کورد و دەرفەتێکی زێڕیین

بێهرۆز کوردستانی
نوسەر و چالاکوان
دەرفەتێكی زێرینمان لەبەردەمدایە بۆ ئەوەی بتوانین بگەین بە ئامانجەكانمان
 
لە ئێستادا ڕەوشی سیاسی ئێراق شڵەژاوە و ڕۆژهەڵاتی ناوەڕاست بەگشتی لە گۆڕانكاریدایە دەفەتێكی زێرینە بۆ ئەوەی بتوانین سەرنجی دەوڵەتانی جیهان بۆ لای خۆمان ڕابكێشین بۆ ئەوەی پاڵپشتیمان بكەن تاكو بگەین بە ئامانجی لەمێژیینەی خۆمان. 

دەرفەتێک كە دووبارەبونەوەی زۆر زەحمەت دەبێت ئەگەر بێتو سودی لێوەر نەگرین ئەوە بەدڵنیاییەوە ئەگەرێكی زۆری هەیە پڕوشكەكانی بەر ئێمەش بكەوێت، ئەوكات دەرفەتێكی گەورە لەدەست دەدەین كە بەدڵنیاییەوە نەک لایەنێكی سیاسی دیاریكراو بەڵكو هەموومان پێكەوە زەرەردەكەین. 

هیوادارین لایەنە سیاسییەكانی كوردستان، بەتایبەتی پارتی و یەكێتی وەک دوو حزبی سەرەكی كوردستان بەدەوری تاریخی خۆیان هەڵبستن واز لەوە بێنن ئاگری دوو بەرەكی نێوانیان زیاتر گەشەبكات. 

بەرپرسیارەتی سەرەكی كوردستان لە ئەستۆی ئەواندایە هەر ئەوانن دەتوانن بە یەک دەنگی كوردستان بەرەو ئایندەیەكی گەش و ڕووناک ببەن و لەم تەنگژە سیاسییە قوڵە رزگاری بكەن و ئایندەی كوردستان مسۆگەر بكەن.
 
نەک تەنیا باشوری كوردستان بەڵكو هەر چوار پارچەی كوردستان چاویان لەوەیە لایەنە سیاسییەكانی كوردستان بە یەکرێزی و یەک دەنگییان بەرامبەر بە تەحەدییەكان بوەستنەوە بۆ ئەوەی ئەوانیش ئومێدی سەركەوتنیان لەئایندەدا لەسەر هەڵبچنن. 

هیچ پۆستێكی سیاسی ئەوندە گرنگ نییە ئایندەی خاک و نیشتیمان لەسەری بكرێتە قوربانی، ئێمە سەدان كەسایەتی گەورە و خاوەن هۆشێكی كراوەمان هەیە كە بتوانێت ببن بە كاندیدی هاوبەشمان لە پێناو مافە ڕەوایەكانمان بجەنگێت. 

بەدیلی ئێمە هەر خۆمانین هیچ دەوڵەتێک داگیركەر نایەوێت ئێمە بەسەر هیچ بەربەستێكدا سەربكەوین، بەڵكو ئامانجی هەموویان ئەوەیە تا ئێمە ماوین دەستەو یەخەی یەكتری بگرین هەوڵی سڕینەوەی یەكتری بدەین بۆ ئەوەی ئەوان بەرژەوەندییەكانیان لەسەر ڕێشتنی خوێنی ئێمە یەكلای بكەنەوە. 

بەڵێ بۆ یەكرێزیی و یەک دەنگی نا بۆ تەفرەقە و دژایەتی كردنی یەكتری، هیوادارین بیر لە ئایندەی ئەم نیشتیمانە بكەینەوە نەوەک هەر یەكەمان لە پێناو بەرژەوەندییەكانیدا خاک و نیشتیمان بكاتە قوربانی، بەپێچەوانەوە ئەبێ خۆمان لە پێناو ئەم نیشتیمانەدا بكەینە قوربانی. 

ئەم وتارە دید و بۆچونی تایبەتی نووسەرەکەیەتی

PM:10:11:30/07/2022



ئه‌م بابه‌ته 43 جار خوێنراوه‌ته‌وه‌‌