هیچ پاساوێک، رەوایی ناداتە ئەوەی تۆ لە پەرچەکرداری هەر شتێکا بێ، لەسەر شاشەی تەلەڤزیۆن کۆماری ئیسلامیی ئێران -کە خۆی لە حاڵەتی هەڵچووندایە و مووشەکدانی دەگڕێ!!- لە وڵات و میللەتی خۆت، لە هەرێمی کوردستان هان بدەیت، گوایە لە سنوورەکانی هەرێمەوە هەزاران درۆن و سیخوڕی ئیسرائیلی براونەتە خاکی ئێران، لەکاتێکا چاک دەزانیت ئێران باکی نییە لەوەی بەو تۆمەتە وڵاتەکەت بکاتە سووتماک، ئاخر خواردنی چ پاروویەک لە هەرێم ئاسانترە؟ خۆ ئەگەر بەحساب و خەیاڵ وابزانی تۆ لە دەسەڵاتی هەرێم یان حزبێ لەو دوو حزبە دەسەڵاتدارە دەدەیت، بەڵام دڵنیابە ئەگەر ئێران بڕیار بدات ئەوە بەجیددی وەربگرێ، قوربانیی سەرەکی ژیانی خەڵک دەبێ، وەک چۆن کێشەی دەسەڵاتی هەرێم و بەغدا خەڵک باجەکەی دەدەن…
هەرچەند پێم وانیە ئێران بۆ زانینی راستیی ئەو دیعایەیە پشت بەو لێدوانانەی ئەو کارەکتەرە خۆماڵییانە ببەستێ، بەڵام گەر گومانێکی وا لەئارایشدا بێ، بۆ دەبێ کوردێک بێت ئەم بابەتە بوروژێنێ، کە سەرەنجام بەزیانی میللەت و هەرێمەکەی دەشکێتەوە، عەرەبێک، فارسێک، تورکێک، ناحەزێکی کورد، یان هاوشەڕێکی ئێران ئەمە بڵێ سەیر نییە، بەڵام نەک کوردێک، کە ئەو قسەیە هیچ سوودێکی نە دین نە دنیای تێدا نییە…
پاشان پێنج شەش وڵات سنووری بەرفراوانیان لەگەڵ ئێراندا هەیە (تورکیا، ئازربایجان، ئەرمینیا، ئەفغانستان، پاکستان و ئێراقی عەرەبی)، کە ئەمەریکا ئەگەر بیەوێ بەخۆشی بێ یان بەترشی، بەئاشکرا بێ یان بەنهێنی، دەتوانێ ئەو شتانە لەو سنوورانەوە ئاودیوی ئێران بکا، بۆ دەبێ کاک ئەحمەد زەردۆیی لای خۆمان، کە من دوور بەدوور خۆشم ویستووە، بەبێ تەحقیق، کە رەنگە ساغکردنەوەی مانگان و ساڵانی بوێ، هێندە لە ئەستۆپاکیی دەسەڵاتدارانی ئەو وڵاتانە دڵنیا بێ کە بێتاوانن و ئیللا و بیللا هەر دەبێ لە سنوورەکانی هەرێمەوە ئاودیو کرابن…
فەرەزەن زەننی راجیحیشت هەبوو کە وایە، دەبوو خۆت بگری و پەلەنەکەی تا یەکلا دەبێتەوە، ئەی چی دەڵێی ئەگەر ساغ بوویەوە لە وڵاتێکیترەوە بووە؟ ئەنجا دەڵێ “لە ئێراقی شیعییەوە نەبووە چونکە هاومەزەبن”، ئێ برا کەی هاومەزەبی و هاودینی و هاوزمانی بوونەتە بەربەست لەبەردەم ململانێ و ناکۆکیی بەرژەوەندی و تەنانەت بەشەڕهاتنیشدا؟ لە شەڕی نێوان ئازربایجانی شیعە و ئەرمینیای مەسیحیدا، ئێران پشتیوانی لە ئەرمینیا دەکرد و تورکیای سوننەیش لە ئازربایجان.
ئەی مەگەر نەوترا جاسوسێکی شیعەی ئێرانی شوێنی حەسەن نەسروڵای بۆ ئیسرائیل ئاشکرا کردوە؟ چی دەڵێن ئەگەر دەرکەوت لە بەشە شیعییەکەی ئێراقەوە ئاودیو کراون؟ پاشان، ئەگەر ئەمەریکا بیەوێ لە سنوورەکانی هەرێمەوە شتێ ئاودیو بکا، دەسەڵاتدارانی هەرێم دەتوانن نەهێڵن؟ هەر بەڕاست دەتوانن؟؟!! مەگەر عەبە مەخمووری نەیوت: کە ئەمریکا وتی گۆ، پیاو هەیە بڵێ ناگۆ!!! لەبەرئەوە بەبڕوای بەندە یەکێک لە ناباشترین لێدوانەکانی کاک ئەحمەد، بەداخەوە هەندێ برادەریتری کۆمەڵیش، ئەو لێدوانەیەتی و هەر بەڕاستی ئەگەر ئەوە سیاسەتکردن بێ، سیاسەت و گەمەیەکی خراپە، هیوادارم درێژەی پێ نەدرێ…
