ڕیفراندۆم كوفرێكی جیهانی بوو كە بارزانی كردی

ھۆگر نێروەیی
نوسەر

بارزانی لەکاتی بانگەشەی ڕیفراندۆم دا، جارێک وتی: گەر سەری نەگرت بڵێن ئەو پیاوە شێت بووە، ھەموو خەتایی ئەوبوو، کە لە ڕاستیدا ھەر بەبڕیاردانی ڕیفراندۆم، پشتکردن لە ھەموو جیھان شێتی ئیرادەیە، کە بارزانی نەبێت ھیچ سەرکردەیەک نییە جورئەت بکات ئەو شێتیە بۆ گەلەکەی بکات، کە ھەر وەک ئەوە وابوو لە ئاگردابی بۆ کوژاندنەوەی ئاگرەكە لە جیاتی ئاو بەنزین بە ئاگرەکەدا بکەی.
‎ئەو تەحەددایەی سەرۆک بارزانی کردی ھیچ سەرکردەیەک بە درێژایی مێژوو جورئەتی نەکردووە ئەو تەحەدایە بکات، تەحەدای بارزانی تەحەدای ناوخۆی و وڵاتانی ھەرێمی و جەمسەری و جیھانی بوو. کاتێک سەربەخۆیی وڵاتێک دێتە باس وڵاتێکی نوێ لە دایک دەبێت جیھان و ژینگەی ئەو وڵاتەی لەناوچەکە لەگەڵ چوار دەوری دابەش دەبێت بۆ چەند بەرەیەك، بەرەیەک دژیەتی،بەرەیەک لەگەڵییەتی، بەرەیەکیش بێ لایەنە.
‎بەڵام ڕیفراندۆمی کوردستان ھەموو جیھان دژبەر بوو، چونکە یەکەم جار بوو بەدرێژایی مێژووی ناوچەکە دەنگی شەخسێک سەروی دەنگی داڕێژەرانی نەخشەی ناوچەکە و کارەکتەرانی ئەوان بن لەناوچەکە، کە ئەو شەخسییاتە بۆ گەلی خۆی تەجاوز لە بڕیاردانی ھەزار ساڵانی ئەوان کرد، کە بەزمانی ئیسلامی کوفری کرد لێ خۆشبون بوون نیە، بە زمانی یاسایی گەورەترین تاوانی کرد ئەبەدی دەکرێت، بە زمانی زانستی بیرکاری ئەو ھاوکێشەیەی ھیچ شیکارێکی نەبوو کە زانایانی زانست بێ زانست بوون لەو پرسیارەدا، بەزمانی فەلسەفی نەک ھەر گومانیان کرد، بەڵکو بەتەواوی ڕەتیان کردوە کەبوونی ھەبێت. بەڵام  ئیرادەی بارزانی بۆ گەلەکەی ھەموو زانست و ئایین و فەلسەفە و یاسا و ھاوکێشەیەکی تێپەڕاند و کوفری سیاسی کرد لای داگیرکارانی کوردستان، بە ناوی بارزانیزم  ڕیفراندۆمی بۆ گەلی کوردستان ڕەخساند، کە گەلی کوردستان بۆ یەکەم جار بە ئازادانە بڕیاری لەسەر مافی چارەنوسی خۆی دا کە بە درێژایی مێژوو ئەو ئازادیە لێزەوتکرابوو کەھەر جارەو وڵات و و ئیمپراتۆریەت و شەخسێک بڕیار لەسەر مافی چارەنوسیان دەدا.  

‎ھەروەک چۆن وڵاتانی 5+1 ھەن لە پرسی نێودەوڵەتیدا، بەوشێوەیە حەوت سەرسورھێنەرەی جیھان + یەک ئیرادەی بارزانی ھەیە. بڕیاردانی ئەنجامدانی ڕیفراندۆم کەپشتکردن لەتەواوی جیھان بوو لەوانەیە بۆ سەر زمان ئاسان بێت، بە ئاسانی لێوی سەرەوە لە لێوی خوارەوە بدەی و بدوێی بەڵام گەر لەسەر میزانی دابنرێت لە زەوی تا ئەو پەڕی ئاسمان ھەتا تەبەقەی حەوتی ئاسمانیش گەر کۆتایی نەبێت تێدەپەڕێنێت، ھێندە قورس دەبێت کە ھیچ کیلۆیەک و شتێک نیە بتوانێت بی پێوێت کە بەزمانی ژمارە بدوێت و بنوسرێت. زۆر شت ھەن سەد ساڵ یان ھەزار ساڵ جارێک دەبێت بەڵام سەرکێشی بارزانی لە ئیرادەدا بۆ گەل و نەتەوە و نیشتیمانەکەی نەک سەد و ھەزار ساڵ بەڵکو نە لە دونیای دوێنێ و نە لە دونیای سبەینێ ھیچ جارێک ئیرادەیەکی لەو شێوەیە دروست نەبووە و نابێتەوە. یەک جار ڕویداوە نابێتە دووجار.



ئەم وتارە دید و بۆچونی تایبەتی نووسەرەکەیەتی

PM:11:47:22/09/2022



ئه‌م بابه‌ته 46 جار خوێنراوه‌ته‌وه‌‌