تاوانی كوشتنی ژینا ئەمینی و بیدعەی حیجابی زۆرەملێ

ئەبو بەکر کاروانى
نوسەر
 
ژینا ئەمینی كچە كوردی سەقزی، بە سەفەر دەچێتە تاران، لەوێ بە بیانوی پێشێلكردنی ڕێساكانی تایبەت بە حیجابی زۆرەملێ، لە كاتێكدا مامۆستا حەسەنی ئەمینی زانای ڕۆژهەڵاتی كوردستان كە یەكێكە لەو كەسانەی بەیاننامەیەكیان لەسەر ڕووداوەكە بڵاوكردۆتەوە باسی لەوە كرد جل و بەرگی ژینا موحتەشەم بووەو ئیسلام ئەو ڕەفتارە ڕەتدەكاتەوە كە بەرامبەری كراوە، پۆلیس قۆڵبەستی دەكات و بەتوندی ئەشكەنجەی دەدەن، تا دوای سێ ڕۆژ لە بێهۆشیی گیانی سپارد. ئێمە وێڕای ئیدانەكردنی ئەو تاوانە، سەرەخۆشی لە كەس و كار و بنەماڵەو ئازیزان و خەمبارانی دەكەین و هاوخەمی خۆمانیان پێدەگەیەنین دوعاخوازیشین پەروەردگار بیخاتە سایەی سۆز و لێخۆشبوونی خۆیەوە.

دوای ئەمە دەخوازم بەم بۆنەیەوە سەرنج بۆ لای كێشەی حیجابی زۆرە ملێ لە دنیای نوێدا ڕابكێشم سەرەتا دەبێت سەرنج بۆ ئەوە ڕابكێشم كە لە دیدی ئیسلامییەوە، باڵاپۆشی پەیوەندی بە ئیمان و قەناعەتی ئافرەتی باوەڕدارەوە هەیە ڕێگەكەشی ڕۆشنبیركردن و بانگەشە بۆكردن و هاندان و پەروەردەكردنە، نەك توندوتیژی و سەپاندن، هەر بۆیە حیجابی زۆرەملێ لە ڕێی بەكارهێنانی زەبر و زۆری دەوڵەت بۆ سەپاندنی جگە لە بیدعەیەكی ئەم سەردەمەی بێ پێشینە لە مێژووی ئیسلامیدا هیچی تر نیە، ڕەنگدانەوەیەكی نەرێنی بە ئایدۆلۆژكردنی ئیسلامە لەلایەن هەندێ بزاڤ و بیرمەندی ئیسلامی نوێوە، لە ژێر كاریگەری و لاسایی كردنەوەی هەندێ ئایدۆلۆژیای مۆدێرن و لەوانەش ماركسیزم!.

بەحوكمی ئەوەی ئایدۆلۆژیا لە ڕێی دەوڵەتەوە دەسەپێنرێت بە تایبەتیش لە وڵاتە نادیموكراتەكانی هاوشێوەی وڵاتە كۆمۆنیستەكان ئەگەر بیانوی حیجابی زۆرەملێ پاراستنی ئەخلاقی كۆمەڵگە بێت ئەوا نەك هەر نابێتە هۆی پاراستنی ئەخلاقی كۆمەڵایەتی، بەڵكو زیاتر لاوازی دەكات و كۆمەڵگە بەرەو هەڵوەشانەوەی زۆرتر دەبات، بەحومی ئەوەی لەم سەردەمەدا حكومەتی ئەخلاق و دین سەپێنەر بە پێچەوانەی هەندێ دیدی ڕووكەش لە بازنە ئیسلامی و ناوەندە دینییەكەدا، كۆمەڵگەیەكی دین لاواز و پڕ كێشەی ئەخلاقی بەدوای خۆیدا دەهێنێت بەحوكمی ئەوەی دین و ئەخلاق بە سروشتی پێكهاتەو سروشت و ئەركیان قابیلی سەپاندن نین، بۆیە كاتێك هەوڵی سەپاندنیان دەدرێت دووچاری شێوان دێن و كاریگەریشیان كەم دەبێتەوە، كۆمەڵگەش لەگەڵ ناسنامە دینی و ئەخلاقییەكەیدا دووچاری كێشە دەكات و لە جیاتی چارەسەر دەبێتە سەرچاوەی چەندین كێشە.

تا كۆمەڵگەش زۆرتر نوێبووبێتەوە هاوشێوەی ئێران كاریگەرییە نەرێنییەكانی ئەم دۆخە بۆسەر تاك و كۆمەڵگە گەورەتر دەبێت بەحوكمی گۆڕانكاریی لەو چاوەڕوانییانەی لە ئایین و دەسەڵات و وێناكردنی خود وەك كائینێكی خاوەن ماف و كەرامەت لە بیركردنەوەی تاكەكاندا پەیدا دەبێت، واقیعی ئێستای كۆمەڵگەی ئێرانیش لەم ڕووەوە باشترین بەڵگەیە.


ئەم وتارە دید و بۆچونی تایبەتی نووسەرەکەیەتی

PM:03:54:19/09/2022



ئه‌م بابه‌ته 121 جار خوێنراوه‌ته‌وه‌‌