فەرهەنگ وەك ژێرخانی گەندەڵیی

مه‌شخه‌ڵ كه‌وڵۆسی
سه‌رۆكی ناوه‌ندی چاوی كورد بۆ په‌ره‌پێدانی سیاسی

لەسەرەتای قەیرانی حوكم و ئیدارە لەهەرێمی كوردستانەوە، تاكو هەنوكەی نوسینی ئەم چەند دێڕە كورتە، ئاشكرا و ڕوون بووە كە ئاستەنگی هەرە سەرەكی بەردەم چارەسەركردنی كێشەكان، بریتییە لە لێشاوێك مووچە خۆر كە لە حكومەت پارەی خەیاڵی و بێ بەرانبەر و چەند بارە وەردەگرن.

ئەم كێشەیە ئەنجامی چەندین كێشەی دیكەی قووڵی بونیەوییە، نەك خۆی هۆكار بێت، كاتێك حیزبێك، بەڕێوەبەر و بەرپرسێك، ئامادەیە لەسەر بودجەی گشتی كەسێك یان چەند كەسێك بكاتە موچەخۆر، بەبێ ئەوەی كەرتی گشتی پێویستی بەو موچە خۆرە هەبێت، ئەوە نیشانەی قەیرانی قوڵی ویژدان و كێشەی یاسا و پەروەردەشە، لەوەش خراپتر، كاتێ كەسێك ئامادەیە بە فشاری كۆمەڵایەتی و بەرتیل و مەحسوبیەت وابكات بەرپرسێك دایبمەزرێنێت، ئەوەش نیشانەی هەمان دەردە لەناو ناخی تاكدا.

ئەم مەسەلەیە دوانەیەكی لێك دانەبڕاون و بەرهەمی یەك جۆر پەروەردە و ئینتیمان و لەنێو فەزای یەك قەیرانی قووڵی یاساییدا خۆیان نمایش دەكەن. ئەو بەرپرس و حیزبە چەندە تاوانبارە كە كەسێك بەو جۆرە دەكاتە موچە خۆر، خودی ئەو تاكەش ئەوەندە و زیاتریش تاوانبارە كە ئامادەیە بێ بەرانبەر موچە وەربگرێت لەخەزێنەی گشتی!.

كێشەكە هەم فەرهەنگی و پەروەردەییە، هەم یاسایی و سیاسییە، بۆیە ئەگەر بمانەوێت لە ڕەگ و ڕیشەوە چارەسەری بكەین، پێویستی بەپرۆسەیەكی فراوان هەیە، پێویستی بەگۆڕینی ئەو مۆدیلە پەیوەندییە كۆمەڵایەتییە هەیە كە لێرە و لەم كۆمەڵگەیەدا باوە. یانی زەمینەی بەرهەمهێنانی ئەم جۆرە لە مامەڵەی كۆمەڵایەتی بگۆڕن، كێشە سەرخانییەكان خۆیان دەگۆڕێن.

بەوپێیەی حكومەت بەرپرسە لە سەپاندنی یاسا و پێڕەوی دادگەری و دیسپلینی كۆمەڵگەو حوكم، بەمەبەستی كۆتایی هێنان بە قەیرانەكان دەستی داوەتە پرۆسەیەكی یاسایی چاكسازی سەرتاسەری، لەم میانەیەدا لەیەكەم هەنگاوی كردەییدا كەدەنگدانەوەو دەستخۆشی زۆری بەدوادا هات، موچەی 10 هەزار و كەمێك زیاتر لەموچەخۆری نایاسایی و بندیوار هەڵپەسێردرا.

ئەوەی كە سەرنجی منی بەتوندی ڕاكێشا، چەند كۆمێنتێك بوو كە بۆ ئەو بڕیارە نوسرابوو، یەكێك لەكۆمێنتەكان دەڵێت: " با چاكسازی لە نەوتدا بكەن، بۆچی هەربە موچەخۆری هەژار فێرن!".

لێرەدا لەبەركەمی ماوە ناتوانم شیكاری ڕەهەندەكانی ئەو كۆمێنتە و پاشخانە فەرهەنگییەكەی بكەم، لەگەڵ ئەوەشدا بەڕوونی دیارە كە هەمان ئەو فەرهەنگەی لەسەرەتاوە ئەو موچە خۆرانەی كردە مشەخۆر، ئامادەگی هەیە و تەنانەت قسەیشی هەیە و پاساویشی هەیە بۆ بەرگری كردن لەمشەخۆرەكان و لەئیستاوە بەنیازە وەك قوربانی وێنایان بكات.


بۆیە بەبڕوای من، هاوشان لەگەڵ چاكسازی ئیداری و ئابوری و یاساییدا، گرنگە چاكسازی و شۆڕشێكی فراوانی كەلتوریش بەڕێوەببرێت، ئەوەش كورتترین ڕێگەیە بۆ چاكسازی سەرتاسەری لە حوكم و ئیدارە، لەپێناوی پاراستن و گەشەپێدانی ئەم تاكە قەوارەیەی كورددا.


ئەم وتارە دەربڕ لە ڕای نوسەر دەکات

PM:01:09:06/01/2021



ئه‌م بابه‌ته 153 جار خوێنراوه‌ته‌وه‌‌

وتارەکانی تری نوسەر