مردن یەک جار خۆشە!

نوری بێخاڵی
نوسەر و ڕۆشنبیر

هەموومان ئەوە دەزانین، کە ناکۆکی و ململانێی ناوخۆیی حزبەکانی کوردستان، هۆکارێکی سەرەکییە لەوەی عێراق بەم کەڵەگاییەوە مامەڵە لەگەڵ هەرێمی کوردستاندا بکات، بەڵام دیوێکی تری هاوکێشەکەش ئەوەیە، کە ئێمەش وەک هاووڵاتی، بە ئاگاییەوە بێت یان نائاگایی، بە مەبەست بێت یان بێ مەبەست، ڕاستەوخۆ و ناڕاستەوخۆ، خزمەتی ئەو سیاسەت و ستراتیژەی عێراق دەکەین.

ئەمەو بەبێ ئەوەی بیر لەوە بکەینەوە، کە گەڕانەوەی هەرێمی کوردستان بۆ خاڵی سفر لەگەڵ عێراقدا، چ باجێکی قورسی بۆ هەموومان بەدواوەیە. بەبێ ئەوەی خەیاڵمان بۆ ئەوە بچێت، کە لەدەستدانی ئەم ئەزموونە (وەک حوکمڕانیکردن نا، بەڵکوو وەک شکۆی نەتەوەیی و سەروەریی نیشتمانیی دوای ڕاپەڕین)، چ کارەساتێکی دیکە یەخەمان دەگرێت.

ئەوەی دەیڵێین کەفوکوڵی نەتەوەیی نییە، بەڵکوو دەبێ هەموو کوردێکی لەخۆوە کورد، لە دەرەوەی ئەوەی حزبە کوردستانییەکان چیان کردووە و چی دەکەن، لە بەردەم ویژدانی خۆی و ئێستا و دواڕۆژی نەوەکانیدا، خۆی بە بەرپرسیار بزانێت. واز لەوە بێنن فڵانە حیزب وای کرد، فیسارە حزب وا دەکات. جارێک، تەنیا یەک جار، لە پشتی چاویلکەی ئایدیۆلۆژیی و کینەی حزبیی ناوخۆییەوە، سەیری هاوکێشەکە بکەن. ئینجا ددان بەوەدا دەنێن، کە هەموومان و هەر یەکەو بە شێوەیەک، بەرپرسین لە بچووککردنەوەی وێنەی کورد لە چاوی عەرەبدا.

بەرپرسین لە بێ بەهاکردنی خەباتی دوور و درێژی نەتەوەکەمان لە بەرامبەر بڕێک مافی سادە و ڕووکەشدا. بەرپرسین لە بێ نرخکردنی قوربانیی بێ پایانی کورد، لە بەرامبەر بڕە بوودجەیەکی بە منەتی بەغدا، کە بەرکەوتە و پشکی یاسایی و دەستووریی هەرێمی کوردستانە و ناکاتە دڵۆپێک ڕووباری خوێنی شەهیدانمان!.

چیتر کاتی ئەوە هاتووە، کورد لەناو خۆیدا دەبێ واز لە گوتاری تەخوینکردنی یەکتری و پاشقۆڵ لەیەک گرتن بێنێت. چونکە ئەگەر قسە بێتە سەر خیانەت و ڕەگە مێژووییەکانی خیانەتکاریی، ئەوا دەبێ هەموو ڕۆژێک خەریکی ئەوە بن، لاپەڕەی کۆن و نوێی یەکتری هەڵبدەنەوە و لە بەرامبەریشدا سەرانی عێراق، وردە وردە پپلانە شۆڤینییەکانیان لە دژی کورد و هەرێمی کوردستان، قووڵ و هەمەلایەنتر بکەنەوە و بە شێواز و میکانیزمی جیاوازەوە، کورد بگەڕێننەوە خاڵی سفری دەستپێکردنەوە. بۆیە پێویست دەکات بەرمەبنای چییەتی و ماهیەتی پێشهاتەکان، بە دیدگایەکی فراوان و کراوەتر، سەیری هاوکێشەکان بکەین و مامەڵە لەگەڵ ڕووداوەکاندا بکەین.

لێکەوتە خراپ و دەرهاوێشتە نەرێنییە سیاسی و ئابوورییەکانی دوای ڕووداوەکانی ١٦ی ئۆکتۆبەر، هەر لە لەدەستدانی ڕووبەرێکی فراوانی خاکی کوردستان، کە بە خوێنی سەدان پێشمەرگە ئازاد کرا، تا دەگاتە ئاوارە و دەربەدەرکردنی هەزاران خێزانی کورد لەسەر زێدی خۆیان و هێنانەوەی ماڵە عەرەبەکان لە ناوەڕاست و خوارووی عێراق، بۆ ئەو ناوچانە، تا دەستگرتن بەسەر زەویوزاریی کورد و سووتاندنی خەلە و خەرمان و بەرهەمە کشتوکاڵییەکانیان، تا لەکارلادانی دەیان بەرپرسی سیاسی و کارگێڕیی کورد لە پۆستەکانیان و جێ پڕکردنەوەیان بە کاراکتەری عەرەبی شۆڤینی لەو ناوچانە، تا تۆختربوونەوەی سیاسەتی بەعەرەبکردن و ڕاگواستن و هەموو ئەو تراژیدیانە، بەرهەمی ئەو ڕووداوە نەخوازراوە بوون، کە تای تەرازوو و هاوسەنگی هێزی نێوان هەرێمی کوردستان و عێراقی گۆڕی.

