سەقامگیرى سیاسی

سەربەست صالح
نوسەر
سەقامگیریی سیاسی هەرێمی کوردستان، ئەوخاڵە گرنگ و جەوهەرییەیە کە دەکرێت بینای ئایندەیەکی گەشتری لەسەر بکەین، نەیارانی ئەزموونەکەمان جۆرەها ڕێگایان گرتەبەر بۆ بەرگرتن بە گەشەسەندنی هەرێمەکەمان، داخستنی سنورەکان و گەمارۆی ئابوری و هەناردەکردنی تیرۆر و قوتکردنەوەی داعش و بڕینی بووجە و گرتنە بەری زۆر ڕێگای بۆخڵتریش، لێ ئیرادەی خەڵکی کوردستان نەچەمین.

دامەزراوەکانی هەرێمی کوردستان درێژەیان بە ئەزموونەکەماندا، بەڵام لە هەندێک قوناغدا نەیاران لە ڕێگەی تێکدانی نێوماڵی کوردی و تێکدانی سەقامگیری سیاسییەوە داخڵ بوون و جۆرێک لە تەنگەژەو پشێوی سیاسییان دروستکرد، کاریگەری خراپیان بۆ سەر ئەزموونی باشوری کوردستان دروستکرد.

لە دوای ڕێککەوتنی لایەنە سیاسییەکان و گەیشتن بە کارنامەیەکی هاوبەش، دووبارە دامەزراندنەوەی دەزگای سەرۆکایەتی هەرێمی کوردستان، پێکهاتنی لایەنە براوەکان لە چۆنیەتی بەشداری و هاوسەنگی و چۆنیەتی ڕەسمکردنەوەی دەزگا ئیدارییەکان، جۆرێک لە سەقامگیریی سیاسیی هەستپێدەکرێت، بەتایبەت دووبارە کارکردن لەسەر پرسی چاکسازی و دروست بوونی جۆرێک لە هەماهەنگی لە نێوان دەسەڵاتە باڵادەستەکان و بەدواداچوونی ورد و خستنەڕووی کۆمەڵێک پرۆژە یاسای گرنگ، جێگای خۆشحاڵی هاوڵاتیانی کوردستانە، لە ئێستادا خەڵک ئومێدی گەورەی هەیە بە باشتربوونی دۆخی گشتی و بوژانەوەی دۆخی ئابوری و بە دیهێنانی دادی کۆمەڵایەتی و دووبارە دابەشکردنەوەی داهاتی نەتەوەیی.

ھیوای زۆرمان بە سەرۆکی هەرێمی کوردستان و کابینەی نۆی حکومەت و خولی پێنجەمی پەڕلەمانی کوردستان ھەیە، گرنگی و بایەخی سلێمانی و ھەڵەبجە و دەڤەری ڕاپەرین و گەرمیان " لەبەرچاو بگرن، کۆتایی بە دوو ئیدارەیی بھێنن، تۆ بڵێ: کۆتای بە فیتنەی جۆشدانی گیانی ناوچەگەریەتی بھێنن".

ئەوەی لە تەمەنی وەرزێکی دەستبەکاربوونی نێچیرڤان بارزانی سەرۆکی هەرێمی کوردستان و کابینەی نوێ حکومەتی هەرێمی کوردستان دەیخوێنیەوە و بەری دەکەوین، سنگ و نەفەسێکی نوێ و هێمنە لە حکومڕانی کوردی و پراکتیزەکردنی مۆدێل و پارادایمێکی نوێیە لە ئیداردان و سەرپێخستنەوەی حکومڕانی، ئەوەی لە فەزای گشتی و قسەو گفتوگۆی خەڵک بەری دەکەوین ئومێدی خەڵکە بە چاکتربوونی دۆخی گشتی و بەدیهێنانی سەقامگیرییەکی سیاسیی و سەرئەنجام باشتر بوونی گوزەرانی خەڵک و ئاسایی بوونەوەی دۆخی دارایی، زۆرینەی ئاماژەکان بۆ ئەوەن دۆخی گشتی  پرسی ئاوەدانی و هێمنی و کرانەوەی زیاتری کۆمەڵگای کوردی و پێشکەوتنەکانی هەرێم ڕوو لە هەڵکشان و بوژانەوە بکەن.

لەگەڵ بەدیهێنانی جۆرێک لە سەقامگیریی سیاسیدا ئیرهابی فیکری توشی کەوتن و داڕزین هاتووە، کەوتنی ڕەوت و تەوژمی پۆپۆلیزم؛ سەرەتایەکی باشە لە ڕوونبوونەوەی کەشی گشتی و بەرچاو ڕۆشنی خەڵک، سەرەتای قۆناغێکی نوێیە، کاری زیاتری دەوێت.

ئیرھابی فیکری ئەو زەمینەییەی لە دەستدا، لە ڕێگەی کتێبی بەرگ ئەستورە وە، سەرلێشواندنی خەڵک لە ڕێگەی وردە نوخبەو ڕۆشنبیریی ھەل پەرست و خۆپەرستەوە، لە ڕێگای میدیایی بەناو ئەھلی و بێلایەن و سەربەخۆی دەم بە بەبۆڵە و هاوارەوە، بە بەکارھێنانی تۆڕێکی فراوان لە کادرۆکەی دەمھەراشی قیڕە قیڕکەرەوە، ڕایگشتی بە لاڕێداببەن، چیتر ناتوانن لەبەرگی دڵسۆزی و پەرۆشیدا باری سەرشانی خەڵک قورستر بکەن.

ئەم وتارە گوزارشتە لە ڕاى نووسەر و چاوى کورد لێی بەرپرسیار نییە.




PM:03:01:07/09/2019



ئه‌م بابه‌ته 70 جار خوێنراوه‌ته‌وه‌‌

وتارەکانی تری نوسەر