بۆچی ئەم جەنگە بۆ ئیسرائیل چارەنوس سازە؟
هەتا ئەو شەوەی حەماس ئاگری هەزاران موشەك و هەزاران چەكداری بەردایە گیانی ئیسرائیل و شۆكی كرد جیهان بە گشتی و ئیسرائیلیەكان و تەنانەت فەلەستینی و خودی حەماسیش پێیان وابو ئیسرائیل هێزێكی لە شكان نەهاتوە، هەموان پێیان وابو توانای دامەزراوەی ئەمنی و سەربازی و هەواڵگری ئیسرائیل لەسەروی خەیاڵەوەیەو هەرگیز نابێت بیر لەوە بكرێتەوە كە هێزێك هەبێت بتوانێت ئەم توانایە لاواز یان لەناوبەرێت، بەڵام حەماس لەچەند كاتژمێری شەوێكدا هەمو ئەو بۆچونانەی هەڵگێڕایەوەو كارێكی كرد كە نەك دەوڵەتی ئیسرائیل و خەڵكی ئیسرائیل بگرە جیهانیشی سەرسام كرد، ئەو چەند كاتژمێرە ئیسرائیل وەك نێچیرێكی بریندار وابو بەدەست ڕاوچیەكەوە، هەموان بوبوینە بینەری ئیسرائیلێكی لاوازو حەماسێكی بەهێزەوە، ئەم بارودۆخە ئەگەرچی هەرزو لەبەرژەوەندی ئیسرائیل گۆڕاو باڵانسی شەڕەكە پێچەوانەوە بۆوە بەڵام هێشتاش ئیسرائیل و ئیسرائیلیەكان شۆك بەری نەداون و تا پەنجا ساڵی تریش ئەو شۆك و ترسە لەناو مۆخ و ئیسكیاندا دەمێنێتەوە .
حەماس دەستی خۆی وەشاندوەو لەهەمان كاتدا دەستی ئێران و سوریاشی لە ئیسرائیل وەشاندوە بۆیە وێڕای بونە قوربانی هەزاران هاوڵاتی مەدەنی و ژن و منداڵ و وێران بونی بەشێكی زۆری غەززە كەچی داوای ئاگر بەست دەكات، ئەم داوایە هەروا بێ مەبەست نیە چونكە ئەگەر ئیسرائیل بەئاگربەست ڕازی بێت ئەوە ئەنجامی جەنگەكە بە بردنەوەی حەماس و دۆڕانی ئیسرائیل تەواو دەبێت، ئیتر هاو وڵاتی ئیسرائیلی متمانەی بەهێزو توانای دامەزراوە هەواڵگری و ئەمنی و سەربازی و بەرگریەكانی ولاتەكەی نامێنێت، دەرئەنجامیش یان بۆهەمیشە لەترسدا دەژی یان بەرەو ولاتانی ڕۆژئاوا كۆچ دەكات، لەملایشەوە حەماس و پشتیوانانی حەماس دەنگیان دلێرو باڵادەست دەبن و بەبێ ترس خۆیان بۆ گێمێكی دیكەی پەلاماردان ئامادە دەكەنەوە، پەلاماردانێك كە ئەمجارە ڕەنگە مەرگی ئیسرائیلی بەدوادابێت، ئیسرائیل ئەم ڕاستیە دەزانێت بۆیە وێڕای داواكاری حەماس و فشاری نەتەوە یەكگرتوەكان بۆ ئاگر بەست سورە لەسەر بەردەوامیدان بەجەنگ و دەست پێكردنی هێرشی زەمینی بۆ داگیر كردنی غەززەو لەناو ردنی حەماس.
ئەگەر ئیسرائیل حەماس لەناو نەبات ئەوا ئەمجارەش نەبێت جارێكی تر و دوانی تر حەماس خۆیان گوتەنی ئیسرائیل فڕێ دەداتە ناو ئاوەوە و لەسەر نەخشە دەیسڕێتەوە، بۆیە ئەم جەنگە بۆ ئیسرائیل جەنگێكی چارەنوس سازە ، هەر ئەوەشە وایكردوە كە تەڕو وشك پێكەوە بسوتێنێت و وەك فیلێكی بریندار بێ ڕەحمانە هەڵمەت دەبات و هەرچی بێتە ڕێی دەیپلیشێنێتەوە، ئەمریكاش ئەو ڕاستیە دەزانێت بۆیە وەزیری دەرەوەكەی لەدوایین لێدوانیدا گوتی ئێمە بەوردی چاودێری هێرشەكانی ئیسرائیل دەكەین بەڵام هێڵی سورمان نیە بۆی، ئەم وتەیە بەمانای هەڵكردنی گڵوپی سەوزە بۆشەڕی پاكتاوكردن و لەناو بردنی حەماس و ژێرخانە مرۆیی و ئابوری و سەربازیەكەی بەبێ گوێدانە مافی مرۆڤ و یاساو ڕێسا بەركارەكانی جەنگ و پاراستنی گیانی هاوڵاتی سڤیل.
ئەوەی ماوە بگوترێت ئەوەیە كە حەماس ڕاستە جادوی ئیسرائیلی بەتاڵ كردەوەو شۆكی كرد بەڵام باجێكی قورس دەدات كە بەمەرگی خۆی و هەزاران هاوڵاتی و وێران بونی غەززە كۆتایی دێت، ئیسرائیلیش ڕاستە شۆك بو و هەیبەت و گەورەیی شكا بەڵام بەلەناو بردنی حەماس و كوشتنی هەزاران كەس و وێرانكردنی غەززەو دوای ئەوانیش دەست وەشاندن لە حیزبوڵڵاو سوریاو ئێران هەوڵ ئەدات شكۆ بۆخۆی بگێڕێتەوە و دوژمنەكانی وا تەمبێ بكات كە ئیتر جورئەتی ئەوە نەكەن جارێكی تر وەك حەماس بیر پەلاماردانی بكەنەوە.
