سەدان ساڵە داگیركەرانی كوردستان بۆكۆنترۆڵكردن و لەناو بردنی شۆڕش و هەڵگەڕانەوە سیاسی و چەكداریەكانی كورد لە پارچەكانی كوردستان خەریكی ئەنجامدانی ڕێكەوتنی ئەمنی و سەربازین، تابەپێی ناوەرۆكی ئەو ڕێكەوتنانە هەردولا یان هەرسێ و چوارلای ڕێكەوتنەكە پێكەوە لە هەر جوڵانەوەیەك بدەن كە كورد بەرپای دەكات، لاپەڕەكانی مێژوی ئێمە پڕە لەو شۆڕش و ڕاپەڕین و خەباتە سیاسی و چەكداریانەی كە دوای ساڵانێك لەبەرپابونیان ئەم وڵاتانە پێكەوە بەهەماهەنگی لەناویان بردوە، كە دواترینیان شۆڕشی ئەیلولی مەزن بو كە ئێران و ئێراق بەئاشكراو ولاتانی توركیاو سوریاو ئەمریكاو سۆڤیەت و بەریتانیاو جەزائیرو چەند ولاتێكی دیكەش لەپشتی پەردەوەپێكەوە ڕێكەوتنیان كرد بۆ لەناو بردنی.
ئەمەی ئێستاش بەناوی ڕێكەوتنی ئەمنی و پاراستنی ئاسایشی سنورەكان دەگوزەرێت درێژكراوەی هەمان مێژوە و هەمان ئامانج و پلان و پیلانە كەپێشتر كاری لەسەركراوە.
تاكە جیاوازی نێوان ئەم ڕێكەوتنەو ڕێكەوتنەكانی پێشوتر ئەوەیە كە لەمەدا هەرێمی كوردستان بەناچاری دەكرێتە بەشێك لە ڕێكەوتنەكە، كە ئەمە نەخواستی كوردی باشورەو نەخواستی سەركردایەتی سیاسیە لەهەرێمی كوردستاندا بەڵام فشارو مەترسیە سەربازی و سیاسی و ئابوری و ئەمنیەكان هێندە زۆرن هەرێم ناچاربوە بچێتەژێر باریەوە.
ئەم ڕێكەوتنە ئەمنیە لەهەنگاوی یەكەمدا بۆ چەك كردن و دورخستنەوەو لەكار خستنی خەباتی چەكداری هێزە شۆڕشگێڕەكانی ڕۆژهەڵاتی كوردستانە، ڕەنگە لەداهاتودا توڕكیاش فشار بكات تا هەمان ڕێكەوتن لەگەڵ ئێراق و هەرێم ببەستێت بۆ چەكداماڵینی پەكەكە.
هەمو ئەم فشارانە لەسەر هەرێم چاوەڕوانكراو بون و پێشتر چەندین جاری دیكە داوای دورخستنەوەی هێزە كوردیەكان كراوە بەڵام بەهۆی ئەوەی هەرێم پابەند نەدەبو پیلانەكە جێبەجێ نەدەكرا، بەڵام ئەمجارە بەهۆی زۆری فشارەكان و ئەو بارودۆخەی كە هەرێمی تێكەوتوە ناچار بو كە پابەند بێت.
ئەوەی تا ئێستا كراوە زۆر جەرگ بڕ نیە بۆ كوردانی ڕۆژهەڵات، بۆیە پێویستە سەركردایەتی هەرێمی كوردستان ئاگاداری ئەوە بێت كە چیتر لەوە زیاتر فشاری ئێران و ئێراق لەوبارەیەوە قبوڵ نەكات و لە سنورێكدا پێیان بڵێ ئیتر ئەمە هێڵی سورە، چونكە ئەگەر ئەوە نەكرێت داگیركەران بە ئێراقیشەوە سنور نازانن و شتێك ناهێڵنەوە بەناوی هەرێمی كوردستان و سیادە و تایبەتمەندی و قوڵایی نەتەوەییەوە.
هەرێمی كوردستان ڕاستە ئێستا چۆتە ژێر باری ئەو ڕێكەوتنە ئەمنیەوە بەڵام لەڕوی سیاسیەوە پشتیوانی داواكاری و مافەڕەواكانی كوردە لەهەرپارچەیەكی دیكەی كوردستاندا، ئەم پشتیوانیەش چەندین جار و لەچەندین بۆنە لەزاری سەرۆك مەسعود بارزانیەوە دوپاتكراوەتەوە …