لەم گۆشەنیگایەوە، دۆخەکە ئەوە لە سەرکردایەتیی سیاسیی کوردستان دەخوازێت، بیر لە بەخۆداچوونەوە و دەرزی ئاژنکردنی کەموکوڕییەکانیان بکەنەوە. هەنگاوی جیددی و کردەنی بۆ دروستکردنەوەی پردی ڕووخاوی متمانەی نێوانیان و پتەوکردنی ڕایەڵەکانی ئاشتەوایی نێوخۆیی بنێن. نەک یەکتری تۆمەتبارکردن و یەکتری شکاندن، کە ئەمەی دواییان ڕەوڕەوەی سیاسەت و ستراتیژیی شۆڤینیزم و لەکوردخستنی کورد لە عێراق، خێرا و خێراتر دەکات.

بۆ ئەمەش گەڕانەوەی هێزە سیاسییەکان بۆ سەر مێزی گفتوگۆ لەژێر چەتری سەرۆکایەتیی هەرێمی کوردستان، وەک دامەزراوەیەکی یاسایی و دەستووری و کۆمەککردنی گوتارە ئاشتیخواز و ستراتیژە نیشتمانییەکەی ئەو دامەزراوەیە، کورتترین ڕێگا و باشترین بژارەیە.

کورد سەت ساڵ خەباتی بۆ ئەوە نەکرد، تا جارێکی تر ببێتەوە مەوالی و برا بچووکی عەرەب. کورد بۆ ئەوە ڕووبارێک خوێنی شەهیدی نەدا، تا شوکرانەبژێری چەند پلە و پۆستێکی بەغدا بێت، کە عێراق پێیوایە سەدەقە و خێرە پێی دەکات. کورد بۆ ئەوە کیمیاییباران و ئەنفال نەکرا، تا دۆزە ڕەوا نەتەوەیی و نیشتمانییەکەی، مافە یاسایی و دەستوورییەکانی، بە بڕ و چەندێتی بوودجە و ناردن و نەناردنی مووچەوە ببەسترێتەوە. بۆیە پێویستە سەرکردایەتیی سیاسیی هەرێمی کوردستان، چیتر ڕاست و ڕاشکاو بێت لەگەڵ خەڵکی کوردستان، کە ئاخۆ تا کەی و لە کوێ، کۆتایی بەم یارییەی مشک و پشیلەیە دێنن.

بڕوانن، ئەگەر وەک کورد نا، تەنانەت وەک هاووڵاتیێکی ئاسایی، سەیری مامەڵەی عێراق بکەین، ئەوا بە ئاشکرایی تێدەگەین، کە بە هەر جۆرێک بووە، بەغدا دەیەوێ بمانکاتەوە شوێنکەوتە و پاشکۆ، دەنا ژیان و گوزەرانمان پێ ڕەوا نابینێت. تا ئەو ئاستەی وەک ئەو یارییە ناچیزەیەی پەرلەمانتارە کوردە پڕۆ عێراقییەکانیش دەیکەن، ئەگەر تەواوی کوردیش بچێتە ناو ئەو یارییە قێزەونەوە، ئەوان هێشتا دەستبەرداری ستراتیژی بنکۆڵکردن و دواتر نەهێشتنی ئەو ئەزموون و دیفاکتۆ سیاسییەی هەرێمی کوردستان نابن و لە هەوڵی کردنەوەی کوردستان بە (شیمالولحەبیب!) ناکەون.

ڕاستییەکەی ئەوەی ئێستا عێراق لەگەڵ هەرێمی کوردستاندا دەیکات، هەوڵی شکاندنی ئیرادە و ناچارکردنی کوردە بۆ خۆبەدەستەوەدان، نەک لێکتێگەیشتن و ڕێککەوتن. پیلانگێڕی و نیازی مل پێ کەچکردنی کوردە، نەک گەڕانەوە بۆ بنەماکانی دەستوور و پرەنسیپەکانی سیستەمی فیدڕاڵی. کاتکوشتن و دەستی دەستی پێ کردنە، نەک دانوستاندن و چارەسەرکردنی کێشەکان. بۆیە ئەگەر بڕیارە کورد لە نێوان نان و ملکەچیی بۆ عەرەب، هەروەها برسێتیی و شکۆی نەتەوەییدا سەرپشک بێت، ئەوا دەبێ ئەوەی دووەمیان هەڵبژێرێت.


ئەم وتارە دەربڕ لە ڕای نوسەر دەکات

PM:11:17:26/06/2020



ئه‌م بابه‌ته 147 جار خوێنراوه‌ته‌وه‌‌

وتارەکانی تری نوسەر