وا بڕوات..!

زیكری موسا
نوسەر و ڕۆشنبیر

هەر میللەتێك لە جیاتی كورد با و ئەوەندە جینۆساید و ئەنفال و كیمیاباران كرا با، دەبووە یەكگرتووترین و یەكڕیزترین میللەتی ناو مێژوو. هەر میللەتێك وەك میللەتی كورد لەگەڵ ئەو هەموو دوژمن و داگیركارە سەیروسەمەرەیە بۆ ماوەی سەدساڵ دەستوپەنجەی نەرم كردبا دەبووە ژیرترین و ستراتیژیترین میللەتی سەر گۆی زەوی.

كەچی لەبری یەكگرتوویی، تەنیا چەند ساڵ پاش ئەنفال براكان دەستیان بۆ گیانی یەكتر برد. لە بری ستراتیژی و ژیری تازە بە تازە پەڕۆ و ڕەنگی حزبیان بیر دێتەوە و لەبری كیان و سەروەری پەیج بۆ جنێودان دروست دەكەن.

تاوانی ئەنفال و كیمیاباران ئەوەندە گەورەیە، ئەوەندە ناخهەژێنە، ئەوەندە قێزەوەنە، ئەوەندە دڕندانەیە، دروستەكەی ئەوە بوو كە تاكی كورد تاهەتایە تەنانەت بە خەیاڵیش ڕقی لە برای خۆی نەبێت. دەبوایە تاهەتایە ئەنفال وێردی سەرزمانی با. دەبوایە سەدان فیلم و كتێب و پەیكەری لەبارەیەوە دروست كردبا، دەبوایە مەنهەجی خوێندن با.

دروستەكەی ئەوە بوو بە یادی ئەنفال بخەوێ، بەیادی ئەنفال لەخەو هەڵسێ، بە یادی ئەنفال بژیێ و بە یادی ئەنفال بخوێنێ و تێبكۆشێ و كار بكات و سەر بنێتەوە. ڕاستەكەی ئەوە بوو یادی شەهیدانی كیمیاباران و ئەنفال بكاتە سەرەتا و كۆتایی هەموو خۆشی و ناخۆشییەك. دەبوایە ئەو یادە لە نوێژەكانیشمان با، ڕاستەكەی ئەوە بوو!!.

دەبوایە لە هەموو وتار و دیدار و دانوساندن و سەردان لەگەڵ دەوڵەتی عێراق باسی ئەنفال كرابا. دەبوایە ئێستا دەوڵەتی تاوانباری عێراق ناچار كرابا دەیان تڕیلیۆن دۆلار قەرەبوو بداتە گەلی كورد و هەتا سەدان ساڵی تر ئەم قەرزەی لەسەر شان بمێنێ.

دەبوایە لە شەرمی تاوانی ئەنفال عەرەبی عێراق بە شیعە و سووننەوە زاتی ئەوەیان نەكردبا سەیری چاوی كورد بكەن. دەبوایە هەتا ژیان لەسەر گۆی زەوی مابێت ئەوان قەرزاری گەلی كوردستان بان.

ئەمەیان دروستەكەی بوو بەڵام نەیانكرد، هەر خۆمان وامان كرد هەردەم خۆمان بە قەرزاری عێراق بزانین، دۆزە ڕەواكەمان تەنیا بكەینە مووچە و بیخەینە ژێر ڕەحمەتی مەرجەعیەت و تایفەگەری. بە شانازییەوە خاك و شار و مرۆڤەكانمان خستەوە ژێر پۆستاڵی داگیركار.

گاڵتەمان بە پێشمەرگە كرد و تەماعمان چووە خوێن و سەر و ماڵی یەكتر... ئێستا هەموومان تەنیا بڕوا بە درۆكانمان دەكەین.. ئەو درۆ هەرزانانەی لەكەدارمان دەكەن. ئێمە چێژ لە شانازی نابینین. حەزمان بە لەكەداربوون و تێكشكان و درۆیە.

لەمەدا ئۆباڵەكەی تەنیا لەسەر شانی ئەحزاب نییە، تاك تاكی ئەم میللەتە لە كاسبكار هەتا هونەرمەند، دەوڵەمەند و ڕۆشنبیر، ڕۆژنامەنووس و گەورە و بچووك هەر هەموومان بەرپرسین لەوەی بە بچووك سەیری خۆمان و میللەتی خۆمان بكەین.

وا بڕوات ڕۆژێك دێت هەر هەموومان بڵێین ئەنفال ڕووی نەداوە، جینۆساید نەكراوین، كەس داگیری نەكردووین.. وا بڕوات ڕۆژێك دێت كۆیلەبوون چارەنووسمانە و ئازادی دەدۆڕێنین. وا بڕوات ڕۆژێك دێت سەرتاپای بوونمان درۆیەكی پووچ بێت.

ئەم وتارە دید و بۆچونی تایبەتی نووسەرەکەیەتی

PM:09:24:16/04/2020



ئه‌م بابه‌ته 795 جار خوێنراوه‌ته‌وه‌‌