بەغدادیش هیچى پێ ناکرێت

ئاسۆ عه‌بدولەتیف
نوسه‌ر

كێشه‌ی كه‌ركووك به‌ یاسا و مادده‌ی ده‌ستورییش چاره‌سه‌ر ناكرێت ئه‌گه‌ر ئیراده ‌و یه‌كگرتوویی و ئه‌جێندای سیاسی و كۆده‌نگی كوردی له‌سه‌ر نه‌بێت!

ئەو فۆڕمەی ئێستا كاری پێدەكرێت، بۆ هێنانی هەزاران خێزانی عەرەب‌و بەزۆر سەپاندنیان لە ناوچە كێشەلەسەرەكان‌ و، لەناو زێدو خاك ‌و مەزراو مەئوای جوتیارانی كوردو، سوتاندنی دەغڵ و دان و خەلەو خەرمانەکانیان، بەشێکە لە ئەجێندایەکی ستراتیجی و سیاسی بەغدادو دەوڵەتانی دراوسێ.

وەک دەوترێت (١٢) هەزار خێزانی عەرەب هاوردەی كەركوك كراون، ئەمە فۆرمێكە وێنەی نییە لە مێژووی پاكتاوی ڕەگەزیی‌و نیشتەجێبوونی نوێدا، بەبەرچاوی دەسەڵاتێكەوە ئەنجام دەدرێت كە بانگەشەی فیدراڵیزم‌و دیموكراسی‌و مافی مرۆڤ‌و عەدالەتی دادگاكان‌و پێكەوە ژیان دەكات.

بۆخۆی ئەمە جۆرێكە لە تەعریبی مەزهەبی‌و ستەمكاریەكی دیكەی مەترسیدار، كە شیعەكانی بەغداد ڕەنگرێژی دەكەن‌و ئێمەش قبوڵی دەكەین، بەداخەوە خەریکی ململانێی ناوخۆیی و لابەلاین!؟

ئەم دۆخە حیكایەتێكی تازەی بەردەم دەسەڵاتی ناو میلیشیاگەریی عێراق‌ و، فەزای شێواوی ناو كەركوك‌ و، دەرەنجامەكانی ئەو داگیركاریە سیستماتیكەیە، كە لە ڕابردووی نزیك ڕوویدا، ئەم كێشەیە بارگاوییە بە ڕقێكی دینی‌و مەزهەبی‌و نەتەوەیی لە كورد، بەرهەمی عەقڵیەتی فاشیزمی (عێراق‌و بەغداد)ە، دەرخەری ئەوەیە هێشتا حوكمڕانانی عێراق، بەدەمامكی دیموكراسییەتەوە، مومارەسەی تاریكترین‌و قێزەونترین سیاسەتی ڕەگەزپەرستی‌و پاكتاوكردن دەكەن‌، درێژكراوەی سیاسەتەكانی ڕابردووە.

ئەم وتارە گوزارشتە لە ڕاى نووسەر و چاوى کورد لێی بەرپرسیار نییە.


 
 
 

AM:01:06:04/06/2019



ئه‌م بابه‌ته 319 جار خوێنراوه‌ته‌وه‌‌

وتارەکانی تری نوسەر