەربەخۆیی گەلی كورد و گەلانی ژێردەستەی ترن.
ڕیفراندۆم گوتی، لەسەدەی 21 دا دەبێ كۆتایی بەژێردەستەیی كورد بێت. هەمووشمان پێكەوە گوتمان : بەڵێ …
