خواشتان دەوێت و خورماش!

مه‌شخه‌ڵ كه‌وڵۆسی
سه‌رۆكی ناوه‌ندی چاوی كورد بۆ په‌ره‌پێدانی سیاسی
چەند جارێك باسی ئەو سایكۆلۆژیا و سیاسەتە زاڵەمان كردووە كە هەندێك حیزبی پۆپۆلیستی كوردی دروستیان كردووەو، شەقام و جەماوەریان پێ سیخناخ كردووە.

هەر یەك لەتوێژەران و ڕۆشنبیران لەمەترسی ئەو ڕیتمە لەسیاسەتكردن دوواون و، مەترسییەكانیان ڕوون كردۆتەوە، كەچی ئەوەی جێگەی ، ئەو ڕیتمە بەردەوام لەگەشەدایەو، زەنگەكانی مەترسی هیچ كاریگەرییەك لەسەر ڕاوەستاندنی دروستناكەن.

لەسەرەتای هاتنی ئەدەبیاتی كۆمۆنیزمی كرێكاریدا، لەناو چەپەكانی كوردستاندا مەقولەیەك بڵاوبوو كە دەیگوت: ئەگەر لەناو كۆمەڵگەدا ململانێ نەبوو، ئەوا پێویستە ماركسییەكانی دروستی بكەن، تاكو پرۆلیتاریا سودی لێوەربگرێت!.

لێرەدا بناغەیەكی فیكری دادەنرێت بۆ نەخۆشینێكی كۆمەڵایەتی و فەرهەنگی، چونكە ئێمە بێ سانسۆر كاتێ ئەو مەقولەیە دەكەینە بەرنامەی سیاسی، ئیتر هەموو شت تێكدەچێت و خودی مەقولەكەش لە مەبدەئێكی ئابوریی سۆسیالیستییەوە، دەگۆڕێت بۆ فەرهەنگی كۆمەڵایەتی و، داینامیكییەتی هێزەكانی دیاری دەكات.

ئیستا لەكوردستاندا، وێنەیەك لەو پڕنسیپە دەبینین كە شۆڕبوەتەوە بۆ نێو سایكۆلۆژیای گشتی و خەریكە شیزۆفرینیایەكی ئاشكرا لەناخی تاك و شەقامی سیاسیشدا دروست دەكات.

لەسایەی ئەم ئەدەبیاتە سیاسییەوە، تاك و شەقامی سیاسی لەم هەرێمەدا كەوتوونەتە نێو ململانێیەكی دەرونی ترسناك، بۆشاییەكی وا گەورە لەنێو وشیاریی تاكدا دروست بووە كە حیزبە پۆپۆلیستەكان دەتوانن بۆ مەرامی خۆیان یاری تێدا بكەن و یاری پێ بكەن.

سەیر دەكەین تاك وای لێهاتووە، لەهەمان كاتدا شتێكی دەوێت و دژەكەیشی دەوێت، ساتێ داوایەك دەكات، ساتێكی تر داوایەكی تەواو پێچەوانە دەكات.

سەرنج بدە، لەسەروبەندی ڕیفراندۆمی پڕشكۆی خەڵكی كوردستاندا، هەندێ خەڵك داوایان دەكرد لەترسی داخستنی سنورەكان و كاردانەوەی وڵاتانی داگیركەری كوردستان، با ڕیفراندۆمەكە نەكرێت! كەچی كە ڕیفراندۆم كرا، هەرهەمان ئەو خەڵكە ڕەخنەی ئەوەیان گرت كەبۆچی ئەو ڕیفراندۆمە ڕاگەیاندنی دەوڵەتی بەدوادا نەهات.

لەسەرەتای جینۆسایدی بڕینی بودجەو موچەی خەڵكی كوردستانەوە تا ئەمڕۆی نوسینی ئەم چەند دێڕە، هەندێك حیزب و كەسایەتی و خەڵكی شەقام، داوا دەكەن كورد نەوتەكەی ڕادەست بكات و لەگەڵ بەغدا ڕێك بكەوێت. هەمیشە جەختیان لەوە كردۆتەوە كە نان گرنگترە لەئازادی و لەهەموو بەهاكانی تر، تێركردنی سكی برسییەك لە سەروی هەموو شتێكی ترەوەیە، كەچی كاتێ شاندی حكومەتی هەرێمی كوردستان چەند جارێك سەردانی بەغدا دەكەن و دەیانەوێت ڕێك بكەون، هەمان ئەو حیزب و كەسایەتییانە، دێنە سەر شاشەكان و، دەڵێن: ئەها چۆن تەسلیمی بەغدا بوون!.

لەلایەكەوە فشار لەحكومەت دەكەن نەوتەكە ڕادەست بكات، كاتێ حكومەت دەیەوێت ڕێك بكەوێت، دێنەوە سەر ستەیچەكەو دەڵێن: ئەها حكومتان پێناكرێت! چۆن دەبێت نەوت ڕادەست بكەن!.

ئەم پارادۆكسە كوشندە و مەترسییدارەو، خەریكە بەتەواوی دەبێتە فەرهەنگێكی میللی، لەو حاڵەتەشدا مەترسی نائۆقرەیی و نائارامی كۆمەڵایەتی، ئەگەرێكی هەرە نزیكە.
چونكە تاكی كۆمەڵگە بەجۆرێك تەلقین كراوە، هەم شتێكی دەوێت وهەم دژەكیشی دەوێت، واتە ئەو ئیدیۆمە كوردییەیان بەسەردا دەبڕێت كە دەڵێت: خوایشی دەوێت و خورماشی دەوێت!.

باشە ئێوە خۆتان نەتان دەگوت: دڵسۆز كەسێكە دەرۆزە بۆ میللەتەكە بكات؟! ئەی بۆ كاتێك شاندی حكومەتی هەرێم چەند جارێك دەچێتە بەغدا، ئەوە ناو دەنێن دەرۆزەكردن و خۆبەدەستەوەدان و سەركۆنەی دەكەن؟! ئەم ململانێ دەرونی و سیاسیەی شەقامی كوردی، كێ لێی بەرپرسە و كێ دەتوانێت چاری بكات؟.

ئەم وتارە دەربڕ لە ڕای نوسەر دەکات

PM:10:27:31/03/2021



ئه‌م بابه‌ته 380 جار خوێنراوه‌ته‌وه‌‌