هەڵبژاردنی ئایندە تەواوی ڕێگەکان لە بەردەم ئێراق دا دائەخات

بێوار ڕەحمان
نووسەر

ئەو گریمانەیە زۆر بەهێزە کە هەڵبژاردنی (١٠ی تشرینی یەکەمی ٢٠٢١) ئێراق ئەگەیەنێت بە دژوارترین قۆناخ لەتەمەنی خۆیدا، لە زانستی سیاسەتدا مەترسیدارترین قۆناخ ئەو کاتەیە کە بۆشایی سیاسیی و ئەمنی دروست ئەبێت و تواناو بژاردەکانی دەوڵەت ئەگەنە ئاستی سفر بۆ ڕووبەڕووبونەوە. هۆیەکی سەرەکی ئەمەش نەمانی سازان ( توافق) ە لە ئێراق، زۆربەی کەس لایوایە هاتنی کازمی بەهۆی سازانی لایەنەکانەوە بوە، بەڵام لە بنچینەدا بونی کازمی بە سەرۆکوەزیران لە ئەنجامی نەسازان ( انعدام توافق) بو لە ئێراق. لەلایەکی ترەوە زۆربەی کاراکتەرە سیاسییە ئێراقییەکان سەرقاڵی گەندەڵی و پرۆژەن بۆ خودی خۆیان، نەک پرۆژە بۆ پەڕاندنەوەی ئێراق لە گرفتە قووڵەکان.

چوار هۆکاری سەرەکی ئەبنە مایەی داڕمانی مەترسیدار لە ئێراقی دوای هەڵبژاردنەکان:

یەکەم/ تەمەنی ئایەتوڵڵا عەلی سیستانی زۆر هەڵکشاوەو تەندروستی ڕێگەی پێ نادات ئەو ململانێیانەی لە نێوان حەوزەی قوم و نەجەف لە لایەک و ئەوەی لە نێوان شەقام و گەنجانی ناڕازی لەگەڵ حکومەت هەیە ئیدارەی بدات. 

دووەم/ کشانەوەی هێزەکانی ئەمریکا لە ئێراق و هەروەها کشاندنەوەی زۆربەی سیستەمەکانی بەرگریی هەوایی و پاتریۆت لە ناوچەکە. تائێستا تەنانەت خودی سەرۆکوەزیرانی ئێراق " مستەفا کازمی” نازانێت لە چ ڕۆژو بەروارێکدا هێزەکانی ئەمریکا لە ئێراق ئەکشێنەوە. 

سێهەم/ بە پێی ئەو پەیوەندییانەی لەگەڵ زۆربەی سەرکردایەتی حکومەت و ڕەوتە سیاسییەکانی ئێراق هەمە، لەدوای هەڵبژاردن بەهای دیناری عێراقی زیاتر دائەبەزێت. ئەمەش وا ئەکات هەڵاوسان (التضخم) ێکی گەورە لە بازاڕدا دروست بێت و بێکاری و هەژاریی و توندوتیژیی و ناڕەزایەتییەکان ڕوو لە هەڵکشان بکەن. 

چوارەم/ لەوەتەی ماڵی شیعی و ڕەوتی شیعی لە چوارچێوەی دەوڵەتی ئێراقدا هەیە، هیچ کاتێک هێندەی ئەم قۆناخە پەرت و پەرتەوازە نەبون، ئاڕاستەی سەدری نزیکن لە سعودییە، ئاڕاستەی فالح فەیاز لە لایەن قەتەرەوە پاڵپشت ئەکرێن، ئاڕاستەی عەبادی لە تورکیاوەو، بەهێزترین ئاڕاستەش ئاڕاستەی کەتائیب و چەندین گروپی حەشدی شەعبییە بە سەرکردایەتی هادی عامری و نوری مالیکی کە سەر بە ئێرانن. 

هەرچی ماڵی سوونییە، دابەشبون بۆ سەر سێ کوتلەی جیاواز و دژ بەیەک، ئاراستەی محەمەد حەلبوسی، کوتلەی هاوپەیمانی عەزمی سەر بە خەمیس خەنجەرو هەندێک لە بەعسییەکان، هەروەها ئەسیل نوجەیفی و هەندێک لە بەعسیەکان لە لایەکی ترەوە. 

ماڵی کوردیی، زۆر زیاتر لە ماڵی شیعی و سووننی پەرت بونە. هەرچی پەیوەندیی بە وەرگرتنەوەی پۆستەکانە چانسی حەلبوسی و کازمی و بەرهەم ساڵەح لە وەرگرتنەوە یان دانانەوەیان لە پۆستەکانیان لاوازە. ئەگەرچی خودی بەرهەم سالەح لە دەرەوەی کۆ-ڕایی کوردیی گەیشتە ئەو پۆستە.

لە کۆتاییدا، من پێموایە، لەگەڵ گرنگی و گەورەیی مەرجەعییەت لە ئێراقدا، ئایندەی ئێراق و براوەی ئەم هەڵبژاردنە سێ لایەنی سەرەکی ئەبن، یەکەم، سەدرییەکان، دووەم، حەشدی شەعبی و سێهەمیش پارتی دیموکراتی کوردستان. بەمانایەکی تر پۆستەکان و حکومەتی ئایندە لە ئێراق هەریەکە لە بارزانی و سیستانی و سەدر یەکلایی ئەکەنەوە.

ئەم وتارە دەربڕ لە ڕای نوسەر دەکات

PM:06:35:18/09/2021



ئه‌م بابه‌ته 199 جار خوێنراوه‌ته‌وه‌‌